Saudi Pro League chuan player langsar an hip chhunzawm zel a, player hrawl tak tak an lak luh hnuin Chelsea leh Senegal si nghak Edouard Mendy chu Al-Ahli in an la lut a, kum thum daih contract an ziahpui.
Senegal si nghak Mendy hian 2020 khan Rennes atangin London club lian Chelsea a zawm a, Premier League club lian Chelsea tan a chetha zui hle. Chelsea player pawimawh a nih laiin amah duhsaktu Thomas Tuchel ban a ni a, Graham Potter lak luh a ni. Potter hnuaiah Mendy hian duhsak a hlawh zo lova, Kepa Arrizabalaga thla veng a ni ve leh ta thung. A beisei anga duhsak a hlawh zawh loh vangin chhuah a duh ta hial a, hlawh tam tak hlawh turin Al-Ahli a zawm fel ta a ni.
Al-Ahli si nghak thar Mendy hian Chelsea tan Premier League-a vawi 75 a khel a, clean sheet vawi 31 zet a nei hman. Chelsea tan hian inelna hrang hrangah vawi 105 a khel hman a, clean sheet vawi 49 a nei bawk. Kum 2021-ah Champions League-ah an champion theih nan a thawhhlawk hle nghe nghe. Chelsea tan a chetthat ang bawkin Senegal tan a chetha ve bawk a, Africa Cup of Nations-ah a champion pui. A chet ropui chhoh em vang hian kum 2021 khan chawimawina lian pahnih; Uefa’s goalkeeper of the season leh Best Fifa men’s keeper a dawng kawp hial a ni.
Al-Ahli hian Chelsea atangin defender Kouli-baly an la lut tawh a, Wolves midfielder Ruben Neves an la lut tawh bawk. Chelsea midfielder pawimawh N’Golo Kante chuan Saudi league champions Al-Ittihad a zawm a, Kante hi Real Madrid striker hlui Karim Ben-zema nen an khel dun thei dawn. Mendy-a’n Saudi a pan leh bakah hian Chelsea winger Hakim Ziyech pawhin Saudi Arabia a pan zui ve leh dawn niin report a awm bawk. Sum a tam vangin player lar tak tak an lut zel dawn niin a lang.
Al-Ahli in Mendy la lut
Get real time updates directly on you device, subscribe now.
Prev Post
Next Post