Inzawmkhawmna tur a nih chuan hnam hmingah buai loang – RS MP

Zofate kan inzawmkhawm theihna tur a nih phawt chuan kan hnam hming tur chu eng pawh nise a pawi lo tih Mizoram MP K Vanlalvena chuan a sawi.
ZO-Reunification Organisation huaihawta Aizawla Zofate Inkhawmpui Lian neih hun hnihna, Inrinnia hmanah K Vanlavena chuan Zofate min funkim thei ber pawl ZORO hmalakna chhuanawm a tih thu a sawi a. Inpumkhat dawn chuan buaina leh harsatna tawh a tul thin thu leh chu chuan inhmangaihna leh inremna, tawng inhriat tawnna a thlen thin thu sawiin, “Buaina avangin Zofate kan inhnaih sawt thin a, min tipumkhat thin. Kan inhmangaih tawn phawt chuan min awp mektute hian kan inpumkhatna leh rorelna pakhata kan awmna tur hi min dal lo ang. Hei hi khawvel history-ah pawh a chiang a ni,” a ti
Zofate chu kan chenna a hran tak avangin kan tawng danglam ta deuh mah se, thlah khat kan nihna a bo loa, hnam dang kan ni hek lo tih MP hian sawiin, “Kan lungrualna tur leh kan inzawmkhawm theihna tur a nih phawt chuan kan hnam hming chu engpawh nise a pawilo. Hnam hming leh hmingte pawh thlak a ni fo. Zofate hi hmun hrang hrangah awm mah ila, Kristian kan ni deuh vek mai a. Hei hian pumkhat kan nihna a tilang a, kan hnam hi Pathian thutak avangin nuaibo theih kan ni lo,” a ti.
MNF National Core Committee member K Vanlalvena chuan MNF-in independent a sual a ni mai loa, Zofate rorelna pakhat hnuaia min hruailuh a tum tih a sawi a. A tir atanga MNF-in a tum ngar ngar chu India nena inremna a lo awm tak avangin, Zofate insuihkhawm duhtu ZORO movement a lo lian ta tih a sawi a ni.
Inrinni khan ZORO huaihawt hian Aizawlah Zo hnam inpumkhatna kawng zawh neih a ni a. Hetiang hian resolution an pawm:
# Zofate, India, Burma leh Bangladesh awp chhunga chengte hi hnam khat, thlahtu thuhmun, serh leh sang inkhawih pawlh, beiseina hrui khat vuana ‘Dam leh tlang khatah, thih leh ruam khatah’ ti thin unau dik tak kan ni.
# Chin-Lushai Conference 1892 January 29, Calcutta Fort William-a Thurolum (thutlukna) No. 1-na angin, rorelna pakhat hnuaiah Zofate insuihkhawm leh turin chak takin hma kan la tlang zel ang.
# Ramri daidana leng Zofaten kan lungkham ber Zofate insuihkhawm lehna hi kan pianpui chanvo a ni a. UNO-Declaration on the Rights of Indigenous Peoples Article 3-na in min phalsak angin, Zofate insuihkhawm leha rorelna pakhat hnuaia kan awm tur thu kan puang a, hei hi a hlawhtlin theihna’n tharum thawh loin chak takin hma kan la zel ang.
# Zofa hmun hrang hranga awmte kan insuihkhawm leh theihna’n kan awmna hmun apianga theihtawp kan chhuah zel dawn.