Dr. Lalzuia Colney
P4. 9862334371
-- Advertisement --
Zu chungchang hian sawi a hlawh hle a, Zu hian Mizo min tihchhiat nasatzia hi a ngaimawh tan chuan ngawih bopui mai mai chi a ni tawh lo a ni. Chuvangin, Zu chungchang kan hriat fuh theih nan chanchinbu chhiartute pawhin uluk takin lo chhiar hram hram turin ka ngen a ni. Sorkar pawhin Zu avang hian Mizoram kan chhiatphah nasat tawhzia hriain Mizoram, a bikin kan thalai nun chhanchhuah nan he thu hi ziak a ni. Mizoram sorkar chuan hetianga Mizo min suattu hi kut kuangkuaha ngawih bopui mai mai chi niin a hre lo va, Zu chungchang chhui chiang tur leh Zu tihrem theih duhin, ‘The Mizoram Liquor Total Prohibition’ (MLTP) a din a. MLTP Dan Bung III:9-ah chuan, “Mizoram chhunga chanchinbu ni tin chhuak emaw, hunbi bik neia chhuakah emaw Zu zuar tur emaw, fakmawina (Advertisement) lam chi reng reng a chhuah tur a ni lo, tih a awm a, chutiang ti chu thla ruk lung in tan emaw, Rs 1000 chawitir emaw, tan leh chawi bawk emawa hrem theih a ni, tih a awm a. Chutih lai chuan, “Kohhran hi Zu min huattirtu a ni, Zu tha zawrh a hun,” tiin,” (K.Hmingthankaia, Vanglaini March 29.2025) ziak a ni a. Chutih lai bawk chuan, “Zu hi sual a ni lo,” (K.Lalreia, Upper Republic, Aizawl Thupuan September 21, 2005) tia chhuah a awm bawk a ni.
Tichuan, Zu hian khawvel hmun hrang hrangah pawh a thawh dan kan chhui zel dawn a ni. Kan hriat angin Zu hian sawi a hlawh hle a, tun hnai-ah pawh sorkar leh Kohhran pawhin tan lak a tulzia lam hawiin sawi a ni a. Zalen chanchinbuah pawh Zu leh Mizo tih thupui hmangin, zu khap hian awmzia a neih loh thute, Zu hi khap lovin a hman dan tha inzirtir lamhawi zawnga inzirtirin Zu khap tha a tih loh thute pawh sawi a ni a, “He kan zu khap avanga kan hnam hi ropui sawtna tur a awm lo. He Dan hi a hlawhchham hle, mahni duh loh mi dangte duh va khapsak talh hi khawvel changkang zawkah chuan thil tihmiah an ngai lo,” tih thute a chuang a, (June 15,2008). Heng thute hi kan en chuan MLTP Act-in a sawi dan chuan Zalen chanchinbu chhuah-tu hi chuan hremna a pumpelh lo mai thei. MLTP Dan Bung III:9-ah chuan, “Mizoram chhunga chanchinbu ni tin chhuak emaw, hunbi neia chhuak emawah Zu… zuar tur emaw, fakmawina (Advertisement) lam chi reng reng a chhuah tur a ni lo tih a awm a. Chutiang ti chu thlaruk lung in tan emaw, Rs 1000/-chawitir emaw, tan leh chawi bawk emawa hrem theih a ni, tih a awm. He Dan en hi chuan chanchinbu lamah hian Dan bawhchhia an awm nual a ni.
Tunah ngun zawkin lo bih chiang ta ila, Zu hi khap beh theih a ni em? Theih loh ti an awm ang; mahse, han thlir zau deuh ila. Protestant Kohhran dintu zinga mi John Calvin-a hunah chuan (AD 1509-1564) Kohhran chu thlarau lam nun chang ni lovin ram leh hnam, khawtlang nun leh mi mal nun chena siam thei tura hmalatu a ni. Geneva khawpuiah chuan lehkhaden, milem chhuah, chhechham leh zu dawr siamte hi a khap hmiah a ni. Tichuan, tu man Zu an siam lo va, Zu a awm ta hauh lo a ni. Chuvangin, Geneva khawpui chu Europe khawmualpuia khaw thianghlim bera puan a ni ta a. Hei hian Dan kengkawhtu athuin Zu hi khap rem thak theih a ni tih a entir thei ang. “No cross no crown” tih angin ram thianghlim leh ram nuam siam tur chuan harsatna tam tak sut tlang a ngai a, Dan bawhchhia na na na chuan a tuar pawh a ngai ve bawk. Tichuan Calvin-a hunah hian ram leh hnam nun pawh a thianghlim hle tih kan hria. Mi thenkhatin Zu hi khap rem theih a ni lo an tih chu, tlanchhe chunga do an tum vang a ni. Hei hi kan ram pawh hian kan hriat thiam a ngai khawp mai chuan tlanchhe chunga do a tum vang a ni tih kan hriat a tha.
Kan sawi leh tur chu, “Zu in thiam ram an awm em?” tih hi a ni ang. Hei hi lo chhang leh ila. Khawvel ramchangkang ber berte dinhmun lo thlir ila. Mi thenkhat ngaihdan ang hian Zu hi khap beh theih loh, a in dan thiam tura inzirtir sawt vaka ring an awm ve bawk. Chutiang ram chu Zu an khap hma siin an khap hnuah Zu a hluar fe tih hmuh chhuah a ni. Entir nan, khawvelin kan thlir ber USA-ah khuan zu hi khap sawt lovin an hria a, an thlahzal ta a, chumi rah chhuah chu, hnathawktu 13 zelah pakhat chu zu ngawlvei an tih hi a ni. Chumi bakah kum tin zu ngawlvei an pung zel bawk.
