2026 World Cup thunawi lawrkhawm: (A si ruk la kan lo thleng ta…) – Jipson S. Hrangate (AFC Referee)
(A si ruk la kan lo thleng ta…)
Saipui kal lai ang maia World Cup 2026 kal muah muah chu bul kan tan chauh emaw tih laiin a liam zung zung mai a, tunah hian league match 3rd phase kan lo thleng ta der mai a, chu chu a si ruk la a ni tawh ang.
He’ng match kaltlang hian ram/team engemawzat chuan round of 32 (knockout round) an inkapkai ang a, a then group stage-ah an tang hlen ang a, 3rd league match zawhah an puanthuah telin an haw thei tawh ang.
He thu buatsaih lai thleng hian point ruk hum tawh chunga knock out round hmasa ber R-32 lut chiang bal tawhte chu a thlengtu ram pahnih Mexico leh USA bakah defending champion Argentina, Germany, Norway, Colombia leh France-te an ni.
A dang zawng chu point 3/4 hmua la inkhai laklawh, midang khelh that leh that loha innghatte an ni hlawm a, chu chu zanina 3rd league match inkhel result hian a rawn hril chiang tawh dawn a ni.
League match thumna hi deciding factor kan ti thin bawk a nih kha.
Tlemin han chhuizau
deuh ila…
World Cup-ah hian 3rd league match hi a pawimawh em em a, ram (team) la him ve lote’n R-32 (hun hmasa lamah kha chuan R-16) an luh theihna tura gateway pawimawh tak a nih vangin he match-ah hian knockout round kai tura la inbeisei pha chingte hcu theihpalingkawh tak meuh, a si ruk laa an tan a ngaih tawh avagin an tang nasa thin reng a, inkhel pawh a hmuhnawm thin a nih kha.
Tin, point 6 hmu tawh, hahdam zawka awm thei tawhte tan pawh vawikhat chak leh zeuha solid point (9) hum chunga group champion nihna chance a nih avangin lut khat nazawng luhtir hum hum a rem lohna chen a awm thin bawk.
3rd league match hi R-32 luhna tura rahbi pawimawh tak a nih avangin team thenkhat, football-a lo inhmelma deuhte leh hlemhletna ti duh tan chuan trick a hai theih ve tlat !
Knockout round kaisate chuan a la kai ve lote paihthlakna leh vawrhkaina turin an team khingpuite chu hneh lo lui/hneh luiin team dangte chu an vawrh thlain, an vawrh kai thei tlat a, hei vang hian group league match thumna inkhelh hun (timing) chu inang vekin an dah thin a ni. Heihi team dangte point hmuh hriat hmasak lohna’na tih a ni.
3rd league match hi hmanah kha chuan a rual vekin an play ngai kher lo a, amaherawhchu, 1982 WC-ah khan venue pakhat ‘Gijon’ an tihah chuan thil duhawm lo tak mai a thleng a.
West Germany, Austria, Algeria leh Chile-te chu group khatah an awm a, anni zingah hian induhsakna leh inthiktawnna a lo pian avangin team pakhat chuan a team duhsak zawk chu a hneh loh luih avangin knockout round-a lut tur team pakhat chu an vawrh thla ta vang vang mai a n!
He thil thleng runthlak zet hian a tla ram mai bakah WC thlirtute rilru a ti na em em a, chuvangin kha thil thleng kha ‘the disgrace of Gijon’ an tih phah ta hial a, vawiin thlengin pan ser reh thei lo a la nei reng!
He thil hi khatih laia FIFA president Joao Havelange khan pawi a ti em em a, infiamna thianghlim taka khati ang hlemhletna tenawm takin World Cup ngei maia hlet a chhuah kha a ngaimawh takzet a, chu thil chin tha lo zet mai chu WC lehpek hmaa tihbo/nuaibo ngei tumin hma a la zui ta a ni.
Point inkhilai a awm tawh lohna’n 1986 WC atang chuan 3rd league match-te hi group tinin point an inhriattawn lohna’n a rual veka khelhtir a lo ni ta a ni.
Zanin atanga fixture kan en chuan heti ang hian kan hre thei awm e – dar 12:30 am-ah chuan Switzerland vs Canada leh Qatar vs Bosnia Herz-te’n an khel ve ve ang a; zing lam dar 3:30-ah Morocco vs Haiti leh Scotland vs Brazil an chechhuak ve thung ang.
