2026 World Cup thunawi lawrkhawm: (Tun tournament-a hman nghal dan thar hrut tel hlek ang)
World Cup 2026 kal mek chu tum khatah match 4 lai khelh zawm a nih vangin hriat loh hlanin a kal liam zung zung mai!
Keini lamin TV-a kan thlir hun hi zanlai pelh vartian leh zingkarahte an nih hlawm avangin en kim a harsa khawp mai. Football tui mi hrim hrimte tan lo phei chuan match zawng zawng phei chu en kim theih chi pawh niin a lang lo, a chhan chu kan mit leh taksain a zo dawn lo niin a lang.
Chutih laiin, World Cup hi khawvela game ropui ber leh kum 4 dan chauha thleng thin a nih miau avangin football tui mi leh ngaina mi tan chuan a hlu em em a, han hmaih chi rual a ni bawk si lo. |hahnemngai takin kan bei zawm zel a ni ang chu.
Aw le, chuti lam chu duhtawk phawt ila, inkhel lam ilo thlir chhunzawm teh ang.
Group match-a round khatna chu khelh zawh tep a lo ni ta a, zanin hian Group K leh L an khel zo ang a, tah chuan mite’n champion tura an rin zinga tel Portugal chu chak turin han ring phawt ila, a dawttuah Colombia.
Tin, group L-ah hian European powerhouse ve ve England vs Croatia an ni dawn a, an inchhu nasa bep bep kher ang.
He team pahnihte hi 2018 WC-ah khan an lo inbei ngial tawh a, Croatia hian 2-1-in England an tlawm der mai kha a ni a, 2026 WC-ah hian English-ho hian phuba a rawn la ang em tih kan thlirho leh dawn a ni.
Zanin, June ni 18 zan hian group match thawh hnihna pawimawh em em mai chu khelh tan leh a ni ang.
Hemi match-ah hian tuna first match khelh chhuah diat diata point la hmu ve lote leh draw vanga point khata la ding leu leute tan nasa taka tan a ngai tawh dawn a, a chhan chu point la hmu ve lo ho hian an lost leh vaih chuan an tan round of 32 luh ngaihna a awm tawh dawn loh vang a ni a, point hum hmasate erawh kha chu vawi khat chak leha point ruk hmuin R-32 an lut ang a, an draw erawh chuan an dinhmun a la derthawng deuh ang.
A chhan chu tun tum R-32 atana a sisepthlakah hian group 1 atangin team pathum an lak dawn avangin goal difference a pawimawh em em dawn a ni.
Tun tum group first round match-a sawi hlawh ber pawl chu Germany-in 7-1 tehrenga Curacao an sawp kha a ni.
Germany hian an khingpuite an hneh vek vek tawh chu an hnehsawh thin em em a, an ba hel nuai mai thin a n!
Kum 2014-ah pawh khan a thlengtu Brazil chu 7-1 bawkin semi-finallamah an lo sawp tawh bawk.
Tun tuma Curacao an hnehna score margin khan tun tournament tawp thlengin ‘a ber’ a hauh hial mai thei a ni.
Khawvela World Cup awm tawh zawng zawnga score margin sang ber la ni reng chu 1982 World Cup-a Hungary-in 10-0 ngawta El Salvador an sawp tum kha a la ni reng.
Curacao ram kha ram tereuh te a ni a, 171 sq miles bial leka zau niin, a ram chunga mihring chengte pawh mi nuai khat leh a chanve vel chauh an ni.
Heti ang khawpa ram tenau ni mah WC-a an qualify theih chuan keini ram zau tak mai India hi World Cup-a qualify ve ngei tumin tan ila nasa ang u!
Sawi hlawh dangleh pakhat chu European Powerhouse Spain-in a vawi khatna atana WC khel pha ve chauh Cape Verde an inhnehtawkpui ringawt kha a ni!
Lo in draw pawh ni se Spanish-hoin vawikhat em pawh goal an thun zo lo khan mak tih a hlawh a, a lehlamah Cape Verde khan Fifa tournament lian ber an khelh vawi khatnaah chak tumin an khel lo a, goal thun kha an policy lian ber a ni hek lo a, record break an tum lutukna lamah tlarhnung ven bak ngaihtuah an nei lo emaw tih tur niin, solid defence an apply bur mai a nih kha!
Cape Verde kha chuan 0-0 draw hmanga point khat hum hmuh kha an hlimpui tawk ve em em mai a, an thil tum an hlawhtlingah an inngai ve tlat. Kan lawmpui e.
Group I France vs Senegal-ah khan Senegal-ho record hlui, France defending champion an nih lai, 2002 WC first match-a sikhat faia an surprise ang kha ni tawh loin France hian 3-1-in a sawp let ve ta.
Goal hnih a thun hnuah Mbappe khan hat-trick puitlin law law tum em em mah se hunin a daih ngang tawh lo a nih kha!
