Everton an him Leeds leh Leicester City an tla hniam

Pathianni zan khan English Premier League 2022-23 khelh zawh a ni a. An muala chak Everton in tlakhniam an pumpelh a. An mualah chak mah se Leicester City an tlahniam a, Foxes rualin Leeds United an thlahniam ve bawk.
Chhanhimtu Abdoulaye Doucouré
17-naah awm a, EPL khel chhunzawm thei tura chak ngei ngei mamawh Everton hian Goodison Park-ah AFC Bournemouth an mikhual a. An mualah Abdoulaye Doucouré goal thun hmanga hnehna pawimawh tak changin him tura an mamawh point an hlawhchhuak a, EPL-ah an inlan chhunzawm thei dawn.
Everton hian an mikhual Bournemouth lakah goal thun ngei tumin thapui an thawh a, an muala inlan an ni bawk a, an khingpuite an nawr bet hneh hle. Chawlhlawk hmain goal an thun teuh thei hle a, si nghak Mark Travers a chet ropui theih em vangin goal an thun thei lovin chawlhlawk an hmang.
Chawlhlawk hnu lamah Toffees an che tha chhunzawm zel a, second half tir lamah goal an thun ta nge nge. Goal thun theihna hun tha uiawm taka an hlah hnu lawk minute 57-naah Abdoulaye Doucouré chuan box pawn atangin kawh zetin a hlap goal a, hmahruaina goal a thun ta nge nge. Doucouré goal thun hi hun tawp thlengin an venghim a, an mualah ngei hnehna pawimawh tak changin, EPL khel chhunzawm thei turin an him ta a ni. Doucouré goal thun vanga an him leh tak vangin Everton hi English top flight-ah kum 69 zet an inlan chhunzawm theih phah dawn a, hei hian English club hlun leh tlo an nihzia a tilang chiang viau awm e!
Foxes an chak, mah se an tla
Him beisei chhunzawm tura chak ngei ngei mamawh Leicester City chuan King Power Stadium-a an mikhual West Ham United chu 2-1 in hneh mah se an chunga awm Everton an chak vangin an him zo chuang lova, championship-ah an tlahniam. Leicester City hi EPL atanga tlahniam tawh team zinga team tha bera ngaih an ni zui nghal.
King Power stadium-ah chak ngei mamawh Foxes hian an khel tha viau a, chak phuin an inlan. Minute 34-naah Harvey Barnes chuan hmahruaina goal a thun a. Mi-nute 62-naah Wout Faes chuan an goal hnihna a thun belh zui leh a, an hma-hruaina a tizau. West Ham tan hian
Pablo Fornals chuan minute 79-naah an si phurh sut then mah se Leicester City hian hnehna an chang zui ta tho a, an mualah point thum an hlawh-chhuak.
An muala chak Leicester hian Everton result an ngai chang a, Everton an chak zo lo a nih chuan EPL an khel chhunzawm thei dawn. An chak hnuin Everton an chak leh ta si a, Leicester hi uiawm takin championship lamah an tlahniamta a ni.
Leicester City hi 2015–16 season khan mak tak maiin EPL-ah an champion a. Hemi hnu hian an tlahniam hret hret a, 2022-23 season a tawp meuh chuan EPL atangin an tlahniam ta hial a. EPL atanga tlahniam tawh zawng zawng zinga team tha leh squad manto bera ngaih an ni nghal.
Leeds an tlawm chiang
Pathianni zana inkhel dangah him hram beiseina tlem la nei Leeds United chuan Elland Road-ah Tottenham Hotspurs an mikhual a. An mualah ngei 4-1 ngawta an tlawm vangin an tan him ngaihna a awm lova, championship lamah an tlahniam.
Ellan Road-ah 4-1 ngawtin hnehna chang mah se Tottenham pawhin an chunga awm Aston Villa an lehthal thei bik lova, awlsam takin chak mah se an hlim bik chuang lo thung.