Zu politics

On Mar 1, 2025 19 0

Excise and narcotics department leh police department ten MLTP Act, 2019 behchhana zu leh a kaihhnawih an man dan thla tin report han en hian, zu khapna dan hian zu hi a puntir hlauh em ni a tih theih hial awm e.
Nimina sawrkar thuchhuaha monthly crime report-ah chuan January 2025 chhunga Rakzu man zat chu litre 6059.74 a ni a, Zu bilh lai Tin 2216 man a ni bawk. Thla thum vel kalta October 2024-a report-ah chuan, Rakzu litre 4750, Zu bilh lai Tin 3,925 man a ni. Hetih lai hian Sap zu (a senchi) pawh eng lai pawhin um 2000-3000 vel chu man a ni reng a; man chhuah loh hi Thahnem tak a awm ang tih a rinawm a. Zu zuar hi thla tin mi 500 chuang man an ni reng bawk.
Mizoramah Zu khap a ni a, mahse khitiang zat khi zu leh a zuartu man tur an awm reng thei a. Chumi awmzia chu, thla tin dan bawhchhiaa zu zuar mi 500 chuang man tur an awm reng a, thla tin rakzu litre 5000 chuan man tur a awm reng a, zu bilh lai pawh tin 2000-3000 a awm reng bawk a. Sap zu pawh um 3000 chuang man tur a awm reng bawk.
Zu leh a kaihhnawih man tamna khua/Veng bik a awm tih pawh sawrkarin a hre khiau a, mahse ‘change’ a thleng thei si lo. Hei hi sawrkar awm tawh zawng zawng leh sawrkar mek pawhin tihngaihna a hriat loh a ni.
Tuna session kal mekah hian, Zu chungchangin sawi a hlawh leh a. Zu khapna dan hman mek ennawn tumna a awm a, chu chu House Leader pawhin a sawi tawh a, a changtu minister-in tun session kal mekah hian zu khapna dan amendment bill a pu lut dawn tih pawh sawi a ni tawh. Wine leh Beer phei chu ‘regulate kan tum’ tiin House Leader-in House chhungah ngei a sawi lawk diam tawh bawk.
Zu khapna dan hian zu hi a hnawt bo chuang lo.. khi, a chiang reng. Chuti a nih chuan, a quality Tha zawk siam a, hman Tangkai dan hi kan ngaihtuah mai a hun tawh a ni ber awm e. Kan zuar emaw, zuar lo emaw, zu hi chuan min chen chilh reng dawn, a hman Tangkai dan dap hi kan tihtur a ni tawh mai lo em ni? tiin inzawt zawk ta ila. Inthlan dawn apianga ‘zu zawrh an tum’ tia inbeih nan bera kan hmang tluk tluk mai hian eng nge maw rah Tha a chhuah reng reng le?