13-naah United an inhlangkai

November 10, Pathianni zan khan English Premier League 2024-25 khelh chhunzawm a ni a, Manchester United in an mikhual Leicester City an sawp. An mualah hnehna an chan vangin United hian hma an sawn hretah 13-naah an inhlangkai. United an chak lai hian Chelsea leh Arsenal an inhnehtawk a, Tottenham an tlawm ve thung.
United 3-0 Leicester
Erik ten Hag an ban ngeih a, manager lai lawk Ruud van Nistelrooy hnuaia chak thiam thar United hian Old Trafford-a an mikhual Leicester City chu 3-0 in an hneh. Leicester City lak nen an inkhel hi Van Nistelrooy kaihruaina hnuaia an match hnuhnung ber tur a ni ta a. Hnehna nen ngei an manager lai lawk Nistelrooy an thlah. Nistelrooy hun hnuhnungah hian United tan Bruno Fernandes leh Garnacho te an langsar.
Old Trafford a United leh Leicester City te inkhel hi inkhel hmuhnawm tia sawi tur a ni lo naa United tan erawh point thum pawimawh tak hmuhna remchang a ni. Red Devils hian an mikhual Foxes lakah an khel tha a, goal pawh an thun har lo. Inkhel tan atanga minute 17-na lekah captain Bruno Ferandes chuan Diallo siamsak atangin hmahruaina goal a thun. Fernandes zarah United hian minute 38-naah goal an thawkchhuak zui leh. Bruno Fernandes pet hlauhawm tak chu Victor Kristiansen chuan an lamah a dang pial lut a, United goal hnihna a thunsak.
Chawlhlawk hnu lamah United an khel tha chhunzawm viau a, goal hlauhawm pawh an nei zauh zauh. An mualah khel tha viau mah se United hian goal an thun belh thei mai tawh bik lo. Hun rei tak chhung goal lut a awm belh theih loh hnuin hun tawp dawn hnaih lamah goal ropui hmuh tur a awm. United tan hian bench atanga lut Alejandro Garnacho chuan minute 82-naah goal ropui a thun a, an hmahruaina a tizau. Garnacho goal thun hnu hian goal dang a luh belh thei tawh lova, United chuan an mualah awlsam takin hnehna an chang.
EPL a club hlawhtling ber Manchester United hian 2024-25 season kal mekah vawi 11 an khel tawh a, point 15 hmuin 13-naah an awm mek. Foxes hian khelh 11 atanga point 10 hmuin 15-na an luah ve thung. Leicester City an hmachhawn tum hian Bruno Fernandes chuan United tan vawi 250 a khel tling chiah a ni.
Chelsea 1-1 Arsenal
Pathianni zana inkhel ngaihven hlawh ber chu Stamford Bridge-a Chelsea leh Arsenal ten North London derby an khel tha a ni. London derby hmuhnawm takah Chelsea in tlawm an pumpelh a, an mikhual Arsenal nen 1-1 in an inhnehtawk.
Palina nih inchuhna inkhel pawimawh takah mikhual team Arsenal in bul an tan tha a, goal an thun thuai, Inkhel tir lamah Blues player hlui Kai Havertz chuan Gunners hmahruaina goal a thun nghal. VAR rawn a nih hnuin goal hmahruai thuntu Havertz hi a lo offside tih hmuhchhuah a ni a, Arsenal goal khatna hi hnawl a ni. Arsenal goal khatna hnawl a nih hnuin goal dang a luh belh lawk thei lova, hun tawp dawn hnaiah goal hnih hmuh tur a awm ta thung.
Stamford Bridge-a lenglut Arsenal tan hian Gabriel Martineli chuan minute 60-naah chep tak kar atangin a pet goal a, hmahruaina goal a thun ta nge nge. An mualah goal an chhuah hnuin Chelsea hian na takin an mikhualte an nawr let a, goal pawh an thun thuai. Goal an chhuah atanga minute 10-na lekah Chelsea tana khel tha tak Pedro Neto chuan mawi takin a pet lut a, an si phurh a sut.
1-1 a nih hnuin Arsenal an khel tha a, an hlauhawm zui hle. Arsenal hian goal thun theihna hun tha nei bawk mah se captain Martin Odegaard, Mikel Merino leh Havertz ten an hun tha neih an chhawr tangkai zo lo vek a, Chelsea lakah uiawm takin an chak zo lo. An mualah chak zo lo mah se Arsenal laka tlawm an pumpelh hi Chelsea tan result tha a ni. Season thara khel tha pangngai tak Chelsea hian khelh 11 atangin point 19 an hmu a, pathumna an luah chhunzawm. Blues hi an hnuai chiaha awm Arsenal nen an point hmuh zat a intluk mek a ni.
Tottenham an tlawm
Pathianni zan hian inlehthalna hian a thleng a, kaithar Ipswich Town chuan London club lian Tottenham Hotspurs chu 2-1 in an hneh. Ipswich Town hian kum 22 hnu zetah Tottenham an hneh lehna hmasa ber a ni.
Table hnuai ber dawttu a awm mek Ipswich Town hian Tottenham lakah an khel tha viau a, chawlhlawk hmain goal hnih an thun hman. Inkhel tan atanga minute 31-naah Sammie Szmodics chuan hmahruaina goal a thun. Chawlhlawk dawn hnaih minute 43-naah Liam Delap chuan an goal hnihna thunin an hmahruaina a tizau leh bawk.
Mikhual team in goal hnih an thun zawn hian Tottenham an barakhaih a, a tithangtlawm hle. Chawlhlawk hnu lamah an si phurh sut tumin tan an khawh nasa hle a, goal khat thun bawk mah se tlawm an pumpelh thei lo. Spurs tan hian Rodrigo Bentancur chuan goal thuin an si phurh a sut then naa goal dang an thun belh theih loh vangin kai thar Ipswich Town lakah an mualpho zui ta a ni.
Tottenham an tlawm laiin Newcastle United chuan Mimualah hnehna changin, an khingpui Nottingham Forest chu 3-1 in an lo hneh ve thung.