Albuquerque, New Mexico, USA a cheng Kelsey Grubb, kum 32, chuan a kephah hnunglam a hawi tir thei a, Guinness World Record a siam. Kelsey hian a kephah hi 171.4 degree-in a her kual thei a ni. Hetiang record hi chu khum mai mai a harsa khawp ang.
Kelsey chuan, “Library a thawk ka ni a, 2021 world record lehkhabu a rawn chhuah khan ka lo hmu nghal vat a. Ka thawhpui pakhatin a keu vel mai maina lamah a tum reng pawh ni loin kephah tivir nasa thei ber record a keu chhuak hlawl mai a, ‘khai a! a rapawm zawk alawm le,’ a ti deuh hluai a. Ka va bih ve a, ‘Khatiang kha chu keipawn ka ti ve thei ang,’ ka ti ta a ni,” a ti.
Kelsey chuan ding chungin lehkhapuan rap chungin a kephah chu a theih tawpin a han herkual chhin a, record a siam theih mai an ring ta a ni. “A tirah chuan engtianga teh tur nge tih kha ka hrethiam bik vak lo. Mahse, record siam theih ngei kha ka inring ve tlat a ni,” a ti.
Record siam tur hian a hranpaa inzir leh inbuatsaihna pawh a nei chuang lo a, figure skating hi a hobby niin, chutah chuan taksa fan theihna siam nan stretching a tinasa a, “Ka taksa hi a fan thei viau tih chu ka hre sa a, mahse, mi te pawhin an kephah hi 90 degree te chuan an tihvir theih vek ka lo ring a. Mahse, chutiang chu a lo ni lo tih ka hre ve ta chauh a ni,” a ti.
Kelsey hian a talent special tak hian a taksa a tina chuang lo niin a sawi a, mahse, a ke a tihvir muan deuh chang chuan a khup vel bawrah nuam lo deuh han hriat chang te chu a nei ve niin a sawi. A talent danglam tak mai hi ice-skating-ah pawh a chhawr tangkai viau a, a ke tiche lem lo pawhin hnunglam a hawi thei bik a ni.
Kephah hnunglam hawi tirin record siam
Get real time updates directly on you device, subscribe now.
Next Post