2024 People’s Choice Awards nomination-ah Taylor Swift leh Travis Kelce an lang

Nikum kha entertainment khawvelah hmeichhe lam an chungnung zawk hle a, kum a lo thar a, kum bul lamah award nomination an han puang sap sap a, hetah pawh hian hmeichhe lam an langsar zawk zel e. Kumin People’s Choice Awards nomination-ah pawh pop artist of the year-a nominee pariat zinga pasarih chu hmeichhia an ni a, a mipa lang chhung chu BTS member Jung Kook a ni. Hetiang hi social celebrity of the year-ah a ni ve leh tho mai a, he category-ah hi chuan Jung Kook aiah Dwayne ‘The Rock’ Johnson a lang ve thung. Song of the year leh R&B artist of the year category-ah pawh mi pariat lang zinga panga chu hmeichhia an ni bawk.
Nikum kha Taylor Swift tan chuan kum tha a ni a, August thla vel atang khan a hmaa khawvelin chuti taka a hmelhriat lem lo, Travis Kelce a rawn lar thar hluai a, ani pawh hi Taylor Swift nena an inngaihzawn vang a ni e, ti ila tuman an hnial lo ang. Tichuan an pahnih hian People’s Choice Nomination-ah an lang ve ve a, Travis athlete of the year-ah nominate a ni a, Swift hi category panga- female artist of the year, pop artist of the year, concert tour of the year, movie of the year leh social celebrity of the year category-ah te nominate a ni.
People’s Choice Awards-ah hian category 45 awmin, movies, television, music leh pop culture huangah te then a ni a, kumin hian category telh thar an nei a- male country artist, female country artist, male Latin artist, female Latin artist leh concert tour te an ni. Country leh Latin chiah hi music genre-ah mipa leh hmeichhe tan a hranga category an siam awm chhun a ni a, pop, hip-hop leh R&B-ah chuan mipa leh hmeichhia category khatah an chhung khawm vek a ni.
Kumin People’s Choice Awards semna hi actor Simu Liu-a’n a host dawn a, ani pawh hi ‘Barbie’ film-a a channa avangin movie performance category-ah nominate a ni. Liu hian 2021 khan Shang-Chi and the Legend of the Ten Rings avangin male movie star category-ah award a lo dawng tawh a ni.
2024 People’s Choice Awards hi February ni 18 (keini tan ni 19 a ni hman tawh ang) hian an sem dawn a, Barker Hangar, Santa Monica, California-ah show hi neih a ni ang. He award dawngtu tur hi mipui vote hmanga thlan thin avangin ngaihhlut pawh a hlawh hle a, kumin hian January ni 16 thleng voting an hawng dawn a,VotePCA.com-ah fan-ten vote an thlak thei ang.