Khawvela ram changkang leh thil ti thei ber ber ram 20 intelkhawmna Group of Twenty (G20) chuan Aizawl chu meeting neih nan an rawn hmang ve dawn a. Hei hi a chhan chu, India hi he G20-ah hian tel ve in, Dec 1, 2022 atanga Nov 30, 2023 thleng Presidency a chelh dawn vang a ni. India-in presidency a chelh chhung hian India ram state hrang hrangah business meeting hi an nei thin dawn a, chung zinga meeting pakhat chu Aizawl hian a lo thleng ve dawn a ni.
-- Advertisement --
He G20 meeting thlen tur chungchangah hian nimin khan Sub Committee on Overall Coordination on G20 meeting chuan AMC hotute thil awmzia sawipuiin AMC tawiawmna an mamawh dante an hrilh a, AMC hotute pawhin inhawng takin theihtawp chhuah an tum thu an lo hrilh ve bawk a.
AMC thawhpuina leh tawiawmna mamawh a nih dan thenkhat chu — ‘he meeting-a tel tur ten Mizoram hi state fai tak, state nuam leh mipui hawihhawm tak min tih leh hmuh thei nana lo dawnsawn; an kalna tur hmunhmate fai taka vawn leh lo enkawl te, bawlhhlawh thlahdah loh te, hawihawm taka lo dawnsawn te a pawimawh dawn avangin local council-te pawhin an hriat a tul’, tih a ni.
Inkhawmpui nikhua leh thildang pawh, mikhual nei tur chhungkuate chu, an mikhualten an cham chhunga nuam taka hun an hman theihna turin, sum leh pai sengin, eitur tuihnai leh mutbu fai leh inchhung thenfai hna thawkin an lo inbuatsaih sauh sauh thin a, an nihphung ni chiah lote pawh mikhualte duhsakna avangin an lo ruahman hram hram thin a, chu chu a hnu lamah mikhual thlengtu chhungkuate chuan an thatpui phah zui duh hle.
Tuna G20 business meeting thlen tur chungchanga lo inbuatsaihna kawngah pawh hian, mipui pawhin kan thiam ang leh theih ang anga mikhual thlen kawnga mawhphurtute kan lo tawiawm a, theihtawp kan lo chhuah tlan a pawimawh dawn hle a; hmunhma faina kawngah te, hawihhawmna kawngah te hma kan sawn phah ngeiin a rinawm. Chutih rual erawh chuan, ‘chutiang khatiang chuan, a tha zawnga min hmuh theih nan’ tih changchawi ringawta mikhualte hi kan lo thleng a nih chuan, an haw hnuah ngai kan awh leh vat ang tih a hlauhawm a. Chuvangin, he meeting thlen kawnga mawh lo phurtute hian he G20 meeting hi a hnu zel pawha kawng hrang hranga Mizoramin hlawkpui nana kan hman zui theih dan tur lo ngaihtuah chhuah ve a pawimawh khawp ang le.