2026 season hnu lam hmu pha tawh lo Hamilton!

On Nov 26, 2025 10 0

|um sarih ngawt Formula One world champion ni thei khawpa ropui British driver Lewis Hamilton chu a kumte a lo tam chho ve ta bawk nen tlankawngah a zuih chho ve ta zel a, season kal laiah pawh grand prix-a chak a la nei lo ni satliah mai loin lawmman semna dawhsan a la chuangkai zo lo a, kumin March thla China ram sprint race-a a chak tih loh chu chhuan tur a la nei lo a, Pathianni Las Vegas Grand Prix-a pariatna a hauh hnu khan 2026 Formula 1 season hnu lam chu a thlir pha ta lo tih a sawichhuak ve ta nge nge e!
F1 career kum 19-na kalpui mek Briton mihang driver hian kar liamta Las Vegas Strip Circuit intlansiakah khan point hniam ber hmu hram turin 10-naah a thleng zet a, technical thila dan bawhchhiatna avangin McLaren driver pahnih Lando Norris leh Oscar Piastri ‘disqualify’ an nih hlawkpuiin pariatnaah a tawlh chho leh ta hlauh zawk a ni.
Ferrari driver Hamilton khan Las Vegas race-ah khan points position hniam lam tal luah hram tumin race tawp lamah tan khawh na hle mah se medium tyre hmangin Sauber khalhtu Nico Hulkenberg a lehpel zo ngang lo a; tarlan tawh angin 10-na a ni pha tawk a, intlansiak zawha BBC Radio 5 Live-in an kawmnaah a tan race chhe mangkheng a nih thu sawi chungin, “Vawiin intlansiakah hian a eng zawnga han thlir zui tur eih ka nei lo,” a ti.
Hamilton hian a Formula One career khawih che tham tawngkam a chhakchhuak zui ta hial a, “Kan tlan leh tur hi ka tawpna tur ni tawh se ka ti takzet a, a hmawr bawk ve tawh ka duh a, hei bak hi chu a hnu lam zel ka thlir tawh lo,” a ti!
Amah kawmtu chuan Ferrari driver thusawi dan hi a man mai lo a, season kal lai race vawi hnih la awma a hmasa zawk Qatar-a tlan a tum tawh lo em ni tiin zawhna a zawt hial a, Hamilton hian a tawpna tur ni tawh tura a duh chu season thar zawk hi a nih thuin a hrilhfiah!
Ferrari team principal Frederic Vasseur chuan an team-a contract la nei lai Hamilton-a comment chungchanga a ngaihdan an zawhna chhangin, han so hlutna tur a awm loh thu leh muangchanga a la ngaihtuah tur thu a sawi a, khati ang race chhe zet a tlingtlak hnua a an driver chhawr lai ‘react’ dan kha a hriatthiampui thu leh hmabak pahnih an la neih lama insawrbing zui a ngaih avangin season thar hnu lam hmuh phak tawh loh chungchang kha chu ‘cool’ raiha la ngaihtuah chhunzawm chi chauh a nih thuin boruak a zapdai!
Hamilton hi drivers’ championship standing-ah parukna daih niin, pangana luahtu a Ferrari team-mate Charles Leclerc lakah point 73 zetin a hnufual tawh a ni. Kum 40 mi ni ve tawh veteran Hamilton hian kumin chhunga intlansiak vawi hnih an la neihah top three a luah zo lo tluang zel a nih chuan a F1 career-a ‘podium finish’ hlawhchhuak zo loa season a tluan hmasakber a ni ang.