Tunkar chhunga 2026 FIFA World Cup khel tur zawnna qualifiers hrang hrang kan thlirkual dawn a, Ningani khan Asia khawmualpui atangin Uzbekistan leh Jordan chuan a vawi khatna atana World Cup khel turin an dinhmun an sawhnghet a, history thar siam chungin tlin an lawm.
Asia khawmualpui atang hian regular qualifiers South Korea pawh an inhlangkai leh a, Basra khawpuiah sihnih faia Irag hneh chungin nakkum North America tournament an khel dawn.
Uzbekistan thawm thangva
Ningani khan Abu Dhabi khawpuiah goal awm loa mualneitu United Arab Emirates draw chungin tunhma lama Fifa World Cup la khel ngai lo Uzbekistan chuan team 48 tel theihna tura World Cup huang an zauh takah hmun an chang ve ta hlawl a, Timur Kapadze team hian preliminaries Group A-ah a sang pahnih an luah pha a, tling tawh Iran hnung an zui.
Al Nahyan Stadium, Abu Dhabi, United Arab Emirates-a inkhelah Uzbekistan goalkeeper Utkir Yusupov a langsar a, second-half chhungin ‘save’ pawimawh a nei mawlh mawlh a, chu chuan an lama goal lut tur chhanhimin, qualify tura an mamawh tawk point khat an thawkchhuak a, kum 1991-a Soviet Union atanga an indan hnuah a vawikhatna atan World Cup an khel ve dawn ta a ni.
Fifa world ranking-a 57-na Uzbekistan ramah hian mihring maktaduai 36 chengin, Soviet Union an chhuahsan hnuah June 1992 khan mahnia ro inrel ni chungin a vawikhatna atan international match an khel a, kum hnih hnuah world governing body Fifa pawmpuina an hmu.
Tunhma lama Uzbekistan-in World Cup an thlen teuh ber tum chu qualifying campaign sawi hlawh tak nei kum 2006 kha niin, Asian Football Confederation aiawha Concacaf lam mi Trinidad and Tobago hmachhawn tur zawnna two-legged playoff-ah Bahrain an hmachhawn a, a chak zawk zawk hi Germany rama World Cup khel thei tur an ni.
Uzbekistan lam hi sikhat faiin first leg-ah chak mah se refereeing dik lo palh avangin Fifa chuan kha match kha a bul atanga khel tha leh turin thupek a chhuah a, tah chuan away goal dan hmangin an tlawm.
Uzbeks hian kum 1996 atang khan Asian Cup finals erawh an la khel pha zat zat thung a, kum 2004 atang khan he tournament knockout phase an pel ziah a, chu’ng zingah chuan 2011 semi-final leh nikumah quarter-final an lut bawk.
Jordan ve thung
He west Asian ram hian Ningani zan vek khan Ali Olwan hat-trick hmangin Oman lakah 3-0 hnehna an chang a, mahse, he point thum hian Jamal Sellami team hi nakkum World Cup khel turin a la hruai thleng zo mai lo a, AFC Qualifiers Group B qualifiers lama Iraq leh South Korea inkhel an ngaihchan a ngai a, Basra International Stadium-ah sihnih faiin Korean-ho an chak a, chu chuan Jordan lawmna a thlen zui ta a ni.
Asian Cup runners up Jordan hi world number 62-na niin, kum 1986 kha World Cup qualifiers an khelh tan kum niin, tun hi an vawi sarih qualifiers khelhna chiah a ni.
Tunhma lama an tlin teuh ber chu kum 2014 intercontinental play-off match-a Uruguay in 2014 an hneh loh kha a ni.
South Korea chakna goal hnih hi second half-a Kim Jin-gyu leh Oh Hyeon-gyu thun niin, 10-man Iraq hnehtu Hong Myung-bo team hian Group B atangin nakkum tournament khel turin an dinhmun an sawhnghet.
