US sipai North Korea-ah tlan lut

North Korea chuan US army soldier tanglai mek phalna la hauh lova South Korea ramri atanga North Korea lut chu manin an hreng mek tia sawi a ni.
US sipai hi UN hmalaknaa ram pahnihte inrina lai UN-run zone tiha awm a ni a. US leh North Korea boruak chhiat vanglai leh US-in a khua leh tuite North Korea hnaiha kal lo tura a tih laiin a lut lui a ni.
Senior US commander chuan an sipai chu engtin mah biak pawhna an la neih theih loh thu an sawi a. Admiral John Aquilino Commander of the US Indo-Pacific Command chuan North Korea nen pawh inbiak pawhna an la nei lo a ti a. An sipai chuan ‘a ma duh dan leh thutlukna’ in thuneitute phalna la hauh lovin North Korea a lut tia sawiin Korea a US forces te chuan an chhui chiang mek, a ti bawk.
US sipai an man hnu lawkah hian North Korea chuan a chhehvel bul hnaiah ballistic missile pahnih a kap chhuak zui nghal a. Missile kahchhuah hi US sipai an man nena inzawmna nei a nih leh nih loh hriat theih a ni lo thung.
US sipai hi North Korea-ah a tlanchhia hrim hrim nge lo let leh a duh dawn tih pawh a chiang chuang lo va, North Korea chuan sawi engmah a la nei lo bawk.
Pentagon chuan sipai hi Private 2nd Class (PV2) Travis King a nih thu an sawi a. Pentagon thupuangtu chuan PV2 King hi January 2021 atanga US sipaia tang tan tiin a sawi bawk.
Cavalry scout – reconnaissance specialist niin 1st Armoured Division ah South Korea a US military a service mek a ni.
Associated Press te chuan PV2 King hian South Korea-ah buaina a siam avangin hremna hmachhawn tur a nih mek lai tiin a sawi a. PV2 King hian Seoul-ah airport security paltlangin chumi hnuah terminal chhuahsan zelin ramri pana kalin ramri a kan ta tiin sawi a ni a.
American military-te chuan ‘ama duhthlan leh duhthu ngeia ramri kana kal’ tiin an sawi.
Mita hmutute chuan ramri-ah truce village Panmunjom ah Travis chu ring tak nui chungin a tlan zui tiin an sawi a. “A tirah chuan a fiamthu mai mai emaw kan ti a, mahse, a lo let leh tak lohah chuan thil a danglam ta a ni,” tiin mita hmutu chuan a sawi.
United Nations Command, Demilitarised Zone leh joint security area (JSA) enkawltute chuan North Korean military te hrilh hriain sipai hi chhuah zalen a nih theih nana hmalakna kalpui nghal a ni, a ti zui a.
“DPRK custody-ah a awm mek niin kan hria a, KPA (Korean People’s Army – North Korea’s military) te nen chinfel a nih theih nan hma kan la mek,” tiin an sawi a. PV2 King hi khawiah nge dah mek a nih a chiang lo bawk.
Greg Scarlatiu, executive director of the Washington DC-based Committee for Human Rights in North Korea chuan North Korean thuneitute chuan PV2 King lak atang hian informatoion a tam thei ang ber hriat an tum dawn a, chumi hnuah propaganda tool-ah hman an tum ang, tiin a sawi.
Demilitarised Zone (DMZ) hi Korean ram pahnih daidangtu niin khawvela venhimna khauhna ber hmun a ni bawk a. Landmine, electric leh barbed fencing wire leh surveillance camera a khat tlat niin sipai tena darkar 24 uluk taka an ven a ni bawk.
DMZ hi kum 1950 chhova Korean War atanga ram pahnih daidanna niin US chuan South a thlawp a. Korean War chu ralthuama inbeihna chu tawp tawhin mahse inremna tun thlenga la siam a nih loh avangin technical tak chuan indo ang reng an la ni thung.
North Korea hi kum tinin tlanchhiatsan tum an awm reng a, retheihna leh tam tlanchhiatsan an duh thin a. Mahse, DMZ paltlang chu khawvela thil hlauhawm ber te zinga ngaih niin paltlang a ni ngai lo tluk a ni. North Korea chuan kum 2020 a Covid-19 len tirh khan ramri a khar tan a, tun thlengin a la hawng lo bawk.
North Korea sipai South Korea a tlanchhe hnuhnung ber chu kum 2017-a thleng kha niin a vehicle khalh atanga tlanchhuakin military demarcation line a pan a, tum 40 kah tawkin mahse a dam khawchhuak hlauh thung.
Pandemic len hma khan North Korea atangin China-ah kum tinin mi 1,000 vel an tlanchhe thin tia sawi a ni bawk.
PV2 King-an North Korea a lut hian US lu a tihai hle tura ngaih niin American khua leh tui North Korea custody-a awm chhun a ni mek a, South Korea parukte pawh North Korea-ah hian lung in tangin an awm mek bawk.
US leh North Korea inlaichinna hi kum 2017-a US zirlai pakhat North Korea-in propaganda ruk tum tia a hrena rei tak a kawl hnua dinhmun derthawng taka chhuaha, a chhuah hnu rei lo tea a thih zui avangin a chhe zual hle a.
Trump president lai khan US khua leh tui pathumte chu Kim Jong Un nena inbiakna an neih hnuah chhuah zalenin an awm bawk a. Trump tlak hnuah North Korea chuan US runluih nan nuclear test nei chamchi in hei vang hian hrekna pawh nasa zawka kalpui a nih phah bawk.