AAP leh BJP worker innawr

Last updated Jul 21, 2023 9 0

AAP leh BJP worker innawr
Manipur buaina kaihhnawiha BJP Mizoram office kawta punkhawm tum AAP Mizoram worker te leh BJP worker te chu thu inhmu loin an innawr deuh a, police an inrawlh nghal avangin buaina liantham a thleng lo.
AAP Mizoram hian July 20 tlai khan social media kaltlangin Manipura chi leh chi intihbuainaa Manipur leh centre-a BJP sawrkar koh ei tumna hmanrua atan BJP Mizoram Hqrs. office kawta punkhawm an tum thu leh mipui a duh apiang tel tura sawmna hi thehdarh a. Hemi ang hian Zirtawpni chawhma khan an kalkhawm a ni.
BJP lam hian an office kawta punkhawm huaihawt chu rem ti loin an lo dang ve thung a, party pahnih worker-te hi reilote chu an innawr hman a ni.
AAP Mizoram thuchhuak chuan, BJP office Aizawlah Manipura thil thleng leh BJP sawrkar che chaklo demna sit-in demonstration neih an tum a, state dang ang thoin BJP-in an zia tilangin tharum hmangin an lo chhanglet tih a sawi. ‘Hetianga tharum thawhna hi BJP Mizoram tal hi chuan ching ve lo se kan ti hle a. Mizorama BJP hian hei aia nasa zawk hian Manipur tan auchhuak se kan tih avang leh sawrkar laipuia kan aw a rin zawkna’n chauha ti kan ni,’ a ti.
Manipur buaina chu BJP sawrkarna hnuaia thleng a nih thu te, biak in, mimal in leh nunna thlenga an chan mek thu te sawiin, hetih laia Prime minister Modi ngawih reng chuan chhan lian tak a neih a rinawm thu leh, sakhaw tenau zawkte leh hnam hnufual zawkte min nuaibo a tumna a anga an hriat thu a sawi. ‘Hmun hrang hranga BJP sawrkarna hnuaiah buaina a tamin mipuiin an tuar nasa hle,’ a ti.
Hetihlai hian BJP Mizoram chuan Zirtawpni vek khan an state general secretary Malsawmtluanga hmingin Aizawl Police Station-ah FIR thehlutin, an party office kawtah AAP worker-te punkhawm a rem loh chhan zingah – vantlang hmuna punkhawm phalna Aizawl bawrhsap hnenah an la loa, aurinna hman phalna nei lo chungin an hmang a; BJP office awmna Upper Republic to Raj Bhavan kalkawng hun rei tak dangchatin, larsap himna atan pawh pawi thleng thei hial ni ah an ngai tih a sawi.
‘Dan phala hnuaia demonstration an neih loh avangin, Zirtawpni apianga BJP mizoram-in political session kan neih thin pawh mi tibuaiin, party programme min ti khaihlak a ni,’ tiin, dan pawisa loa chetna thleng chu, AAP Mizoram nia inchhalte chungah dan anga action la turin a ngen tih a sawi.