2026 FIFA World Cup Opening Ceremony a hmuhnawm
2026 FIFA World Cup chu Ningani zan khan Mexico-ah opening ceremony neiin, game an khel tan ta a, nizan khan USA leh Canada-ah pawh opening ceremony hi an nei ve leh bawk a ni. Mexico opening ceremony-ah hian kumin World Cup offifial theme ‘Dai Dai’ hla satu Shakira leh Burna Boy te an inlan a, anni bakah hian zaithiam dang inlan zingah J Balvin leh Tyla te pawh an tel a, Hollywood star Salma Hayek Pinault pawhin inlawmna thu a sawi bawk e.
Mexico City-a Estadio Azteca-a mipui 87,000 vel zet pungkhawm te hmaah Shakira leh Burna Boy te hian kumin tournament official song “Dai Dai” an perform a, Shakira hi body suit eng inbelin, sunglass nen a rawn chhuak a, backup dancer rualin an tawiawm bawk a, Shakira hian a kawng bawr han thin siksawi dan vel a la theihnghilh lo tih a chiang e.
Opening ceremony-a a perform zawh hnuah Sakira hian a Instagram Stories-ah, “He 2026 World Cup hian remna leh muanna thlenin, khawvel hmun tinah inpumkhatna a awm theihnan a bul tanna ni teh se,” a ti a, naupang ten zirna tha zawk dawng a, an dam chhung an hmachhawnna tura remchanna tha zawk an neih theih nana tan lak a pawimawh thu sawi telin, “Heng zawng zawng bakah hian kan champion naupang te remchanna nghak mek ten zirna tha zawk an dawng a, nun kawng tha an zawh theihna tur i ngaihtuah zel ang u,” a ti bawk.
Opening ceremony-ah chuan Hollywood star Salma Hayek Pinault pawhin fan-te lawmna thu sawiin, Gucci a rawn inbel chhuak a, Boucheron broach nen ding chhuakin, mipui lawm pawh a hlawh hle a ni. Mexican actress Salma Hayek hi tournament official ambassador atan an lo ruat tawh a ni.
KPop Demon Hunters film-a HUNTR/X tana aw thawhtu, zaithiam EJAE leh Italian opera singer Andrea Bocelli ten World Cup official anthem “DNA” an perform bawk a, football chu game a ni satliah mai lo, kan DNA a ni, an ti a ni.
South African singer Tyla pawhin South African national anthem a perform a, opening match-ah inkhel tur South Africa leh Mexico ni mah se Mexican fans lamin Tyla hi an lawm thiam hle a ni. Mexican zaithiam Alejandro Fernandez-a’n Mexico anthem a perform ve thung.
Hetihlai hian Mexico President Claudia Sheinbaum chu opening ceremony-ah hian an ram team ten opening match an khel dawn chung pawhin a inlan duh ta lo a, a ticket chu rampum huapa contest siamin Mexican football fan tleirawl pakhat hnenah a hlan ta zawk a ni.
He opening ceremony-ah hian Lila Downs, Jose Hernanzez leh Andolu, Mana, Danny Ocean, Los Angeles Azules & Belinda, J Balvin & Ryan Castro leh Alejandro Fernandez te pawh an perform.