10 Ball Pool Ranking Tournament champion K. Lallawmkima

Mizoram Snooker & Billiards Association (MSBA) buatsaih Mizoram State 10 Ball Pool Ranking Tournament 2024 chu June ni 29, Inrinni zan khan final khelh niin, Khatla South player K. Lallawmkima a thiamber.
Inrinni tlai dar 5 atanga khelh tan niin, race to 10 (frame 10 la hmasa zawk zawk chak)-a khelh a ni.
Final-ah hian Aizawl Electric Veng tlangval Zonuntluanga leh Khatla South tlangval K. Lallawmkimate an inhmachhawn a; player tha leh fei ve ve insu an ni bawk a, an game a sangin a hmuhnawm.
Darkar hnih chuang zet an khelh hnuah Lawmkima’n 10-6-in hnehna a chang a, Mizoram State 10 Ball Pool Ranking Tournament 2024 champion a ni ta a ni.
Final match khelh zawh hian lawmman sem nghal a ni a, finalist-te bakah hian semi-finalist tlang zo ta lo pahnih Lalchhandama leh R. Lalthazualate hnenah lawmman hlan a ni.
Finalist-te kutah lawmman atan medal leh certificate bakah pawisa fai hlan zui nghal a ni.
MSBA buatsaih Mizoram State 10 Ball Pool Ranking 2024 hi June ni 24 atang khan MSBA Hall, Hawla Indoor Stadium, Republic Vengthlangah khelh a ni a; Mizoram hmun hrang hrang atangin player 40 chuang an fuankhawm a, June ni 29 khan a hmawr bawk a ni ta a ni.
Tarlan tawh thin angin, pool game hi a tui leh khel duhte tan Pathianni tih loh nitin chawhnu dar 2 atanga zan dar 10 chhungin cheng 50 chawiin MSBA Hall-ah khelh theih reng a ni.