Mizoram Open Taekwondo Championship

On Mar 23, 2026 13 0

Mizoram Open Taekwondo Championship
Ni thum awh Mizoram Open Taekwondo Championship vawi 19-na chu Khawzawl Vengthar Hall-ah karliamta khan khelh zawh niin, champion lai leh a thlengtu ni bawk Khawzawl District Team kutah champion no mawi a lut chawi nawn leh.
Champion team khawzawl hian gold medal 16, silver 17 leh bronze medal 41 lain, point 3,590 an hmu a; anmahni hnaih bertu Sports Authority of India kutah gold 16, silver paruk leh bronze pathum lutin point 2,280 nen runners up team trophy an chawi.
Point 1,860 hmutu Electric Veng Aizawl Taekwondo Academy chu pathumna niin, Best Fighting Spirit Team Nomawi an dawng bawk.
Hnamte Taekwondo Club Venghnuai chuan point 1,380 hmuin Most Promising Team no mawi an chawi a; Armed Veng South Taekwondo Academy hnenah Best Discipline Team no mawi hlan a ni ve thung.
Title ngaihhlut hlawh Champion of Champions (CoC) 2025-26 Title zawnna buatsaih nghalah Mizoram Official Championship leh Mizoram Open Championship-a gold medalist ve vete’n he title hi an inchuh a; mipa inelnaah champion lai Vanlalmawipuia (Venghnuai) chuan final-ah Vanrohlua (Lunglei SAI) hnehin a vawi rukna’n CoC title a la leh a. CoC Title la tam ber niin Mizoram record thar a siam.
Hmeichhe lamah Esther Lalchhanchhuahi (Kolasib) chuan PC Lalduhawmi (Ramthar North) hnehin a vawi khatna’n CoC title a hlawhchhuak ve bawk.
Mimal lawmman dangah VL Remsiama (SAI) leh Esther Lalchhanhimi (Kolasib DATA)-te chu Best Poomsae Perfomer atan thlan an ni a; Lalrindika Zote (Armed Veng South) leh Esther Lalchhanchhuahite chu Best Kyorugi Fighter atana thlan an ni thung.
Championship kharna inkhawm hi Khawzawl DATA president FK Vanlalhriata’n kaihruaiin, MATA technical secretary Lalinpuian championship report a pe a; Khawzawl DATA finance secretary C. |hahleikapa’n lawmthu sawina hun a hman hnuah MATA general secretary Master Joseph Thansanga’n fuihna thu sawiin championship a khar.
Mizoram Open Champoinship-ah hian district pakua – Aizawl, Khawzawl, Lunglei, Lawngtlai, Siaha, Champhai, Kolasib Mamit leh Serchhip atangin team 19 an chhuak a, player 480-te’n championship hi an inchuh a ni.

Top Ten Team Ranking

Pos. Team G S B Point

1. Khawzawl DATA 16 17 41 3590
2. SAI 16 6 3 220
3. ATA, Electric Veng 13 4 5 1860
4. Hnamte TC, Venghnuai 9 4 5 1380
5. Armed Veng South TC 6 5 7 1010
6. TABF Vaivakawn 5 5 4 930
7. Mamit DATA 4 4 6 800
8. Lawngtlai DATA 3 5 4 690
9. Champhai DATA 2 4 11 660
10. Serchhip DATA 3 3 8 670