Uzbekistan leh Jordan hi United States, Canada leh Mexico rama ram 48 inelna tur tournament khel tura tling thar pariatna leh pakuana niin, South Korea chu tling 10-na an ni thung.
Tournament thleng tur ram pathumte hi tlingsa an ni a, anni hma chiah hian Japan, New Zealand, Iran leh Argentina-te chu tling hnuhnung an ni.
Result dang neuh neuh
Australia chuan Perth Stadium, Perth-a AFC Qualifiers Group C match-ah sikhat faiin an mikhual Japan an hneh a, goal awmchhun khungtu hi Aziz Behich niin, Australia hi la tling chiah lo mah se an hnaih tawh hle a ni.
Musab Al-Juwayr leh Abdulrahman Al-Obud goal hmangin Saudi Arabia chuan Ningani inkhel dangah 2-0-in Bahrain an hneh a, Riffa khawpuia an point thum hmuh hmang hian Saudi-hoin Australia tlin lawm tur an la dangbet hram hram a, mahse, Tony Popovic-a team hian point thuma an kalsan Saudi Arabia nena khaikhinin goal difference an nei chhah hle zawk a, tling tawh Japanese-ho hnungzuia pahnihna luah chunga tling ve turin Australia dinhmun hi a la tha zawk tho tho.
Indonesia pawhin beiseina la vawngnung ve zel turin China lakah 1-0 hnehna an sualchhuak a, Branko Ivankovic-a team Chinese-ho tan erawh beiseina a zo.
Indonesia chakna goal awmchhun hi 45th-minute penalty kaltlanga Ole Romeny chhuihluh niin, Jakarta khawpuia an hnehna sualchhuah hmang hian mualneitu Indonesia chuan Group C lama pathumna emaw palina luah chunga round sang zawk kai beiseina an la nei thiang.
Tamer Seyam leh Wessam Abou Ali-te goal hmanga mualneitu Kuwait laka 2-0 hnehna chang Palestine pawhin Group B-ah beiseina an la thlah bik lo a, an point thum hlawhchhuah hmangin Ihab Abujazar-a team hian palina inchuhah point khatin Oman an pha lo.
Riyadh khawpuia North Korea nen 2-2-a an inhnehtawk avangin Kyrgyzstan chuan fourth round luh beiseina an hloh fel thung.
Qualifying group pathuma a sang pahnihte theuh hian automatic-in nakkum World Cup an khel pha dawn a, pathumna leh palinain hmunruak pahnih la awm beisei zui turin October thla fourth round inbeihna an hmachhawn leh ang.
World Cup qualifying thlirna
Khawmualpui hrang hrang atanga nakkum World Cup khel tura tling thei zat leh an tlin theihna kailawn thenkhat thlir ila.
South America
Team paruk an tling thei a, chu bakah intercontinental play-offs kaltlangin hmunruak pakhat luah khah theih tur an la nei cheu bawk.
Tun dinhmunah South America khawmualpui atang hian tling chiang tawh pakhat chiah an la awm a, chu chu Argentina a ni.
South American qualifying group hi a lian fal nalh a, team 10 awmin, September 2023 atang khan nakkum World Cup khel tur zawnna hi an tan a; table-a a sang paurkte chu World Cup khel turin automatic-in an tling dawn a, tarlan tawh angi, pasarihna chuan intercontinental play-offs an khel ang.
Game 18 khelh tura match li hmabak la nei chungin Argentina an sang ber a, an hnuaiah Ecuador, Uruguay, Brazil, Paraguay leh Colombia awmin, anniho hi top six luahtute an ni mek a, pasarihna chu Venezuela an ni.
Asia
Team pariat an tling dawn a, intercontinental play-offs hmangin chance pakhat an la nei bawk.
Tun dinhmuna tling tawhte chu Japan, Iran, Uzbekistan, South Korea leh Jordan-te an ni.
Asian qualifying hi October 2023 khan an khel tan a, ranking-a hniam hniamin an khel hmasa.
