Zu zuarte tihrem dan tur …

Nimin khan excise and narcotics department enkawltu minister Lalnghinglova Hmar hovin Vaivakawn khawtlang hruaitu hrang hrangte leh excise and narcotics department hotute an thukhawm a, Vaivakawn huam chhunga zu leh ruihhlo do dan tur leh a zuartute tihrem dan tur an ngaihtuah a. Minister chuan zu leh ruihhlo khawihna hmun hrang hrangte chu thenfai famkim theih ni rih lo mah se, Vaivakawn huam chhung bik chu an thianfai dawn tih sawiin, inthuruala khawtlangin kan beih phawt chuan kan hlawhtling ngei ang, tiin a sawi a ni.
Vaivakawn huam chhung han tih hian, tinzawn deuh bik chu Rangvamual leh Phunchawng bawr vel hi a ni deuh mai a. heng lai hmun hi englai pawha zu zawrhna hmunpui ni reng thin ani a. Excise and narcotics department pawhin vawi duai lo beihpui an thlak tawh a, beihpui an thlak apiangin zu sak lai thahnem tak tichhiain zu sakna hmanrua thahnem tak bakah a inhnamhnawih mihring an man reng bawk a, mahse a rem tak tak thei lo.
Heti taka beihpui thlak hnua tun thleng pawha a la rem thei miah lo hi ‘eng vang nge?’ tih hriatchhuah hmasak phawt a, chumi dungzuia hmalak chu a sawt dan tur ber a nih a rinawm a.
Tunhma deuh, thlawhtheihna service a rengte leh Kolasib tlangdung khu Mizoram kawtchhuah a ni thin a. Tunah chuan thlawhtheihna service a mumal tak hnu hian, Airport atanga Aizawl khawpui lo lut tur tourist ten Mizoram leilung an rawn luh phata an rawn paltlang hmasak ber a nih avangin Rangvamual leh Phunchawng hi Mizoram hmelhmang lanna hmasa ber, kawtchhuah pawimawh tak a ni ta a. Tourism promote kan tum mek lai leh, economy chawi kanna atana tourism hman kan tum mek laia kan kawtchhuah pui ber tawp leh rimchhe taka kan lo dah chuan, khualzin ten ‘zawng-chhang-tlak-loh’ min tihsak mai dawn a, chuvangin, kan kawtchhuah hi fai thianghlim leh rimtui, mit la zara kan lo chei hnum hi a pawimawh hle a ni.
Helai vela eizawnna atana zu hmangtute hi koh khawm a, eizawnna tur thil dang ruahmansak dan zawn te pawh hi zu tihremna atana hmalakna kawng dang awm thei tur niin a lang bawk awm e. Tuna zu zuar mekte hi hmun danga nawr chhuah lo ni ta pawh ni se, an awmna hmunah zu bawk an buaipui chhunzawm leh chuan, awmzia a nei thui dawn lo hle a ni.
Eng pawh ni se, helai bawr vel hi chu eng tin emaw taka thenfai leh tih thianghlim hi chu a pawimawh hrim hrim a ni.