France ram pawh khu lo thlir leh ila, Zu in thiam ranah mi tam tak chuan an sawi awm e; mahse i han bih chiang teh ang. Medical Dept-Budget za zela 40 chu zu ngawlveite enkawl nan an hmang tawh tih a ni. Chu chang a ni lo, hospital zawng zawng khum za zela 50 chu zu in tuar lova natnain a tlakbuak vanga natnain a tlakbuakten an luah reng an ti bawk. Medical Dept.-in zu in mite an buaipui nasa ber zel tih a ni. Chuti ni se, zu in hi a thiam tak tak theih kan ti em? Mizoram erawh chu MLTP Act hmang kan ni bawk a, zu in thiam ram ang em chuan Hospitalah zu in mi kan la buaipui lutuk lo a ni mai thei. Record kan neihah chuan kum 2000-2004 June thleng khan Zu vanga Hospital-a admit zat chu 1513 an ni a, chumi zingah 956 chu an thi a ni, (Zalen June 27, 2004).
Zu vanga harsatna lam ve thung hi: Mi thiamten an hmuhchhuah dan chuan USA-ah khuan Zu vanga accident hi ni tin 60 zel awm anga chhut theih a ni. S. America-a Chile-ah khuan Medical Budget za zela 30 chu Zu in vanga natna chi hrang hrangte enkawl nan an hmang bawk. Yugoslavia-ah pawh khuan Mental Hospital-a lut za zela 50 chu zu in vanga rilru buaite an ni. Mi thiamten an chhui dan chuan khawvel hmun hrang hranga dan bawhchhiatna za zela 30 hi zu in mite vang niin an hria. USA-ah bawk khuan Industry-in Zu ngawl veite avanga kum khata an pawisa hloh zat chu Dollar tluklehding-awn 160 zet a tling a ni, (TPC p.8). Hetiang hi khawvela Zu in thiam nia an hriat Zuin a tihchhiat dan chu a ni a, Mizoram hian MLTP Act hi kan lo hmang har ang tih a hlauhawm hle lo maw?
Mizoram ve thung hi? Record kan hriat theih chinah chuan Zu vanga thi hi kum 6 leh thla khat chhungin mi 44 vel 1997 – 2006 khan an thi a, tun laiah erawh chuan kum khat chhung pawhin hei ai hian an tam zawk hial ang. Kum kal ta lamah khan YMA-in tlema a inthlahdul deuh khan Rangvamual leh Phunchawngah khan Zu vanga accident vawi 13 a thleng hman a ni. Thla hnih chhunga accident vawi 22 a awm a ni (Vaivakawn Police Record). Zu vanga kan thalai thi tawh zawng zawng chu 1120 an tling tawh.
Tunah chuan MLTP Act kan hman dan hi a tawk em tih hi han thlir leh ila. Mi thenkhat chuan MLTP Act hman hi sawt chuang lova ngaite pawh an awm. Hemi chungchangah hian MLTP Act kengkawhtu Excise Department hian mawh an phur deuh mai thei. YMA tel lo phei chuan an che thei lo ni ber-in an hria. Thenkhat chuan an indaih loh vangah an ngai ve bawk, dikna chen a awm ve bawk ang. Tunah chuan MLTP Act hman hi a sawt em tih kan sawi leh ang a. He Dan hi kan hman hma aiin kan hman hnuah Zu vanga thi leh accident a tlem sawt. Mizoram Presbyterian Kohhranin record a neihah chuan hmeithai 1419 an awm a, chung zinga za zela 65 chu Zu vang a ni. MLTP hman hnuah chuan Zu vanga hmeithai chu an tlem ta hle. Civil Hostital-a kum khat chhunga nau titla chu 1400 an tling a, MLTP hman hnuah chuan 300-ah a tla hniam ta a ni.
Kohhran lam thlirna ve thung hi: Mi thenkhat chuan, Kohhran hi Zu haw viau si, kut a thlak ve si lo, tite pawh an awm. Kohhran chuan Zu in a hmuh pawhin a sim leh theih nan thahnemngai taka tawngtaisaktu a ni, In lamahte pawh lengin zu in mite chu an tawngtaisak thin. Chutih lai chuan Zu in leh Zu zuarte hi eng kohhran nge tih hriat lohte leh Mizoram pawn lam mite pawh an ni ve tho. Mizoram Kohhranah eng Kohhranah mah awm ve lote pawh an ni ve bawk. Chuvangin, mahni kohhran mi ni ve lo lakah action lak theih a ni lo va, an tih theih chhun chu Zu in miten an sima, Pathian lam an hawi theih nana tawngtaisak hi a ni ber.
Hengte hi Mizoram din hmun chu a ni a, Zu vang hian kan chhiat phah tawh hle tih pawh kan hria. Chuvangin, Zu hi tlanchhe chunga khap chi a ni lo va, tihtakzeta khapa tan kan lak a ngai a ni. Zu vanga mizo-thalaite kan chan hnem tawhzia leh hmeithaite an pun zel vang hian Zu lakah hian kan inthlahdah mai tur a ni lo. Khawvela Zu harsatna nei USA-ah pawh khuan tih tak meuha an khap chuan a rem thei tih kan hria. USA-Illinois, Abraham Lincoln State pawh zu hmunpui ni thin kha Dry Area-ah an chantir thei a ni. Thomas Fuller chuan, “Tuifinriata tlahlum aiin Zu tuitlinga tlahlum an tam zawk,” a tih hi kan ram pawh hian kan hriat reng a tha ang. Chuvangin, Zu hi tlanchhe chunga khap lovin huaisen tak leh tih tak meuhin i khap tlat ang u. Hei hi kan ram damna tur a ni.