PASALTHA

By Lalchhandama Colney
Ph – 9862982321

Kan thupui tur hi tunlaiah chuan kan hre ngai tawh lo viauin ka ring.Tun hma kha chuan pasaltha kan han tih ang chi ho kha chu mihuaisen, sa leh ral hmaa zam ngai lo, a tul phawt chuan nunna pawh hlan ngam an ni thin. Ramin a thlamuanpui a, nunau pawh in an thlamuanpui hle thin. Tun hnu hi chuan khatiang pasaltha kan han tih ang chi ho kha chu kan nei ta meuh lo, a tul tawh vak lo a ni mai thei. Mahse, a chi dangin kan nei han ti ila, ka tih sual em em ka ring lo, chungte chu chawimawina sang dawngtute, mi hmingtha doctorate degree an pek te leh award hrang hrang dawngtute. Hetia han ngaihtuah mai chuan award, etc.,tih vel mai mai a ho kan ti mai thei, mahse, dawng thei tura an tehna hrang hrang han thlir a, han en chuan thil namai a ni lo tih kan hre thei ang. Chuvang chuan pasaltha kan tih thin kha an tluk ve reng a ni, tehkhin tur dang an awm chuang lo, an hnaih ber a ni. Nia, sawi tawh angin pasaltha tih te hi chu thil hlui lam deuh alo ni ve tawh a, mahse, kan rilrua a lan dan chu a la ngai reng tho a, vawiinah kan thusawi tum tehkhin nan ka han hmang dawn a ni.
Kan Ram Dinhmun – Mizoram dinhmun chiah hi engnge maw ni le, a then chuan kan hre chiang viau mai thei. Ei leh bar lama kan dinhmun hi a tha em aw, ni tin chaw chhum tur chu kan nei a, chawhmeh kanna tur tel kan nei bawk a, tuah tur gas kan nei bawk a. Pawisa, mamawh leina tur kan nei tek tek bawk a, kan thla chu a muang ve viau mai. Mahse, Silchar kawng a pin chuan kan tam, buai zo vek zel mai, tihngaihna awm lo. Chuvang chuan ei leh bara kan dinhmun hi a tha nge tha lo aw, ngaihtuah ve tham a tling a ni. Sum leh paia kan dinhmun ve thung hi i lo chhut ve dawn teh ang. Sawrkarin a sum a hmuh vena ho chu chhiah chi hrang hrang kan pek khawm ho atang hian a ni ber a, sawrkar laipui atang hian a lo kal bawk a. Sum chu a tam emaw tam lo emaw a hmangtu azir a ni pakhat ve a ni. Miin inrenchem taka a sum te a hman chuan a indaih ang a, bat ngai lovin a khawsa thei dawn a ni, saving tur hial pawh a nei thei ang. Aw le, sawrkar hian sum a hmang thiam kan ti ve em le, leibate hi chu a ngah ve thei hle mai, eng emaw deuh lai phei kha chuan a hnathawkte pawh hlawh a pe hlei thei lo.
Party – Party tin te kan pawimawh hle mai, in kutah kan ram, Mizoram hi a awm a ni. Zu rui chunga thil in tih chuan kan ram tan a pawi zel dawn, vawiinah chuan party worker mai mai i ni lo a nia, i pawimawh lutuk. Policy, manifesto, siam leh duan danah te ram tana tha lo tur ang chi kha chu, vote hmuh theihna tur pawh nise i ti lo ngam ang u. Kan campaign dan te pawh kan fimkhur thar a va tha dawn em, vote tu tur zawng ni mah ila, tih loh ngam, tih ve duh loh te nei ta ila a va tha dawn em. Candidate tur kan thlan te pawh ngun takin bel chiang ila, duh ang zan ni lo kha chu i thlauthla ngam ang u. Ram rorelna fung vuan tur hian i duh tui viau teh ang u, chuti lo chuan hnam dang ten min nuihzat lutuk ang e. Mipui tana thil tha tak tak chhawp chhuak thei turin party-te kan pawimawh, thil tha han tih hian a nuam lam ringawt kawk lo se, chutiang ti thei tur chuan party-te kan huaisen a ngai. A sem lam ringawt lo deuh te pawh han tawktarh thei ila, thil tha leh dik na na hi chu a tlo thin a, a tawpah hnehna a chang thin a ni. Min vote-tu tur kan zawnnaah Pathian lam tang nge kan nih, Pathian lam tang ni thei tur chuan huaisente pawh a ngai hle ang.
Mipuite – Eng vangin nge ram ropui leh thil ti thei, super power, Russia chuan Ukraine, ram rethei, ram dangte tanpuina dil kual mai mai chu a ngam hleih theih loh kan tih chuan, a chhanna tur chu kan hre tlang theuh awm e. Ram hruaitu huaisen tak, nunna pawh hlan ngam an nei a ni, chuti ni lo se chuan vawiinah Ukraine ram chu hriat tur a awm mumal tawh lovang. Han intehkhin chi chu kan ni lo na a, keini pawh hi ram hruaitu tha mamawh tak kan ni ve a ni. Kan ram dinhmun chu kan han tar lan tawh bakah kan hre chiang theuhin ka ring. Chung ram hruaitu tha, huaisente chu keini pawh hian kan nei ve thei reng a ni. Hruaitu tha chu kan hma lawk mai ah hian kan thlang dawn a ni. Cheng sanghnih/khat emaw hna emaw avanga vote i thlak a nih chuan hruaitu tha chu kan neih theih hmel loh, eiraltu kan nei zawk ang. Chuvang chuan, mipuite kan huaisen a ngai, tih loh ngam, tih ngam kan neih a ngai dawn. Chutianga huaisen taka vote kan thlak a nih chuan hruaitu tha hi kan nei ve em em ang, tichuan, mipuiten a hnung kan zui ve tawh mai dawn a ni.
Pasaltha hi a nih theih ngawt lo a, mi bik deuh nih a ngai a ni. Aw le, kan ram inthlanpui kan hnaih ta hle mai, rei lo teah Mizo mipuite mizia a lo lang leh dawn a ni. Bible-in nunna kawng chu a bumboh a, kawng a chhia a, kal te pawh tlem te chauh an ni, a ti, mahse, a tawpah chatuan hlimna leh lawmna a awm thung a ni. Chutiang bawkin kawng bumboh lam zawh ve ila ram nuam thleng thei turin, huaisen takin mahni inphatin vote thlak tum ila. Vawiinah kan zavaiin pasaltha kan ni thei theuh a ni, pasaltha nih i tum ang u. Pasaltha chuan mi fak leh chawimawi a hlawh a, mi rilruah a thi thei tawh ngai lo, hriatreng a hlawh thin a ni. Pasaltha, huaisen i lo nih theih nan, vote, fair taka i thlak mai khan a ni e.