Zing dar 6:30-ah South Africa vs south Korea leh Czechia vs Mexico-te’n khelmual an lut rualho tham tham ang a; he ti ang zel hian group tina mite chu timing inang veka an khelh dawn avangin inkhel pawh kan en kim thei dawn lo niin a lang.
TV broadcaster-te’n timing hranin adjustment an rawn siam lo a nih phei chuan chuan group khata match hnihte hi a rualin kan en thei dawn lo a, a pawi khawp mai.
Match hnih enna’n hian kan hmaah TV pahnih hung ta ila, kan mitin a tuar dawn lo a, mood pawh a fuh lo ang!
TV lamin an live loh match pakhat zawk zel hi a hnu lamah highlight emaw repeat emaw en dawn ni ila, a result internet/mobile etc. atanga kan lo hriat tawh hnu han ennawn leh kha chaw thing herlum chawp ei ang lek a ni tawh dawn a, a mood-ah a chen tak tak theih tawh loh ang!
He thil chungchanga WC 3rd league match-te kim taka kan en theih lai Italia 90 WC kha a ngaihawm ta hle mai.
Khami kum World Cup-ah khan TV telecaster DD Sports chuan match hnih zinga pakhat kha a lo record thlap a, match pakhat khelh zawh hnu reiloteah a recorded zawk kha a rawn tichhuak zui leh ta vat thin kha a ni a, live ang maiin en loh zawk match a en zui leh nghal vat theih a, kan nihlawh teh a nih kha!
Kha tih lai hun khan tunlaia internet, mobile etc. tih ang kha a la awm loh avangin result hriat sa a awm thei lo a, TV kha telecaster-te’n an control vek vang kha a ni.
Kha thil rawn tichhuaktu mi pawimawh em em chu India rama football expert Novi Kapadia kha a ni.
Italia ‘90 lai khan Rome khawpui leh India ram a kartawn a, WC viewer-te’n World Cup match kim taka kan en theihna’n Doordarshan kaltlangin a rawn chhawpchhuak a, a ti tha thlawt mai!
Tunlaia WC match pechhuaktu TV broadcaster-te hian kha ti anga tih nachang an hre tawh lo hi a pawi khawp mai! Lo hria pawh ni tehreng se internet, mobile etc. an awm tawh tlat a…
Comment lamn hawi ang
2nd match-a Mexico vs South Korea kha an inkhel a mawiin, a hmuhnawm khawp mai.
South Korea kha pumruaah an te zawk na a, stamina leh skill chu an tlachham bik lo tawp.
Hun tawp tepa Korea striker-in crossing ball heading-a a miss kha a uiawm khawp mai.
Khati ang heading-ah khan ball-in ground zu tauh ting kher lo zawngin mahni hma zawnah straight header-in na taka tauh luh mai tur a ni a; khati ang style kha chu space zau tak awmna hmuna tih chi chauh a ni.
France vs Iraq kan thlirliam taka Mbappe goal hnihna thun kha defender-in 6 yards box chhunga keeper a pass inkhakper vanga thil thleng a ni a; khati ang kha football tawng chuan ‘reckless passing’ kan ti thin.
Khati anga ‘near at home’ passing kan tih dawn chuan attacker an awm hnaih leh hnaih loh ngun taka thlithlai phawt tur a ni.
Tun hma khan chuan 18 yards box chhungah goal kick release-a in pass phal a ni ngai lo a, tun lai hian an rawn ching thar leh ta a nih hi.
Argentina vs Austria game-a Argentine coach Scaloni-a’n senior player-te lachhuaka player ruh la no zawk, rawlthar lam a rawn tirlut kha a tisual teuh khawp mai.
Khati ang, si khat fai chauha hma la hruai hun, dinhmun derthawng takah khan senior player leh tawnhriat la nei tlem zawk player exchange tih hian kan fimkhur hle a tul thin.
Player hmel thar zawkte leh an thiampuipa Lionel Messi combination kha a hma ang khan a fuh lem lo a; Messi kaltlanga assist tha tak an hmuhte kha sure goal kan tih thin ang thawthang ni mah se goal-ah an chantir thei chuang lo a, amah, Messi bawkin finishing buaipui leh nge nge a ngai a, kha match-a khan Messi kha awm lo chiah se lang chuan Argentina khan tun dinhmun hi an thleng kher lo ang!
Khami nia Egyptian referee khan positioning a hre lo hle! Player-te’n danger zone (18 yard box) an thlen dawn leh thlen hnua short passing an tih laite khan assisted palyer-te hma/hnungah a lo ding buai (obstruct) thin a, player-te tan a buaithlak thin hle a nih kha!
