ZPM sawrkarin a tih tur thil pali – K Sapdanga

An sawrkar a nih chuan sawrkarin a la tih ngai loh leh a tih tawh thin, tuna hman zui tak loh tih tur thil pali an nei tih ZPM working president K Sapdanga chuan a sawi.
ZPM a sawrkar chuan sawrkar ding tawha la awm ngai lo, Budget Session hmasa berah kuthnathawktute khaichhuahna’n thlai thar leina tur sum an dah dawn tih a sawi a. A bul tanna atan thlai chi li-ah enchhin a ni anga, a thar huna a rate tur bithliah sa in, Mizo kuthnathawktute chu eng anga taima nge an nih khawvel hriattir an tum tih a sawi. Hetihrual hian thlai dang chingtute pawh an hahthlawn loh dan tur ruahman hmaih a ni dawn lo tih a sawi a ni.
Lehkha an thiam emaw thiam lo emaw, thalaiten mahni kea dinga chhungkaw chawmna thawhchhuah nei tura ruahmanpui an tum tih a sawi a. “Mitinin kan thiam zawng leh tui zawng eizawnna thawh kan duh a, thenkhatin kan ruahman thiam a, bul tanna sum kan neih loh vangin tih ngaihna kan hre lo. Thenkhat chuan thawk peih mah ila thawh tur ruahman dan pawh kan thiam lo. Chutiang mite hlei hlei chu thawh tur ruahmanpui a, thawh bul tanna tur ngaihtuahsak hi sawrkar ngaihpawimawh hmasak turah kan ngai,” a ti. Thalai, mahni kea din chak ngawih ngawihte bana kaih policy chu kalphung thar zingah pawh ram hmasawnna atan tangkai pawl tak tur a ni tih a sawi.
Sawrkar office tam bera state pawnlam siam, tlo lo zawk, thawleng zawk, hman hrehawm zawk leh man to zawka lei kher thin chu, ZPM a sawrkar chuan, sawrkar building leh sawrkar luah building reng rengah Mizopa siam furniture, Mizonu tah parda hman an tum tih K Sapdanga hian a sawi. “He thil ti tur hian harsatna chhete mah a awm lo. Mizoram tihhmasawnna tur sum tam tak state pawna luangchhuak hum hum kha ram chhung mistiri-te leh puantahtute kutah a lut tawh dawn tih mai a ni,” a ti.
Tunhma chuan contractor office chu office lun pawl tak thin, kawng laih emaw in sak tur emaw a awmin, sawrkarin tender chhuahin, registered contractor-ten an chhang thin a; vanduai fal, contract hna hmu thei lo riau an awmte in an inkian tel tel thin a. Contractor diktakin hna a thawk a, sawrkar engineer-ten an endik thin tih ZPM hruaitu hian a sawi bawk. “Tunah chuan contract-a thawh chi hna reng reng open tender chhuah a awm tawh loa, a hmutu tur thlansa vekin, ruling party worker-te kutah a lut fai ta vek a. Mipuiin khawiah nge Contractor Association office a awm pawh kan hre tawh lo. Contract hna thawhna phenah MLA-te an biru thin tih sawi a awm, tak tak a nih ngai chuan, Bihar state chhiat vanglai ang chauh kan ni tawh tihna a ni ang. ZPM hian thuneihna a chan chuan, contract hna chu contractor kutah a kir leh anga, sawrkar engineer ten an endik leh anga, hlemhletna awm lo turin thuneituten fir takin an veng ang,” a ti.
ZPM chuan a thlawna sum sem an do tlat a, Mizoramah politics khelh dan thianghlim lantir an tum a. An thutiamah hian an ding tak tak ngam em tih enchhin turin an cho tih ZPM working president hian a sawi a ni.