A Dumpawl ten dawt an sawi – Col Lalrawnliana

Zalenna suala rammu zinga ‘A Dumpawl’ tia sawi thinte chu ramhnuai atanga an chhuah tak avangin chanchin an hre zui loa, zalenna sual ni lo anga an sawi thin chu dawt a ni tih rammut hunlaia MNF hruaitu Col Lalrawnliana chuan a sawi.
MLA hlui Col Lalrawnliana’n thuthehdarhtute hmaa a sawi danin, Zoramin zalenna a sual laia tel ziktluak ve ta lo, ‘A Dumpawl’ tia vuah zinga mi thenkhatin, zalenna sualtute zing atanga an tlanbo hnuah MNF kal zelten zalenna an sual tawh lo, tia an sawi thin chu dawt a ni tih a sawi a. 1966 March 1 atang khan zalenna an sual a, East Pakistan-a an chhuk hnuah ramhnuai sawrkar kal laiah ngaihdan a inan tak loh avangin ‘A Dumpawl’ hi an awm ta a, man hnua tlanchhuak leh mahni thua bang zui ta an awm tih a sawi.
“An tlanbo daih tawh avangin rammu sawrkar hmalakna thupuan kha an hre loa, an hawn hnua sawrkar hmalakna an hriat phak tawh loh avangin hnam sipaite indona nasa tak hi an haiderin an hre duh lo mai mai a. An tel lo hian zalenna sual hna sawrkarin a thawk nasa lutuk. Zalenna kan sual reng, ramhnuaiah kan awm reng, hmelma ral kan kap reng, inbiak chhung erawh kan chawl ve, chu mai chu a ni,” a ti.
MNF-in zalenna an sual lo, titute phei chu tumahin ram hruai tlaka an thlan lem loh, mi fel ve tak an ni ve mai tih Col Lalrawnliana hian a sawi a. “MNF-a an dinhmunah an lungawi loa, an dinhmun pawh ni lo, MNF kalzelah pawh an lungawi loa, Pu Laldenga dinhmunah pawh an lungawi lo. Hetiang mi ngiaunger leh phunchiar, Siamtuin MNF hruaitu atan a lo ruat lo hi, a lo hre chiang em a, MNF hruaitu tlakah a ngai loa, a hruai tir ta lo reng a ni,” a ti.