2036 Olympics thlen tum India!
Pathianni khan Nassau Coliseum arena, Long Island, New York state-a ram pawna cheng Indian-te hmaa thu a sawi tumin prime minister Narendra Modi chuan kum 2036 Olympic Games thleng thei turin India chuan a theihna zawng zawng a hmang dawn tih a sawi.
Kan hnung lawk khan bronze panga leh silver pakhat nen belhkhawma medal paruk lain India chuan Paris 2024 Olympics a khar a; Paris Paralympics 2024-ah thung erawh kha chuan India chuan Paralympic Games awm tawha a chetthat ber hun tawngin medal 29 a hui a, chu’ng zinga pasarih chu gold medal niin, silver pakua leh bronze medal 13 a tel bawk.
Khawvel huap infiamna kutpui lian ber la thleng ve lo India chuan Summer Olympics a thleng ve ngei tur a ni tiin PM Modi chuan saprama a zinna hmunah a sawichhuak a, “Ni reilote liamtaah khan Paris Olympics khar a ni a, nangni pawhin India leilungah ngei Olympics hi in la chhim ve dawn. 2036 Olympics thleng tura tih theih kan neih zawng zawng nen ke kan pen mek a ni,” a ti.
Nikum pawh khan Modi hian khawvel huap sports intihsiak lian thleng tura India a chetchhuah tur thu hi a lo sawichhuak tawh a; Hangzhou khuaa Para Asian Games hlawhtling tak hmangzo hlim Delhi-a let India para-athlete contingent hmaa thu a sawi tumin a sawrkar chu infiammite lam hawi tlat (athlete-centric) a nih thu leh sporting culture, sporting society nihna lam hawia India-in ke a pen zel tur thu a lo sawi tawh a ni.
Prime Minister hian infiamna lam hawiin a ka a ang chhunzawm zel a, India chu sport bakah sumdawnna, environment hrim hrim leh entertainment thlengin khawvel hip theihna nei a nih thu leh khawvela cricket inelna hmui ber Indian Premier League (IPL) pawh khawvela league lian berte zinga mi a nih thu a tlangaupui dum dum.
Karliamta khan Union minister zinga huhang nei lian leh thiltitheiberte zinga mi Mansukh Mandaviya pawhin 2036 Olympics thleng thei tura India inbuatsaihna thu hi a lo sawichhuak ve tawh bawk a, Union Sports and Youth Affairs minister phei hi chuan kum 2047-ah chuan India hi khawvel sport-a a sang panga (top five sports nation) zinga teltir hman an tum thu a sawi hial nghe nghe!