5 star hotel leh Mizoram

Kan hnung deuh khan, tourism minister chuan, Chaltlang Tourist Lodge chu 5 star hotel atana outsource tura hma lak a nih thu a sawi a. Tihtur tul pawh tihfel nual a nih tawh thu leh asset valuation tihfel a nih hnuah EOI chhuah theih mai tur a nih thu a sawi bawk.
Ni e, 5 star hotel hi neih theih chuan a tha, neih theih rih loh pawhin kan la tlin loah ngaih mai a tha tho.
Tun dinhmunah 3 star hotel tlukpui hi chu Aizawlah hian a awm ve nual tawh a ni awm e; mahse, 3 star hotel nihnain a ken tel tur (facilities and service required for 3 star hotel classification) hi a nihna ang diak diaka zawm pha erawh an la awm chiah lo maithei. A chhan chu, 3 star certificate nei thei tura facilities leh service mamawh hrang hrang hi item 140 chuang a awm a, chutiang dawl zo tur hotel building chu tuna kan hotel building neih mekte hi an ni pha lovang tih a rin theih mai awm e. Ngaihhnathiamnain 3 star grade C te chu an ni mahna le.
Tuna neih tuma hmalak mekna ‘5 star hotel’ ah phei hi chuan, facilities & service mamawh chi 164 a awm a, heng zinga chi 162 dawl zo tur hotel building hi lo awm ta pawh ni se, 5 star hotel-in a neih ngei ngei tur thil pahnih, Bar leh Minibar a awm a, chu chu customer ten zu chi hrang hrang, changkang ber berte eng lai pawha an lam reng theih tura kawl reng a ngai dawn tihna a ni. Mizoram chu kan hriat angin liquor prohibition state a ni a, 5 star pual hian dan siam danglam (amend) pawh lo ni tehreng mah se, hotel-a thleng customer-te chauh lo pawhin 5 star hotel bar hi an pan luih luih ngeiin a rinawm.
Chu lam chu eng pawh lo ni se, a tir atanga 5 star hotel tura ruangam din sa ni lo, eng tin tin emawa bel chawp tur a nihna ringawtah pawh hian, a standard chu a chuti falua lovang tih a rin theih nghal mai awm e. Hei hi 5 star hotel sawihnawmna hrim hrim ni lovin, 5 star hotel nei thei tur hian kan infrasturcture dang standard te pawh hi up date ve tal ila. 5 star hotel-a thleng turte, kawngpui titoh taka insawh zuang tawk tawk chunga kan phurh hnuah, bawm tawt atanga phih chhuah ang maia chau leh pawr phung chunga hotel kawta kan chhuktir mai chuan, 5 star hotela thleng zui duh hi kan inhmu leh si lo ang a, shopping mall-a thlak leh te hi a ngai leh mai ang tih te pawh a hlauhawm alawm.
5 star kan sawi rik chuan, kan khawpui kawngpuite pawh hi 5 star nei khawpui kawngpui awm renga kan cheihnum te pawh a ngai ang chu mawle. Thil dangte pawh….