K Vena’n Parliament-ah Manipur chungchang sawi luih tum

Mizoram MP (Rajya Sabha) K
Vanlalvena’n parliament session neih mekah Manipur chungchang sawi a tum a, an remti lo a nih pawhin sawi luih a tum.
Monsoon Session neih mekah K Vena hian Thawhtanni atan adjournment motion putluhna notice a thehlut a, hei hi an remti a nih chuan Manipur buaina chungchang hi sawi a tum.
“Sawi ka tum a, an remti lo a nih pawhin sawi luih ka tum. Ka sawi lui ang a, an duh leh an adjourn mai ang chu,” a ti a, a motion putluh tum hi a rem dawn em tih hriat lawk theih a nih loh thu leh, Thawhtanni-ah a hriat theih chauh dawn tih te a sawi.
Dar 11-ah session an tan thin a, business (an thiltih tur) te an puan zawhah zero hour a intan thin. K Vena hian Parliament-ah hian Manipur buaina chungchang sawiho ni rawh se tiin motion a pulut a, Zirtawpni khan a thehlut a ni. A thil dil chungchang hi zero hour-ah an tan dawn nge, zero hour zawhah an lut dawn tih te, thil sawi lawk theih a nih loh thu a sawi a, “A rem hun hunah dinpui ka tum a, an remti lo a nih pawhin sawi luih ka tum,” a ti.
Manipur buaina chungchangah an party-in dinna an neih sa thu a sawi a, chu chu Parliament-a bawhzui a tum tih sawiin, “NEDA-ah kan tel a, mahse BJP kan ni lo a, engkima thlawp kan ba hek lo a. Anni pawhin an duh hun hunah min bei a, BJP minister Mizorama rawn zin apiangin MNF leh kan chief minister an rawn bei ziah a, chuvangin NEDA-a kan tel hian kan dinna chungchangah min dal lo,” a ti.
K Vena hian Manipur buai tirhah khan union home minister hnenah lehkha a thehlut nghal a, chumi hnuah prime minister hnenah thlenin, Kristian MP telna team-in Manipur buaina chungchang hi chhui rawh se tiin a ngen. Tun hnaiah twitter-ah union home minister Amit Shah leh minister of state for home mi pathumte bang rawh se tiin a au leh bawk.
Lok Sabha MP C Lalrosanga pawhin Zirtawpni khan Lok Sabha-ah Manipur buaina chungchang sawiho phutin adjournment motion putluhna tur notice a thehlut.