Champion lai England an chak
Nilaini zan atanga khelh tan UEFA European Under-21 Championship-ah ningani zan khan champion lai England an inlan a, an khingpui Czech Republic lakah hnehna an chang nghal. England chak rual hian Germany pawhin hnehna an chang a, hetihlai hian Netherlands an chak zo lo ve thung.
Champion lai England U21 team hian MOL Aréna-ah Czechia U21 an hmachhawn. Inkhel hmuhnawm takah Harvey Elliott chuan minute 39-naah Three Lions hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah England an khel tha chhunzawm a, goal hnih an thun belh leh. Second half tan atanga minute thumna lekah Jon Rowe chuan England goal hnihna a thun a, an hmahruaina a tizau. Si hnih an phurh hnuin Czechia in an si phurh sut tumin tan an khawh zui nasa hle a, minute 51-naah Daniel Fila chuan goal thunin an si phurh a sut then.
Goal an thun vangin Czechia an phur a, an si phurh sut zawh ngei tumin tan an khawh. An si phurh sut zawh tuma tan an khawh nasat laiin Charlie Cresswell chuan minute 76-naah goal thunin England hmahruaina a tihzau belh leh ta zawk. Charlie Cresswell goal thun hnu hian goal dang a luh belh thei tawh lova, England chuan 3-1 a hnehna changin point thum an hmu.
England hi Group B-ah an awm a, Group B-a inkhel dangah Germany U21 in an khingpui Slovenia U21 chu 3-0 in an sawp a, table-a hmahruaitu an ni.
Champion tura rinkai zinga mi Germany hian Stadión Pod Zoborom-ah Slovenia an hmachhawn a, an khel tha hle. Germany tan hian Nick Woltemade chuan minute 19-na lekah hmahruaina goal a thun. Goal hmahruai thuntu VfB Stuttgart forward Woltemade hian minute 42-naa an goal hnihna a thun belh leh bakah minute 82-naah penalty atangin an goal thumna a thun zui leh bawk a, hattrick a siam ta hial a ni. Woltemade goal thum thun hmagin Germany hian hnehna an chang a, point thum hmuin bul an tan.
Ningani zana inkhel dangah Netherlands an chak zo lova, an khingpui Finland nen 2-2 in an inhnehtawk. Finland hian Germany lakah bul an tan tha viau a, football a ram lian Dutch ho lakah hnehna an chang teuh hle nghe nghe a, hun tawp dawnah goal an chhuah vangin uiawm takin an chak zo lo.
Finland tan hian Casper Terho chuan minute 25-naah hmahruaina goal a thun a. Hmahruaina goal an thun hnu lawk minute 28-naah Topi Keskinen chuan an goal hnihna a thun zui leh zat bawk. Minute thum chhung leka an goal hnih thun hmang hian hun rei tak chhung hma an hruai a, an chak theih mai a rinawm hman hial a ni.
Si hnih faia an hnufual reng hnuin Netherlands in an khingpuite an beilet a, goal hnih thunin tlawm an pumpelh rham a, mualpho lutuk lovin an awm theih phah. Netherlands tan hian Luciano Valente chuan minute 59-naah goal thunin an si phurh a sut then a. Hun pangngai tawp hnu, hun pek belh minute 90+3-ah Ernest Poku chuan goal pawimawh tak thunin an si phurh a sut zo ta nge nge bawk. Finland lakah chak zo lo mah se tlawm an pumpelh thei hram hi Netherlands tan thil pawimawh tak a la nih chhoh theih a rinawm.
Netherlands an chak zawh loh lai hian Group D-a inkhel dangah Denmark in hnehna an lo chang ve thung.
Denmark hian Ukraine an hmachhawn a, si an phurh reng hnuin hun tawp dawnah an khingpuite an lehthal thei hram a, inkhelh hmuhnawm takah 3-2 a hnehna chang hramin point thum hlu tak an hmu a. Group D hmahruaitu an ni zui bawk.