Mizoram Mamawh Brig T Sailo Six Basic need Chhunzawm ni rawh se

By:C. Vanlal Ruaia
Ram hmangaihtute chu insawi chhe vak vak tur pawh an ni lo. Ram an hmangaih chuan an policy pawh a in ang hlawm lawm ni. An policy a inan te chuan ruam khatah an kal tlang thei lawm ni. Amaherawh chu, ram hmangaih ni lem lo, tum dan hran rilruk neia lal tum ringawt an nih chuan inthurual a har ngawt ang. Ram hmangaih leh veitu chuan heng policy hi an zam mai tur a ni dawn lawm ni? Mizorama kan Politician neih chhun ka ti mai dawn a nia. Politician chu an tam mai thei, mahse an sulhnu enin Ram hmangaih an ang lo va. Brig T. Sailova khan Mizoram tan Six Basic need hial a siam a ni a. Han lal rei deuh seng chuan a tha tur a ni a. A hun rei lote khan ram tana rotling a khawih hnem ber ang. Tin, Rambuai Lungngaihna chhumpui kar a, mipui nunau rum karah a ni a, human right a din a. Mizoram khaw hruaikhawm te Gauhati High Court-ah a khing a. Kum 1966-ah ram a buai a, kum 1967-ah Mizoram khaw sawi khawm a ni a. Mizoram mipui an rum a, tam nasa tak a tla a. Khatih hun laia India ramin Mizoram an tih retheihzia chu nasa tak a ni. Tual thihna pawh a tam. Kum 1968-ah chuan Brig T Sailo- a’n Court-a a khin hneh tak avangin hruaikhawm chu an khaw lamah an let leh ta vek a ni. Saitual SDO thah a nih a, Cachar buai te khan Silchar-a Mizo tang chhanchhuak turin Silchar kha a tlan lut rep mai a ni. Heta a hnung zuitu tam tak an la dam. A huaisen a, a dik bawk a, thil tha lo reng reng a hlau ve lo.
1. Tuikhuah Hydel Project:
Brig T Sailo-a thil plan pawimawh em em mai chu Bairabi Rail Head tih thlen a, Bairabi-a Tlawng khuah a, chu Tlawng dil chhoah chuan, inland water rout (water transport) siam chhoh chu a rilruk ta a ni. Hydel Project (Multipurpose Dam) a ti. Mahse a lal hun chhungin a tlin lova, a tlak san ta a ni. Heng a bul tan hi a hnunga rawn sawrkar/lal ten an chhunzawm duh ta miah lo. He thil pawizia hi, sawiin a siak lo, a pawizia sawi tur tam tak a awm. Mini Hydel project 20 MW pawh pe thei lo siam an ching a, hnun lo va sum siamna lam a ang mah zawk. Mizoramin Power hman tur kan nei lo va, mi ram atanga lak luh power chuan Industry te, press te factory sumdawnna Trade a siam theih lo va. Industry lian pawh ni lo, Khadi village Industry te pawh, Mizoramah a run theih lo va. Khawnvartui (K. Oil), Mizoram chanpual (Quota) pawh Assam hoin an insem zo ta mai mai a. K Oil scandal-te leh sumdawng tam takin Petrol pawlh nan te hial K Oil chuang tlai an hmang ta a. Industry lama K Oil hmang raltu tur kan neih ve miau loh avangin. Mizorama dawr siamte hnenah Vai hoin an supply vel ta mai mai a, to tak takin mipui lam in K Oil mamawhte kan lei ta mai mai a ni. Tuna kan Governor Dr. Hari Babu Kambhampati hian Power a veizia thu vawi tam a sawi tawh a. Dt 9, June 2023 pawh khan Ministry of Jal Shakti hnuaia Central Water Commission hotute leh Power and Electricity deptt-te a sawipui leh tawh a. Kan Governor hian power hi a vei hle a. Ani hi chuan tun lai khawlum lutukah pawh hian a Kamis var bak hi a inbel ngai miah lo va. Mizote erawh khawlum hnuaiah pawh kan inthuam up nasa thei hle. A nalh lam aiin khaw awm dan nena inhmeh lo lutuk hi hmuh a hrehawm zawk.
