2024-ah aiin 2025-ah zu leh ruihhlo vangin man tam

Ruihhlo hluarzia chu tlang hriat a ni a, zu a tam tih pawh hriat loh theih a ni lo ang. Zu leh ruihhlo vanga man pawh an thahnem a, excise force te’n nikuma an mi mante kha a hma kuma an man aiin an tam.
Mizoram Excise & Narcotics (MEN) department-in 2025-ah khan NDPS Act hmangin ruihhlo vangin mi 864 an man a, 2024-ah khan mi 739 an man. Nikum khan October thla thlengin NDPS Act hmang hin mi 795 an man a, 2024 kum tluana an man zat aiin nikum thla 10 chhunga an man zat kha a tam zawk.
Zu khapna dan MLP Act hmangin nikum chhung khan mi 5907 an man a, hei pawh hi kum hmasaa an man zat aiin a tam; 2024-ah khan MLP Act hmang hian mi 5587 an man.
Nikum chhung khan Mizoram Excise Act hmangin excise force te’n mi 277 an man bawk.
Zu leh ruihhlo vanga dan pathum hmanga 2025 chhunga mihring an mante hi mi 7084 an ni a, 2024 khan heng dan pathum hmang hian mi 6852 an man.
Kum liam taah khan MEN department hian NDPS Act hmangin case 493 an siam a, MLP Act hmangin case 6465, ME Act hmangin case 321 an siam.
Zu leh drug vanga mihring man zat
An manna 2024 2025
dan
NDPS Act 739 864
MLP Act 5587 5907
ME Act 526 277