30th Youth National Championship Mizoram basketball team-in an phu tawk result hlawhchhuak lo! Tpa Bunghai

Mizoram Super League (MSL) boruak tang tak a zo a, India captain atanga foreign player tharum ngah, pa hrawlpui pui kara Mizo thalai basketball player rualin inelna hautak leh awmze nei tak an hmachhawn tlauh tlauh khan nghawng a nei a, North East Games neih zawh takah khan champion trophy an rawn hawn nawn leh e.
Tualchhunga inelna nung tak neih thin hian Mizo hnam hi sang takah, hnam dang mit hmuhah a vawrh sang nawn awn awn.
Tarlan hmaih thiang lo chu, MSL 9 champion team Zarkawt BCA atangin player pahnih chiah NE Games-a Mizoram team-ah hian an tel – hei hian a phochhuah chu tualchhung tlangvalte an tha tlang tawh hle tih a kawk.
Mizoram state chhunga inelna, MSL ropui leh rothap tak Mizoram Basketball Association (MBBA)-in a chhawpchhuah thin hi tualchhung thalaite hian an chhawrzia chu inhrilhnawn a ngai tawh lo!
Mizoram aiawha fehchhuak thin Senior Mens Team result leh record-te hian a tarlang e – NE Games-ah phei chuan ramri leh chhan hrang hrang avanga Mizoram nena inmelh rum thin bakah tharum nena inhelnuai tawh thenawm state-te lakah a zawnin tum thum champion trophy Mizoramin a chawi khum ta e!
A lerah, senior level-ah ringawt pui tak nih hi MBBA leh Mizoram chhunga basketball than zel duhtute hmathlir a ni lo; Mizoram Sub Junior team lam pawhin National Sub Junior inelna lamah tum thum – 2019, 2022 leh 2023- te khan a zawn zatin champion trophy an coach Marc Lalthlamuana Sailo, Zarkawt hovin an rawn hawn a, team thar hlak Sub Jr. Team member ni chunga an hlawhchhuah hi a turu hle.
Tin, kum 2020 leh 2021 kha Covid hripui vang khan inelna hi buatsaih a ni lo tih hre tel ila.
2024 Youth team bihchianna
Coach atana thlanchhuah Kanan veng tlangval, ZD Denghmingliana (Puitea) kaihhruai team-te hi zirlai rual an ni a, inkhelh an thiam avanga an School luhna: Mt. Carmel, St. Joseph leh Home Mission lama zirna senso ‘free’ te an ni hial hlawm nak – inkhelh thiam man hlep an chhiar der tawh.
Team enkawl lama tawhriat nei tha zet Lalrintluanga (assistant coach), Nursery veng leh PC Ramnunsiama (manager), Champhaite thawhhona a tha a, Mizoram hi Level 2 – state 16 zing atangin Level – 1 lama inhlankai ngei tumin MBBA lamin Aizawl to Calcutta thleng tum danga rela kal thin kha Lengpui atangin a thlawhchhuahtir a, inelna tan hma ni li-ah Pondicherry hi thlengin hahchawlhna hun thawl zawk an nei thei a; inelna tan hmaa hotel thlen man zawng zawng MBBA-in a tum vek bawk – team an lawm hle.
Inelna hautak leh
sawisel hlawh!
Inelna tan a ni a, state dang player zingah kum bithliah pel (over aged) an kat nuk tih hai rual a ni lo nghal pang! Mizoram team erawh tum dang zawng aia khauh leh khawngin kum dik tak, fit 6 thuau ni mah se state dang player fit 6’ 9” awm khauhpui pui karah zet erawh chuan an patuai hle!
An speed, skills leh strength erawh a dang zar thung – inkhel hau tak zet, an first match-ah ruahman lawkna an siam thahrui tlo zawk an neih erawh Mizoramin an chhawr thei lo – match official lamin quarter-tin minute 10 atangin minute 2/3 laite zu han paih then thin nia!
West Bengal lakah 31-30-in a vanduai zawkah an tang a, hei hian nasa takin Mizoram hi a nghawng ngui a ni!
Youth team, rawlthar rual fuihphur tur leh tha thar nena an insanmar theihna’n hian MSL hlutna a parchhuak zui a – MSL team head coach lo ni tawh coach Puitea leh Opa bakah manager Siamate’n palian tak tak tlim hmurna Himachal chu an match hnihnaah 51-37 zetin an sawp zui leh thei – inlungrualna leh tawngtaina rah a lang.
Mizoram group match hnuhnung berah Level 1 kaina hun tha a awm a, Karnataka player hmel hriam hrek hrawk, pa rothap leh lian hruau maite erawh an deh a khirh ta fat!
Mangchhia ni chhunzawm turin 3 pts. Mizoramin an lut hlei thei lo – referee thutlukna mak leh dangdai tak tak Karnataka hamthatna hawi zawng hlirin a inher zui a – ‘racist’ tih thumal chu Youtube lama thlirtute bengah a puak thuai thuai a, 61-54-in Mizoram chan a chhe ta nge nge!
I-Leaque lama Aizawl FC home match khel ngam lo Meitei club pahnih thutlukna nghawng te, tun tuma match official nikhua lo tak takte khan India ram infiamna huang hlimthla hi a tarlang a – kan la chiri hle tih a pholang.
Team hmathlir
Duhkhawp loh tam tak karah Mizoram hian Level 1 chuangkai turin inbuatsaihna tha zawk nen hma a lak thar leh ngei a rinawm.
MBBA hian tarlan tak angin, a bulthut atanga insawhngheh a, Zofate hi basketball huang atanga chanchin ngaihnawm leh chhinchhiahtlak hlawhchhuah hi a tumruh hle.
Youth team lama player nu leh pate tawiawmna leh tawngtaina hi coaching staff leh MBBA chuan a hlut hle a, thui leh zau zawk thleng turin tan a la nasa sauh dawn e.
Aizawl khawpuia Aizawl inziahna chhuang taka ha/inbel ngam kan tam tawhzia hre chungin, ram pawn lama hnam dang el tlak tura insawrbing hlamchhiah a thiang lo.
Infiamna huang atanga Mizo nih zahpuiawm lohzia thangtharte hlanchhawng chhunzawm zel turin Mizoram pawna hmingthatna hlawh tur chuan state chhunga sports association rahbi chhawpchhuah hi uluk a ngai tak zet – hemi thuah hian MBBA hian hman ata fak a phu thlawt.