Japan, Iran, Uzbekistan, South Korea leh Jordan-te hnungzui thei hnaivai ber Australia chu automatic qualification spot chang thei hnuhnungber ni turin an dinhmun a tha.
Africa
He khawmualpui atang hian pakua an tling dawn a, pakhat tan intercontinental play-offs dah a ni.
Tun dinhmunah tling an la awm lo a; World Cup qualifying-ah hian group pakua awmin, African group tinah hian team paruk zel an awm a, November 2023 atang khan qualifying khelh tan a ni.
Goup tina a sang ber theuhin automatic-in nakkum World Cup an khel thei dawn a, game li khelh tur la awmah tun dinhmuna group tina hmahruaitute chu Egypt, DR Congo, South Africa, Cape Verde, Morocco, Ivory Coast, Algeria, Tunisia leh Ghana-te an ni.
Runners-up sang zual palite chuan play-offs an khel dawn a, anni hian intercontinental play-offs hmun an inchuh dawn a ni.
North, Central American
and Caribbean
A thlengtu ram pathum telin team paruk an tling thei dawn a, hei bakah hian intercontinental play-offs kaltlangin chance pahnih an nei bik bawk.
Tun dinhmunah nakkum tournament thlengtu tur USA, Canada leh Mexico-te chu co-hosts nih manah qualifying khelh buai ngai loa tlingsa an ni.
Europe
He khawmualpui hi kum dang ang bawkin team thawhhlawk ber an ni leh dawn a, nakkum tournament-ah hian ram 16 an inlan dawn a, tun dinhmunah tling an la awm lo.
Group 12-ah an inthen a, group tina a sang ber theuh an tling phawt ang a, a dang runners-up team 12-te bakah Uefa Nations League group winners zinga a sang zual palite chuan play-offs kaltlangin hmunruak dang pali la awm an chuhho dawn a ni.
Europe hi khawmualpui hrang hrang zinga intercontinental play-offs khel tur team nei lo awmchhun an ni.
Tun thlenga tling an la awm loh chhan hi kumin March thla atanga an khelh tan chauh vang niin, team thenkhat chuan kumin September thla herchhuah hma chuan an qualifiers match hmasaber an la khel dawn lo lehnghal a, Nations League erawh chhunzawm zel a ni ang.
Group inelna hi November-ah zoin, March 2026-ah play-offs an khel ang.
Oceania
Anni hian team pakhat an thawh chian bal dawn bakah intercontinental play-offs kaltlangin pakhat dang an inhnawhlut thei dawn.
Tun dinhmunah Oceania qualifying hi zo tawhin, New Zealand an tling a, final-ah sithum faiin New Caledonia an hneh.
New Caledonia hi tuipui rala French-ho ram awp niin, intercontinental play-offs hi March 2026-a khelh tur a ni dawn a, tah hian Africa, Asia, South America leh North America atangin team an inlan ang a, team paruk atangin pahnih an tlang dawn a ni.
-- Advertisement --
Tling tawhte bihchianna
UNITED STATES
Tlin dan: Thlengtu nih vanga tling
Best performance: Third place (1930)
MEXICO
Tlin dan: Thlengtu nih vanga tling
Best performance: Quarter-finals (1970, 1986)
CANADA
Tlin dan: Thlengtu nih vanga tling
Best performance: Group stage (1986, 2022)
JAPAN
Qualified on March, 20.
Best performance: Round of 16 (2002, 2010, 2018, 2022)
NEW ZEALAND
Qualified on March, 24.
Best performance: Group stage (1982, 2010)
IRAN
Qualified on March, 25.
Best performance: Group stage (1978, 1998, 2006, 2014, 2018, 2022)
ARGENTINA
Qualified on March, 25.
Best performance: Winners (1978, 1986, 2022)
UZBEKISTAN
Qualified on June, 5.
Best performance: Tunhma lamain la tling ngai lo.
SOUTH KOREA
Qualified June, 5.
Best performance: Fourth place (2002)
JORDAN
Qualified June, 5.
Best performance: Tunhma lamain la tling ngai lo.