2025- 2026 Mizoram Budget pharh GSDP figure dik tak kan dah tawh – Chief minister

Finance changtu chief minister Lalduhoma chuan 2025- 2026 sawrkar kum atana Mizoram-in sum a ruahman cheng vaibelchhe 15198.76 chu Thawhlehni khan Assembly House-ah a pharh. Tun tumah hian Gross State Domestic Product dik takin an kalpui a, chu chuan GSDP hi tlahniam ta angin lan phah dawn mah se, a tak takah kan thang lo tihna a ni lo tih a sawi. Kum 2025- 2026 chhunga sum ruahman atang hian revenue expenditure-ah cheng vaibelchhe 12540.20 dah niin, sum ruahman zawng zawng atanga chhutin zaa 82.51 a ni. Sawrkar kum kal mek 2024- 2025 a ruahman cheng vbch. 11957.04 aiin zaah 4.88-in a sang zawk. Revenue expenditure hi sawrkar hnathawk hlawh leh an hamthatna dang, sawrkar inrelbawlna, mipui nitin mamawh tui, kawlphetha, kawngpui leh hmunhma atana sen leh leiba rulhna atana dah a ni.
Chief minister chuan revenue expenditure san chhan sawi danin, sawrkar hnathawk hlawh bakah annual increment leh dearness allowances pung zel, pension-ten an chhuahpui leh inrelbawlna hrang hrang sang chho zel hrinchhuah a ni tih a sawi a. Revenue expenditure atana dahhran atanga zaa 30.54 hi sawrkar hnathawk hlawh tur a ni tih a sawi.
Hmasawnna hna thawhna tura sum dah – capital expenditure chu cheng vbch. 2658.56 niin, sawrkar sum hman tura ruahman zawng zawng atangin zaa 17.49 a ni. Sawrkar kum kal meka capital expenditure atana dah aiin zaa 8.29-in a tam zawk a ni.
“State sawrkarin sum a lakluh theihna a la tlem deuh avangin capital expenditure atan duh angin sum kan dah tam thei lo a. Ram hmasawnna hna tam leh chak zawka kan thawh theihnan sawrkar chuan revenue tam zawk hmuh theihna tur kawng a dap chho zel dawn a ni,” a ti.
Gross State Domestic Product (GSDP) dik tak aia sanga Mizoram sawrkarin figure a nei thin chu tha an ti loa, tlahniam ta angin lan phah dawn mah se, huaisen takin figure dik thei ang ber hmanga intehin, kan nihna dik tak pho chhuah ngam an duh avangin, 2024- 2025 GSDP cheng vbch. 48037.52 chu vbch. 34003.27 ni zawk tura chhut chhuah a ni a, a hniamna hi vbch. 14034.25 a ni tih a sawi.
“GSDP dik kan hman hian kan fiscal deficit a nghawng nghal a, kum kal mekah za zela -2.84 ni tur kha revised estimate-ah zaa -7.64 a ni dawn a, kan leiba a pung angin a lang dawn. A tak takah erawh cheng vbch. 1003.94 in a tlahniam dawn,” chief minister hian a ti.
Chhiah atanga sawrkarin sum a hmuh tur ruahman lawk bak, chhiah ni lo atanga sum hmuh tura ruahman zingah Taxation department thuam chak a, chumi atanga state sawrkarin sum a hmuh tur a hmuh loh thin chu hmuh belh an tum tih Lalduhoma hian a sawi. Thawktu indaih lohna avangin phuhrukin, sum hmuh tur tam tak an hmuh belh thei dawn tih a sawi a ni. Lottery chu online-a kalpui tum niin, hetah hian sum engemawzat hmuh belh theih beisei a ni tih a sawi bawk a. Lottery-a sum lut erawh damlo bill atan hman thin a ni tih a sawi. Kawlphetha pekna kawnga hloh tam tak awm thin chu tihchangtlun leh thuamthatin, hloh tlem zawka kalpui theih an tum tih an sawi bawk.
Budget thar a pharh rual hian chief minister chuan sawrkar kum kal meka sum hman ruahman belhna, Supplementary Demands for Grants 2024-2025 cheng vbch 3512.33 a pharh nghal a ni.