3 Doors Down singer Brad Arnold stage 4 kidney cancer

3 Doors Down singer Brad Arnold stage 4 kidney cancer
3 Doors Down vocalist Brad Arnold chuan stage 4 kidney cancer a nei tih an hrechhuak, an band-in summer tour an neih tur pawh an thulh thu an puang nghal.
Mississippi chuak rock band 3 Doors Down singer leh drummer Brad Arnold chuan a natna chungchang hi social media-ah video clip post-in a puang a, “Vawiin chu chanchinthar lawmawm lutuk lo hrilh tur che u ka nei tlat mai,” a ti a, clear cell renal cell carcinoma a neih thu puangin, a chuap lamah te pawh a lo darh tawh a ni.
Arnold natna avang hian an band-in kar thar atanga summer tour neih an tum pawh an thulh thu an puang nghal a. Arnold chuan a natna avang hian a zam loh thu puangin, fan-te chu tawngtainaa lo hre turin a chah a, “Ka zam lo. Ka zam lo tak tak a ni. In remchan hun apiangah in tawngtainaah min lo telh thin dawn nia. Tunah chuan ‘It’s Not My Time’ tih hla ka ngaihthlak a ngai ve dawn a nih hi,” a ti.
‘It’s Not My Time’ hi 2008-a an group hla a ni a, a Instagram caption-ah Arnold chuan, “Tunah chuan ‘It’s Not My Time’ hi ka hla tur tak tak a niin ka hria. He inbeihnaah hian tawngtai lama raldo mi kan mamawh dawn a ni. Khawvela fans duhawm ber in nih avangin ka lawm e,” a ti bawk.
Arnold comment section lamah pawh milar tak tak an rawn lang nghal tuk tuk a, Creed member Scott Stapp chuan, “Hetiang inbeihna hmachhawn tura rinna leh chakna an awm a nih chuan, unaupa nangmah ngei hi i ni ang. Ka zavai aiawha sawi thei niin ka inhria, tunah pawh kan tawngtai pui reng che, i dam chhuah ngei kan ring tlat a ni,” a ti.
Gavin McGraw pawhin, “Unaupa Pathianin malsawm che rawh se. Eng hmanga thim hneh dan min entirtu i ni,” tiin a comment a, Jason Aldean pawhin, “Brad, hei chu hriat a va nuam lo ve. Unaupa ka lo tawngtai pui che,” a ti a, Sara Evans pawhin, “Nitin ka lo tawngtai pui ang che,” tiin an comment bawk.
3 Doors Down hi an vanglai chu 2000 kum hmasa lam kha niin, Billboard Hot 100 chart top 10-a kai thei hla 10 an nei a, chung zingah chuan 2000-a chart No.3 kai thei ‘Kryptonite’, ‘When I’m Gone’ (No.4, 2003) leh ‘Here Without You’ (No.5, 2003) te pawh a tel. Billboard 200 (albums) chart-a No.1 kai thei album pahnih ‘Seventeen Days’ (2005) leh an self-titled project ‘3 Doors Down’ (2008) te an nei bawk.
3 Doors Down hian Grammy Award pawh pathum an dawng taw a, ‘Kryptonite’ leh ‘When I’m Gone’ avangin best rock song an dawng ve ve a, ‘When I’m Gone’ avang hian best rock performance by a duo or group an dawng tel bawk.