Khati ang hunah khan referee chu player-te sir lamah a awm tur a ni. Tin, danger zone-a free kick a pek lai khan free kick chhuihtu hnunga a ding tlat pawh kha a dik lo hle bawk.
Khati ang free kick hunah khan referee chu ball rawn thlawk phei landing tur goal ban hnai deuh 18 yards box kil lamah a lo awm thin tur a ni.
Tun tuma Argentina fans zinga upa ber chu Pi Pauline Kana, kum 100 zet upa a ni! A la harhvangin, a la in fit zak zak hle mai.
Champion lai Argentina hi khawvela fans ngahber pawl an ni. Khawvel hmun tin leh ram tinah he’ng fan-te hian kawng zawh hlimawm tak an kalpui mup mup thin.
Points Table
GROUP A:
Team Play Win Draw Loss GF GA GD Pts.
Mexico 2 2 0 0 3 0 3 6
Republic of Korea 2 1 0 1 2 2 0 3
Czechia 2 0 1 1 2 3 -1 1
South Africa 2 0 1 1 1 3 -2 1
GROUP B
Team Play Win Draw Loss GF GA GD Pts.
Switzerland 2 1 1 0 7 1 6 4
Canada 2 1 1 0 5 2 3 4
Bosnia-Herzegovina 2 0 1 1 2 5 -3 1
Qatar 2 0 1 1 1 7 -6 1
GROUP C
Team Play Win Draw Loss GF GA GD Pts.
Brazil 2 1 1 0 4 1 3 4
Morocco 2 1 1 0 2 1 1 4
Scotland 2 1 0 1 1 1 0 3
Haiti (E) 2 0 0 2 0 4 -4 0
GROUP D
Team Play Win Draw Loss GF GA GD Pts.
USA 2 2 0 0 6 1 5 6
Australia 2 1 0 1 2 2 0 3
Paraguay 2 1 0 1 2 4 -2 3
Turkey (E) 2 0 0 2 0 3 -3 0
GROUP E
Team Play Win Draw Loss GF GA GD Pts.
Germany 2 2 0 0 9 2 7 6
Ivory Coast 2 1 0 1 2 2 0 3
Ecuador 2 0 1 1 0 1 -1 1
Curacao 2 0 1 1 1 7 -6 1
GROUP F
Team Play Win Draw Loss GF GA GD Pts.
Netherlands 2 1 1 0 7 3 4 4
Japan 2 1 1 0 6 2 4 4
Sweden 2 1 0 1 6 6 0 3
Tunisia (E) 2 0 0 2 1 9 -8 0
GROUP G
Team Play Win Draw Loss GF GA GD Pts.
Egypt 2 1 1 0 4 2 2 4
Iran 2 0 2 0 2 2 0 2
Belgium 2 0 2 0 1 1 0 2
New Zealand 2 0 1 1 3 5 0 1
GROUP H
Team Play Win Draw Loss GF GA GD Pts.
Spain 2 1 1 0 4 0 4 4
Uruguay 2 0 2 0 3 3 0 2
Cabo Verde 2 0 2 0 2 2 0 2
Saudi Arabia 2 0 1 1 1 5 -4 1
GROUP I
Team Play Win Draw Loss GF GA GD Pts.
France 2 2 0 0 6 1 5 6
Norway 2 2 0 0 7 3 4 6
Senegal 2 0 0 2 3 6 -3 0
Iraq 2 0 0 2 1 7 -6 0
GROUP J
Team Play Win Draw Loss GF GA GD Pts.
Argentina 2 2 0 0 5 0 5 6
Austria 2 1 0 1 3 3 0 3
Algeria 2 1 0 1 2 4 -2 3
Jordan (E) 2 0 0 2 2 5 -3 0
GROUP K
Team Play Win Draw Loss GF GA GD Pts.
Colombia 2 2 0 0 4 1 3 6
Portugal 2 1 1 0 6 1 5 4
DR Congo 2 0 1 1 1 2 -1 1
Uzbekistan 2 0 0 2 1 8 -7 0
GROUP L
Team Play Win Draw Loss GF GA GD Pts.
England 2 1 1 0 4 2 2 4
Ghana 2 1 1 0 1 0 1 4
Croatia 2 1 0 1 3 4 -1 3
Panama 2 0 0 2 0 2 -2 0