2. Kawngpui:
Kawngpui inkalpawhna hi nunna hnar ( liveline) a ni a. Mizoramah Chief Minister apiangin an chang (port folio) ziah. A lal ber enkawl chu a tha mawh hle a. Tunlai khawvelah hmanrua a tha em em tawh a. Kawng laihna hmanrua leh Alkatra (Bitumen) chhuantuina khawl (Motor) tlan thei thlengin a awm tawh a. JCB,Volvo, etc. Central Company ho chet dan han en hian, a rual awhthlak thin hle a ni. Tuna kan dinhmun ang reng hi a nih dawn chuan, Mizoramah Kawng hi RCC in siam se, a chungah Alkatra in chulh (seal) leh mai se. ( Senso tlem, eiruk vak tur a awm thei lo mahna). Tuna Tipaimukh road Manipur Churachanpur kan tlan chhohna kawngte leh Tripura Kanhmun lam road te hi Brig T Sailo a siam a ni. |ha reng se Mizote inpumkhat nan a pawi mawh reng a ni.
3. Medical Hospital:
Mizoramah chuan Private Hospial hi a changtlung zawk ta tlat mai a. Hei pawh hian kan than dan duh awm lohzia a entir thei ang. T Sailo-a hun lai bawk khan doctor-ho nuar kha kan la hre reng ang. T Sailo kha chuan doctor-ho nuar kha banna thehlut turin a request let a; mahse tuman an theh lut ngam lo va. Nawrh avanga buaina kha a tuk zal thei a ni. Mihring kha kan la tlem bawk a. Sawrkar hian mipui tanghma ngaiin Phai lam Hosapital lian thawhpui turin agreement siam pui se. Doctor thiam tak tak Visiting Professor ho hi Sawrkar Hospital-ah hian hunbi nei (routine) siamin Line chi hrang hrang Doctor, Visiting professor leh Specialist ho hi lo thlawk lut se la. Lehlangin an kal mai thei tawh a. Tin, Emergency leh natna khirh bik thluak zai ngai thut te rawn zai mai se, Lengpui Airport kan nei tawh bawk avangin, heng thil Sorkar tan chuan tih a harsa lovang. Phai lama kan kala Medical bill tam tak hi kan seng tlem zawk ang a. Chuta tan chuan Sawrkar hian Operation theatre (standard virtual Lab ) siam bawk se la, mipui tan hian a tangkai dawn em mai. Tuna kan awm dan hi chu kan sawi vak chuan mi pawi kan sawi palh thei ang a, sawi tam lo mai ang. Development hnuk bul ber chu Sawrkar (Government) zel hi a ni. Politics hi chu mipui hian sum hai luh nan hman tum lovin mipui vantlang thatna tur (Public interest) ah pe tawp ila. Thlan lal te dik lohna en kar ila, “Mipui pawh kan dik lo” tih vel mai mai inthup mawina ang chi hi bansan tawh ila. Inkar ngil tawn a ngai, chumi ti tur chuan Chief Minister a fim a ngai. Chumi tur chuan mipuiin an pur buai loh a ngai. Politician-in Dan anga tha taka ram thatna tur (Public interest ) a tih zat zat chuan mipuiin an bawm luai luai lovang. Chak lohna nei chung chuan tumah an inchek tak tak ngam lo a nih hi. Chief Minister FAI kan neih chuan kan ram chuan kar loah hma a sawn ngei ang.
4. Agriculture:
Khawvel Sawrkar Independent ram reng reng chuan an ramah an ngaih pawimawh ber chu Agriculture a ni vek a. Agriculture First Crop ah chhiah awl a ni vek bawk. (Income tax Act 2 (iA) / se 10 (1) Ramin thar chhuah a nei tur a ni a. Ramin tharchhuah a neih loh chuan BUDGET ri ngawt kha chu a lo kalna lam ah mihring mamawh thleng nan a let leh vek thin. Vawi tam pawisa/budget sawi chhuak thei nia kan inzawrhna thin te hi thlak tawh ila. Agriculture hi kan politician te hian ram hnuk a nih avang hian budget pawh dah tam awm tak chi; ram siam tur chuan a ngai a ni. Tuikhuah kan nei ang a. Electric power kan hnianghnar chuan Agriculture product process a nuam ang a. Industry pawh a lo piangin a lo thang duang ang a. Food Processing ri ngawt pawhin Mipui/mimir tin ten hna (employment) kan lo hmu tawh dawn a ni. Tunah hian China /Japan ten Nizung chakna (Solar Panel) tha tak tak an siam chhuak tawh a, heng hi Kuthnathawktute tan a va han tangkai tak em. Motor kal theih lohnaah pawh, vil reng ngai lovin, zing ni a lo en atangin tui a pump theih nghal a, tlai thlengin a pump char char thei tawh a. Heng tui pump-na hian Agriculture a chawm dawn a ni. Tlangram Terrace te pawh tui tlin kumtluanna (Wet terrace) a lo ni tawh dawn a ni. Minister te hi Foreign-ah an zin thin a. Mithiam pawh an chah chhuak thin a. Mahse, a sawt phah em em lem lo. Technician an zin hi a tawk viau.
