ZPM SAWRKÂR-AH TUIALHTHEI MAN A TO BÎK LO
J.Lalramnghaka (Jeru-a)
Tun hnaia Mizoram sawrkâr Taxation Department-in notification a tihchhuah tharah chuan petrol leh diesel-a value added tax (VAT) a lak thin a tihsan bâkah, social infrastructure & services cess leh road maintenance cess-te a la dawn tih târlan a ni a, diesel-a chhiah (VAT) 5.23% lak thin chu 10% ah tihsan a ni a, petrol-a chhiah 16.36% lak thin chu 18% ah tihsân a ni thung.
Heti hian tunah Mizorama tuialhthei man chu Petrol Rs 99.24, XP Rs 105.91 leh Diesel Rs 88.02 a ni tawh dawn a ni. Tuialhthei man hi tihsân angin lang mah se a sâng tak meuh em? A hmaa a man tak tak aiin a sâng rêng em ni? tih hi chîk ngai tak a ni.
ZPM sawrkârah hian petrol man hi sawrkâr hmasa hunlaia chhûtin a to bîk reng em? tih hi tawite-in mi tin hriatthiam theih zawngin i lo chhût teh ang u:-
Kum 3 kalta, ni 4 October, 2021 kan chhui lêt chuan, kha tih hun lai khan Mizoram-ah petrol man chu litre khatah Rs 107.12 niin, XP chu Rs 110.76 a ni a, Diesel kha Rs 97.89 a ni, kha tih hun lai kha Mizoram mai ni lo, khawvêlin COVID hri pui hliam nasa taka a tawrh lai a ni nghe nghe.
Tun hnaia sawrkârin notification a chhuah thar mila kan tuialhthei rate nena khaikhin chuan, MNF hunlai ai khan tunah hian petrol man Rs 7.88-in a la hniam zawk a, XP man hi sawrkâr hmasa hunlai aiin Rs 4.85-in ZPM sawrkârah hian a la hniam zawk a, Diesel man hi Rs 9.87 laiin tun sawrkârah hian a la hniam zawk fan thung.
Hetih rual hian October 5, 2021-ah khan sawrkâr laipuiin tuialhthei mana a chhiah lâk a tihhniam avângin India hmun dangte rualin Mizoramah pawh tuialhthei man a lo tlahniam ve lo thei lo a, hei hi COVID hripui avânga hun eng emaw ti chhûnga mipui nawlpui harsatna sutkiânna tura sawrkâr laipui ruahmanna a ni a, kha tih hun laia state sawrkârin a duh rêng vânga tuialhthei man kha a tihhniam a ni lo. Tunah erawh chuan, hri pui avânga kan buainate pawh lo kiang tawhin, mimal, chhungkua, kohhran, khawtlâng pawh hmasawnna lam panin a kal chho leh tan tawh a, thil reng reng a nihphung pangngaiah lêt leh tawhin, state dangah phei chuan tuialhthei man hian a nihphung pangngaiah a lêt leh tawh hial zawk a ni. He tih rual hian, keini state-ah erawh tuialhthei man hi MNF sawrkâr lai ai khan a la hniam fan a ni tih kan lo hre ta.
Mipui nawlpuiin an han ngaihthlak liama awihawm ve thuak, a taka han belhchian chiaha thu tak tak tling leh si lo hmanga politics khelh hi kan politician-te hian an sim a ngai a, heng thilah hian a bîk takin opposition party-te an pawimawh lehzual.
MNF sawrkâr lai, kum thum kalta hripui lên hunlai lehnghalah khan vawiina tuialhthei man aia to daih hian mipuite’n tuialhthei kan lo lei tawh a, tuialhthei man mai ni lo thil dang man pawh tun hunah phei chuan nasa takin a to tawh zawk a nih hi. Vawiin-ah tuialhthei man hetiang hi a lo nih tâk avânga lirthei chuan man to sawt turte, kuthnathawktute’n an retheih phah sawt turte leh mirethei zawk-te’n kan retheih pui ngawih ngawih tur anga sawitute hi mirethei emaw kuthnathawktute emaw tak tak an nih a rinawm loh a, an sawrkâr laia khaw êng pawh zahna nei hauh lova sawrkâr sum hmanga duhtawka lo inhaivûr tawhte khan politics game chhe mi an rawn khêl leh zawk a ni; hengho hian miretheite leh kuthnathawktute hi an hmangaih tak tak a rinawm loh.
Mipuite thluâk sûk politics game hi Zoram than mawh bawk a ni a, opposition party lian pahnih MNF leh Congress party kan nei mêk a, kan opposition party-te zîngah mipui thluak sûk game kalsan hmasa ngam zawk zawkte hi opposition an nihna ata rawn tho chhuak leh hmasa zawk an ni ang. Mipui thluak sûk game an kalsan phal loh chuan tunlai khawvêl changkâng takah hian an tân khua a vâr har tawh viau ang.
Mi tin ban phâkah tunlai technology changkânna hrang hrangte, social media-te, zalên taka thil chhui theihna dân R.T.I-te a awm tawh a, a chhui peih mite tân chuan thudik hi a hriat zung zung theih tawh avângin thil sawi pawr leh sawi ring satliahte thusawi avânga kan phut leh dual mai thinna-te chu, tunlai khawvêlah chuan tihtlèmin a lo awm ta deuh a, a lawmawm hle. Mipui pawhin thu vuvûk mai mai hmanga mipui thluak sûk tumte chu ngaih khatah kan ngai tawh a, ngun taka han chhût chuan tuialhthei man pawh chhiah avanga tihto angin lang mahse a nihna takah chuan MNF sawrkâr lai ai khan cheng eng emaw zâtin tunah hian a la tlawm zawk fe a ni tih kan lo hre ta a ni.