Boxing a inhnek entu tam ber

April ni 24, 2022 – Pathianni zing lam khan United Kingdom-a khelmual ropui Wembley Stadium chuan inhnek ropui a thleng a. Palian huangah WBC champion Tyson Fury chuan a khingpui Dillian Whyte chu knockout-in a hneh a; a kawnghren a humhim. Fury leh Whyte te inhnek hi a hmunah mi 94,000 zetin an en a. Tui let hnu lamah a hmuna boxing entu tam ber tum a ni.
April ni 29, 2017 khan palian huanga boxer tha pahnih; Wladimir Klitschko leh Anthony Joshua te chu Tyson Fury kawl lai an chhuhsak kawnghren pathum; IBF, WBA leh IBO kawnghren chuhin Wembley Stadium-ah an inhnek a. Round 11-naah knockout hmanga Anthony Joshua a chak tum hian a hmunah entu mipui 90,000 zet an pung khawm. Klitschko leh Joshua te inhnek hi a hmuna boxing entu tam ber record a ni phawt a. Kum li hnuah he record hi thai chhiatin a awm ta a ni. Klitschko leh Joshua te inhnek entu aia Fury leh Whyte te inhnek entute hi mi 4000 zetin a tam zawk.
Wembley Stadium-ah hian mipui 89,000 zet an leng a, Joshua leh Klitschko te an inhnek tum khan thutna sang khat dah belh niin, mipui sing kua zet an pungkhawm. Fury leh Whyte an inhnek tum khan thutna 5000 zet an dah belh ta thung a, mi 94,000 zet a punkhawm theih phah. Boxing entu tam ber record hmasa siam a nih tum khan tl^wm zawka tang Ukranian boxer huaisen Klitschko chuan boxing a chawlhsan thu a puang a, boxing a chawlhsan hian kum 41-a upa a ni. A hmuna boxing entu tam ber record thar siam a nih tum khan chak zawka tang Tyson Fury chuan inhnek a chawlhsan thu a puang ve thung a. Inhnek a chawlhsan hian kum 33 chauha upa a ni ve thung. Fury hian boxing a chawlhsan thu puang bawk mah se a kir leh a, palian huangah ro a rel chhunzawm leh nghalin amah hneh theitu an la awm lo.
Palian tuan rang, huaisen leh luhlul; Tyson Luke Fury hian December ni 6, 2008 khan professional huangah a vawi khat nan inhnek a hmachhawn a. November ni 25, 2015 khan Wladimir Klitschko hnehin IBF, WBO leh IBO kawnghren hlawh chhuak rual thawtin a vawi khat nan world champion a ni. Hemi hnu lawk hian rilru lamah harsatna lian tak a tawk zui a, a kawnghren kawl zawng zawng chhuhsak a ni. Hun engemaw chen a chawlh hnuin tha zawkin a lo kir leh a, Deontay Wilder hnehin World Champion a ni nawn leh a. Wilder a laksak kawnghren chu Dillian Whyte laka a humhim nawn leh a, hemi hnu hian vawi hnih a hneh tawh Dereck Chisora chu a vawi thum nan a hneh nawn leh tawh bawk.
Palian huangah tlawm nei lova boxing chawlhsan pakhat chiah a la awm a. Inhnek vawi 49 hmachhawn a chak vek a, a khingpui mi 43 lai knockout tu Rocky Marciano a ni a. Inhnek vawi 34 hmachhawn tawha la tlawm lo Fury hi Rocky Marciano hnung zui thei tura pualawm ber a ni rih!