5. Tuilak :
A chunga kan han sawi Solar panel-a tui lak kan sawi bakah pawh khian Sorkar chuan Public tan tui hniang hnar zawk leh Solar panel lian leh ropui zawk in tui a pump thei a. Heng Mizoram tlangdung kara lui tui te hi tlangchhipah pump chho in, ram mual dung tha Farm hmuna supply theih tur in sorkar hian siam thluah sela; kumtluana thlai chin theih a lo nih chuan mipui chuan tih tur an hre hle dawn a ni. Pawisa sem tih vela lemchan kan chin hi mahni leh mahni inbumna a ni a. Chutiang phenah chuan Mosolman tam takin min chim a, an zingah kan thalaite helper-ah an tang duh si lova. Manual work reng reng Mosolman kutah a awm ta vek a…a kal zel chuan kan la insual dawn khawp. Kan tlai lutuk hmain lemchan bansan in … Kan ram hian engkim a thar ve tur a ni. Raw material lak luha Industry din tur paw’n Power leh Tui kan mamawh, a pawimahna a inang reng a ni.
6. Tuna Politics Hlimthla: Tuna Mizoram mipui chu sawi loh, a politician-te ngei pawn an tum ram chu khelh fuh a, hausak nana a hman… Lalna fawng vuan bawk si, sawrkhar/Public sum Control bawk si. Thuneihna sang tak nei bawk si… Ram kalphung politics (Political ethics) hre thiam leh tak tak bawk si lo, rorelna khawl a awm tlat bawk si te hian, Constitution a Fundamental Right , intluktlanna (equality) inunauna (Fraternity) Preamble-a Welfare State ni tura ram siam, kan tih thin zawng zawng kha an bawhchhe fai vek a ni. An sual vang ni lovin an hriatna leh Finna ten a hmuh phak loh vang te pawh a ni mah na.
7. Contractor lo nih ve tum chhen te hi bansan ila:
Heng hian mipui rilru nasa takin a tichiai a, Contractor kaltlanga sum siam te hian mipui intluktlanna a tichhia a. Supply material atanga sum siam te pawn mipui nun a ti rualrem lo va, inchenlohna hian sual a siam a. Welfare state a ni thei lo va. Dan bawhchhiatna (Crimes) control rual loh a thleng thin a ni. Thawhrimna avang ni si lova hausa, engemaw avanga hausa thut sawi tur a tam ta. Chung chuan khawtlang nunphung inchenlohna a thlen hnem em em a. |awngkam mawi lo ni suh se, mi thenkhat sum han nei thut mai te hian, mihring thleng hian lei an tum tawh mai thin a. Hmanni lawk pawh … mi pahnih In sa an awm a, In sa hmasatu mistiri kha, a ruaitu hmasa hlawh aia sangin a rawn khar sak vek a. Office-ah pawh pawisa nei file chu a kal chak bik zel. Heng social intluktlanlohna hian khawtlang a ti hrehawm a. Constitution Article 19. Fundamental right pawimawh tak kha a hlap buai vek thin a ni.
8. Legal Issue:
India ramah Constitution sei lutuk kan neih hi a inkawlkalh a, thil tih mai hi a harsa em em mai a. Tunhma chuan Mizoramah Judiciary kal phung kha a hming lekin a kal thin a. PIL submit te kha a tak a chang mawh hle thin. Mahse tunah hian danin thuneihna a pek hmang thiam mi tha leh huaisen, dik, public policy hre pha chin Special Judge (discretionary power) chu post a awm chuan enge a duty tih hria / feedback a neih tur pawh hmu pha, a rawn chhuak ta. (a hming hi sawi rih lo mai). Hei hian ram kalphung siam that naah nasa takin a rawn thawh hlawk em em a. Democracy Principle-ah chuan Opposition chak tak a awm a ngai a. Democracy lungphum pawimawh tak mai Judiciary lama step thar kan kai ta hian kan ram kal dik lo hi a rawn kar ngil bawih bawih ni berin ka hria. Ram leh mipui/vantlang tana thawhna ropui tak a va ni em! Miin thil tha tih tur hria ti lo chu a tan sual a ni”. (Jacob Bung 4:17) tih a ni si a.