Arsenal an chak ve ta

Thawhleh zana English Premier League (EPL) inkhel awmchhunah Arsenal chuan Emirates Stadium-a an mikhual Chelsea chu 3-1 in an hneh a. Table chung berah an kir leh.
Khelh li chhung ngawt hnehna chang zo tawh lova, an khelh hnuhnung berah Manchester City laka tlawm Arsenal hian an mahni ang thova chak harsat Chelsea an mikhual a. Champion tuma inelna boruak chawk nung thar lehzual turin London derby-ah an phu ang ngeia hnehna changin, point thum an hmu ve leh ta nge nge.
Arsenal hian an mikhual Chelsea lakah bul an tan tha viau a, minute 18-na lekah captain Martin Ødegaard chuan Xhaka siamsak tha tak chu tha zetin goal kilah a pet lut a, hmahruaina goal a thun. London club lian Chelsea lakah Gunners an khel tha zui viau a, Laipui a puak nawn leh thuai. Minute 31-naah Xhaka siamsak atang vekin goal hmahruai thuntu Martin Ødegaard chuan Chelsea defender pahnih inkarah fuh zetin a pet goal a, an goal hnihna a thun.
Arsenal in Chelsea an ngam laklawh a, goal an thun belh leh thuai. Ødegaard-a’n goal hnihna a thun atanga minute thum hnu lekah Brazil forward Gabriel Jesus chuan buai nuaih nuaih karah hnaite atangin a pet goal a, an goal thumna a thun a. Si thum faia hmahruai chungin chawlhlawk an hmang.
Mikel Arteta team Arsenal hian goal an thun thei a, an goal an venhim theih thin loh vangin tunhnaiah chak an harsat. Chelsea lakah si thum fai ngawtin hmahruai tawh mah se Arsenal tantute tan thla a la muang thei chuang lo. Chak zawh loh mai hlauthawng reng renga hun an hman laiin minute 65-naah Noni Madueke chuan Chelsea tan goal arawn thun a, hei hian Gunners thin tiphu ring leh zual. Chak zawh loh hlauhna in thlazar pharh hlai viau mah se Arsenal hian goal dang an chhuah belh lo hlauh a, an mualah 3-1 a hnehna changin point thum an hmu ve ta nge nge.
Chelsea laka chak Arsenal hi table chung berah an kir leh a, hmahruaitu ni hman zawk Manchester City chu point hnihin an lehpel. Arsenal hian hmahruai let leh mah se City aiin vawi hnih ngawtin an khel tam zawk thung a, an dinhmun a la tha chuang hauh lo. Khelh hmabak pali chiah an neih tawhah chak vek pawh nise City chetsual an chan a ngai tawh.
Blues in Frank Lampard an rawih nawn leh hnuin a che chhe zawn hle a, Lampard hian vawiruk ngawt a club hlui Chelsea hi a tlawmpui tawh. Arsenal lakah an tlawm leh tak vangin 11-na atangin an tawlh hnung a, 12-naah an awm hial tawh a ni.