Tin, hun rei tak WC rial san vang vang hnua lo lang leh hlawl Norway chu Manchester City superstar Haaland-a ho ngei maiin an rawn che tha zek mai!
Norwegian-ho hian hun rei tak World Cup atanga pil vang vang Io lang leh Iraq chu 4-1-in an sawp a; Haaland chuan hat-trick siam tep mah se a thiante a kian ta zawk a ang khawp mai!
Aw le, hat-trick sawi takah chuan, tun tum WC hat-trick hmasaber chu group tina star player hoin June ni 17 thleng khan tu mahin an la siam loh laiin defending champion ni lai Argentina-ho thiampuipa mi hrang Messi ngei mai chuan African football giants ni pha ve thin Algeria lakah a rawn siam er leh zawk a, 3-0-a an chakna goal kha a thun vek a ni!
Hemi goal thum fai hi Messi chuan a pumbilh a, tun tum WC-a hat-trick hmasaber siamtu leh an team chak lawmin khawvel hmun tina Argentina fans chu kawtthlerah an so leh bulh bulh a, an rawn chetthat zawm zel kan beisei hle.
Tun WC chu sawi tawh angin USA-a khelh bikte chu baseball & rugby stadium-a khelh an nih hlawm avangin a field a seiin, a zau em em a, short pass positioning han apply chang pawhin fimkhur a ngai hle a ni.
Coach leh player-te’n hemi hi hrethiam chunga tactic siamrem leh thlakthleng thiam a pawimawh hle ang.
Argentina pawh kha a tir kha chuan an han buai deuh nek nek hman dawn a, amaherawhchu, an tactic an rawn thlak tak avang khan an play a kal tluang chauh a nih kha.
Tun tum WC-a IFA Board lamin February 2026 thlaa dan thar an rawn an rawn siamte a tawi thei ang berin han bihchiang pah zawi zawi ila:-
1. Throw in countdown (5 secs)
Ball chhuak thehluh (throw in) tur hian second 5 chhung hun pek a ni ang a, player-in tum reng vanga hun a khawhral a, second 5 a pelh hnu chuan an khingpui team-te’n throw in hi an chang daih ang. Hei hi ‘reverse throw in’ an ti bawk.
He law hi an lo hmang tawh thin a, chutih laiin chuti ang offence chu warning whistle pek emaw yellow card-te a ni thin.
‘Law of 6 seconds’ tih a ni thin a, chu mi law-in a huam tel zawng chu keeper-in ball a ken theih chhung (6 secs) te, free kick & penalty pet tura inpuahchah chhung etc. an ni hlawm.
2. Goal Kick count down % secs
Hei pawh hi % secs chhunga defender-in emaw goalkeeper-in emaw goal kick a rawn pet chhuak tur minute 5 chhung a khawhral tlin chuan an khingpui team-te kutah corner kick pek daih a ni ang.
3. Substitution 10 secs
Player inthlakthleng hunah thlakthleng a awm (substituted player) chuan substitute bench pan kher loin a hnaihna berah field a chhuahsan tur a ni a, second 10 chhunga field a chhuahsan hman lo a nih chuan amah thlaktu tur player chuan minute khat chhung hremna tawkin, field chhung a la lut theih rih lo ang a, chu mi chhungin a team-mate te chuan player 10-a an lo khel rih ang.
4. Field pawna inbawisawm 1 minute
Physiotherapist or team doctor-in hliam tuar player an bawisawm chu minute khat chhung field pawnah a awm ngei tur a ni.
Keeper inhliam chungchangah erawh chuan ngaihnathiam a ni ang.
5. Ka huh khap
Lungawilo nia lang player-in a ka a hup chuan red card thleng pek theih a ni.
He thil hi player-in hmui phun lang lo tura ka hup chunga hmuhsitna leh chi inthliarhranna (racism) tawngkam hmanga player, referee leh official-te an tawng khum thin venna tur a ni a, chhuichian an nih hunah an ka an hup tlat vangin an thil sawite chhuichhuah a harsat thin vangin he dan hi an duang chhuak ta a ni.
6. Corner kick endik thei
Corner kick dik taka pek a nih leh nih loh VAR-in a en thei ang a, mahse, inkhelh chunzawm hmain rang taka endik tur a ni.
Argentina vs Algeria match-ah khan half time dawn tepa Algeria player-in corner a pet dawn khan corner kil one yard radius line chhunga ball dah loin line pawna dahin a pet a, linesman-in a ngaihsak lo tawp mai.
Corner pet dawn hian linesman chuan corner pettu turin ball a dahna chu strict takin a enkawl tur a ni.
7. Yellow card pahnihna ennawn theih
Yellow Card pahnih hmuh vanga player sent off tur chu an yellow card pahnihna offence chu VAR hmangin endik theih a ni.