ietnam-in Barbie film thar khap hmak

Vietnam chuan South China Sea lama a ram chin nia a chhal China in a chuhpui chu Barbie film tharah a tarlan avangin an rama lakluh a khap.
China chuan South China Sea pumpui deuhthaw a ram angah a chhal a, hei hi a chehhvel ram ten an duh lo hle a, chung zingah chuan Vietnam pawh a tel a ni.
He Barbie film hi social media ah a lar tawh hle a, 21 July hian cinema a tihchhuah tum a ni.
Barbie film scene-ah hian engtiang chiahin nge tarlan a nih sawi lan theih a ni rih lo na chungin China in nine-dash line a tih chu an pholang tiin Vietnam senior official te chuan an sawi a.
Nin-dash line hi South China Sea a China-in a ram chn a chhal map a tarlanna a ni.
South China Sea-ah hian Beijing chuan military base te artificial island siam chawpin a bun a, chu mai bakah a ram a nihzia chhal nan patrolling a nei chamchi bawk.
Kum 2016 khan The Hague international tribunal chuan China-in South China Sea a ram anga a chhal chu a pawmsak lova mahse Beijing chuan The Hague thu leh hla chu engahmah ngai lovin a pawm loh thu a sawi zui a ni.
Barbie film hi Warner Bros te siam niin nine-dash line kaihhnawiha Vietnam-in a khap awm chhun a ni lo. Kum 2019 khan DreamWorks te a nimated film Abominable chu he thil avang tho hian khap a lo ni tawh a, a hnu kum thum lekah Sony action movie Uncharted pawh Vienam Department of Cinema chuan a khap tawh bawk.
Kum hnih kalta khan Australian spy drama Pine Gap pawh thuneitute hmalakna vangin Netflix te chuan Vietnam atangin an paih bo tawh bawk a.
South China Sea hi China, Vietnam, the Philippines, Taiwan, Malaysia leh Brunei te chuan an inchuh a ni.