21 Savage-a’n No.1 album pali a nei tling ta
21 Savage album thar ‘American Dream’ chu Billboard 200 (albums) chart No.1-ah a debut a, he chart-a No.1 kai thei album pali a nei tling ta. Hetihrual hian Kali Uchis pawhin he chart-a a thlen sân ber tum tawngin, a album thar ‘Orquideas’ chu No.2-ah a debut ve bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
21 Savage ‘American Dream’ hi kar khat chhungin US-ah 1,33,000 hralhin, chung zinga 1,28,500 chu streaming atanga album hralhna tlukpui (on-demand official stream maktaduai 169.53) niin, album tak tak hralh chu 4,000 a ni a, album-a hla mal hralhna atangin 500 a tling thei bawk.
American Dream hi 21 Savage album, he chart-a No.1 kai thei palina a nih bakah midang nena an album intawm ni lo, ama pual album-ah chuan kar khata a hralh that ber a la ni a, he album-ah hian hla 15 awmin, Metro Boomin, Doja Cat, Lil Durk, Travis Scott, Young Thug leh Summer Walker te guest artist niin an aw an thawh ve bawk.
Kali Uchis album thar ‘Orquideas’ chu 69,000 hralhin No.2-ah a debut a, Kali Uchis tan he chart ranking-a a thlen san ber a la ni a, a Spanish album pahnihna a ni bawk. He album hralhna hi 38,000 chu streaming atanga album hralhna tlukpui (on-demand official stream maktaduai 51.01) niin, album tak tak hralh chu 31,000 a ni bawk.
Chart No.1 hlui Morgan Wallen ‘One Thing at a Time’ chu 61,000 hralh lehin No.1 atangin No.3-ah a tawlh a, chart No.1 hlui bawk Drake ‘All the Dogs’ chu 52,000 hralh lehin No.2 atangin No.4-ah a tawlh a, chart No.1 hlui bawk Taylor Swift ‘1989 (Taylor’s Version)’ chu 50,000 hralh lehin No.3 atangin No.5-ah a tawlh ta bawk.
Noah Kahan ‘Stick Season’ chu 45,000 hralh lehin No.5 atangin No.6-ah a tawlh a, chart top 10-a lang album dang zawng chu No.1 lo ni tawh vek niin, Nicki Minaj ‘Pink Friday 2’ chu 44,000 hralh lehin No.4 atangin No.7-ah a tawlh a, Taylor Swift ‘Folklore’ chu 43,000 hralh lehin No.10 atangin No.8 a kai thar leh a, SZA ‘SOS’ chu 41,000 hralh lehin No.6 atangin No.9-ah a tawlh a, Taylor Swift ‘Lover’ chu 38,000 hralh lehin No.8 atangin No.10-ah a tawlh ta bawk.