5,000m gold awrhtu Kenyan Chebet

Paris 2024-a tlankawng thui women’s 5,000 metres intlansiakah Kenya nula Beatrice Chebet chuan Olympic gold awrhin, a chipui Faith Kipyegon chu ‘disqualify’ zet mah se an ‘disqualify-na hi a khinglet hlawhtling a, medal ceremony-ah a ding chhuak leh theiin, silver medal a dawng.
Reigning world champion Kipyegon hi Gudaf Tsegay nen an inbakkaih avangin a silver medal dawn tur an tihtawpsak hman a, mahse, Kenyan hian rang takin World Athletics lamah a khinglet nghal a, an chhuhsak tawh silver chu an pekir leh ta a ni.
Hnehna changtu kum 24-a upa Chebet chuan metre 5,000 zeta thui tlankawng hi minute 14 leh second 28.56 chhungin a tlan chhuak hman.
Eugene khawpuia 2022 World Championships runner-up Chebet hi nikum khan Budapest-ah bronze medallist ni bawkin, Olympic-ah a zual zawkin ropui chhunzawm leh ta a ni.
Stade de France-a Kenyan pahnihin Games kal laia an ram medal hmasaber pahnih an hlawhchhuah hnu lawk khan Ethiopian world record holder Tsegay laka a khawsak dan avangin Kipyegon-i hming chu results list atangin an thaibo a, a hnuah ‘disqualify’ a nih thu an rawn puang a, Sifan Hassan of the Netherlands hming chu silver medal awrh turin a tawlh chho hman a, medal la pha loa inngai nghet tawh Italy nula Nadia Battocletti pawh bronze medal dawng thei tur dinhmunah a ding hman ren rawn a, chawplehchilha a khinletna pawmsak a nih hnuah Kipyegon-i hming chu silver dawng turin an tarchhuak zui leh ta a ni.
Thawhtanni khan Kenya medal pathumna hmin zui lehin, Mary Moraa chuan women’s 800m final kaltlangin bronze a awrh a, Ethiopia mi Tsige Duguma kutah silver lutin, pakhatna chu Great Britain aiawh Keely Hodgkinson a ni.