2024 CMA Awards-ah Chris Stapleton a langsar
2024 CMA Awards-ah Chris Stapleton a langsar
58th Annual CMA Awards chu nimintuk khan Bridgestone Arena, Nashville-a an sem ta a, Chris Stapleton a langsar ber a, award pathum a dawng. Award ngaihhlut ber entertainer of te year chu Morgan Wallen-a’n a dawng ve thung.
Morgan Wallen-a’n entertainer of the year a dawng hian Nashville-ah a hming a chher leh tawh tihna te pawh a ni thei ang. Ani hi kum thum vel kalta khan chi inthliarna lam rawngkai a sawi lai video a darh avangin a career pawhin a tawrh phah teuh hle a, award pawh a dawng hleithei lo a, tun tumah CM Awards-a ngaihhlut ber entertainer of the year a rawn dawng ta. Chutihrualin category paruk dang nomination a neihnaah erawh award a dawn belh tlat lo a, Nashville-ah a la tlangtla tawk lo tihna te chu a ni thei tho mai!
Chris Stapleton hi entertainer of the year-ah hian kum riat chhung award dawng lovin nomination a lang ta a, he category-a award dawng si lo a nomination a lang ngun ber a ni ta bawk. Miranda Lambert leh Carrie Underwood te pawh he category-ah hian award dawng si lovin nomination-ah vawi ruk ve ve an lang tawh bawk.
Chris Stapleton hian CMA Awards 18 a dawng tling ta a, ani aia CMA Awards dawng tam chu Brooks & Dunn te chiah an la awm a, anni hian kuminah award pakhat dawng lehin, CMA Awards 19 an dawng tling taw a, Vince Gill-a’n award 18 a dawng ve tawh bawk. Kumina lifetime achievement award dawngtu George Strait pawhin award 17 a dawng tawh bawk.
Stapleton hian kumin CMA Awards-ah ‘White Horse’ hla avangin single leh song of the year a dawng a, heng category pahnih hi a dawn kawp vawi thumna a ni ta a, 2018 khan ‘Broken Halos’ avangin a lo dawng kawp tawh a, 2021-ah ‘Starting Over’ avangin a dawng kawp tawh bawk. Stapleton hian record siamin CMA history-ah song of the year tum thum dawng thei hmasa ber a ni.
Lainey Wilson-i’n award pahnih dawngin, chung zingah chuan female vocalist of the year a tel a, he award hi a zawnin kum thum a dawng tling ta a, he award a zawna tum thum dawng thei parukna a ni. Wilson hian ‘Wildflowers and Wild Horses’ avangin music video of the year a dawng bawk a, tihian CMA Award pakua a dawng tling ta a, heng award te hi kum thum chhunga a dawn vek an ni.
Old Dominion-i’n vocal group of the year an dawng a, he award hi a zawna tum sarih an dawnna a ni ta a, hetiang tithei hmasa ber an ni. Brooks & Dunn pawhin a vawi 15 nan vocal duo of the year an dawng a, 2006 hnua an dawn lehna hmasa ber a ni ve thung.
Megan Moroney-i’n new artist of the year a dawng a, he category-ah hian tum hnih nominate a nihna a ni. Nikum khan he award hi Jelly Roll-a’n a dawng ve thung. He category-ah hian award an dawn loh chuan tum hnih nominate theih an ni.
Guitarist Charlie Worsham-a’n a vawi khat nan musician of the year a dawng a, he award kum nga chhung lo dawng zawn tawh Jenee Fleenor award dawng kaltluang lai a rawn tikhaihlak ta. Hetirual hian guitarist Paul Franklin chuan a vawi 32 nan he award hi a dawng leh ta lo! Ka tisual lo aw- Franklin hi he category-ah hian vawi 32 nominate a ni tawh a, award erawh a la dawng tlat lo!
2024 CMA Awards Winners:
Entertainer of the year: Morgan Wallen
Single of the year: “White Horse” – Chris Stapleton
Album of the year: Leather – Cody Johnson
Song of the year: “White Horse”; Songwriters: Chris Stapleton, Dan Wilson
Female vocalist of the year: Lainey Wilson
Male vocalist of the year: Chris Stapleton
Vocal group of the year: Old Dominion
Vocal duo of the year: Brooks & Dunn
Musical event of the year: “you look like you love me” – Ella Langley (feat. Riley Green)
Musician of the year: Charlie Worsham – Guitar
Music video of the year: “Wildflowers and Wild Horses” – Lainey Wilson; Director: Patrick Tracy
New artist of the year: Megan Moroney