2025 Club World Cup khelhna tur stadium 12
Fifa chuan 2025 Club World Cup khelhna tur US stadium hming 12 a puang a, rin lawk ang ngeiin 2024 Copa America match thum khelhna MetLife Stadium a tel a, final khelhna tur a ni nghe nghe.
He tournament khel tur an tipung chiam a, nakkum hian United States-ah team 32 zetin an khel dawn a, June ni 15 atanga July ni 13, 2025 chhunga khelh tur a ni.
Club World Cup tihdanglam tak hi US-in a thleng dawn a, New Jersey khawpuia an khelmual hmingthang MetLife Stadium hi New York City atanga mel nga leka hlaa awm a ni.
Chelsea, Manchester City leh Real Madrid chu Europe atanga automatic-a tling an ni a, tunhnai kum li chhunga Champions League title an lak vang a ni.
Bayern Munich, Paris St-Germain, Inter Milan, Porto leh Benfica-te pawh tel thei tur tehna co-efficient ranking an tih kaltlangin an inlan dawn.
South American club paruk bakah Asia, Africa leh North America atangin club 12 kan hmu dawn a; Oceania atanga club pakhat dah a nih bakah a thlengtu nih manah US chuan team pakhat an thawh thei bawk ang.
Club World Cup hi tunhma chuan season laihawlah kum tin khelh thin a ni a, confederation pasarih atanga team paruk lek chhuakkhawmte khelh mi a ni thin.
Fifa chuan tournament khelh dan hi a tidanglam dawn ta a, kum 2025 atang hian team 32-in an khel tawh dawn a, he mi chungchang hi sawiin Fifa president Gianni Infantino chuan, “Kum 2025 hi club football tana hun (era) thar a ni dawn a, Fifa chuan stage ropui ber a chhawpchhuak dawn a, khawvel huap zo lehzual club inelna chu United States-ah nghah a ni ang,” a ti.
Fifa-in hetia tournament khel thei a tipung ta vak mai hi club leh player tam takin an sawisel sup sup a, Uefa lamin Champions League leh Europa League group stages match hniha a tihpun hnu phei chuan sawisel a hlawh nasa zual.
Khawvel huap player union Fifpro an tih leh ram 33 atanga club 1,130 telna league 39 zet inthlunkhawmna European Leagues body chuan kumin July thla khan Fifa thutlukna hi European Commission hnenah an hek hial a, Fifa chuan football a pawngsual tiin an puh hial a ni!
Chu mi hma thla hnih kaltaah Fifa hian Fifpro leh World Leagues Association lamin Club World Cup khel thei tur tihpun an duh lohna an thlen chu a lo hnawl tawh a ni.
Khup hliam avanga tun season chawl tluan tawh tur Manchester City midfielder Rodri pawhin fixture list bichilh leh indawt chho nasa lutuk chu a lo sawisel ve tawh bawk a, player-te inhliamna thlentu a nih theih thu a sawi.
-- Advertisement --
2025 Club World Cup khelhna tur stadium 12-te
1. Mercedes-Benz Stadium Atlanta
2. TQL Stadium Cincinnati
3. Hard Rock Stadium Miami
4. Geodis Park Nashville
5. Bank of America Stadium Charlotte
6. Camping World Stadium Orlando
7. Inter&Co Stadium Orlando
8. Rose Bowl Stadium Los Angeles
9. Lincoln Financial Field Philadelphia
10. Lumen Field Seattle
11. Audi Field Washington DC
12. MetLife Stadium New Jersey