Real in Milan an lehthal

Season thar atan inbuatsaihna club friendly match ngaihven hlawh takah Real Madrid chuan si hnih faia an hnufual hnuin AC Milan an lehthal. Inkhel dangah Aston Villa leh Newcastle United te chu 3-3 in an inhnehtawk ve thung.
Rose Bowl, California-a Europe club lian Real Madrid leh AC Milan te inkhel hian ngaihven a hlawh a, entu mipui pawh an thahnem hle. Inkhel hmuhnawm takah Italian Serie A club lian AC Milan in bul an tan tha a, si hnih faia hmahruai chungin chawlhlawk an hmang. Chawlhlawk hnu lamah club ropui Real Madrid er let an tuar lova, goal thum chhuahin tlawm zawkah an tang ta thung.
Football club hausa leh hlawhtling ber Real Madrid lakah hian minute Fikayo Tomori chuan minute 25-na lekah hmahruaina goal a thun. Goal thun hmasa zawkah an tan vangin Italin club lian Milan an phur viau. Real Madrid pawhin an si phurh sut tumin tan an khawh zui ve nghal chat bawk a. Hlauhawm siam thin bawk mah se a hmawr an bawk fuh thei lo. Goal thun tuma an innawr tawn chhen hnuin AC Milan chu che fuh hmasa zawkah an tang leh a, minute 42-naah Luka Romero hmangin an goal hnihna an thun a, chawlhlawk hmain goal dang a luh belh tawh lo.
La Liga club lian Real Madrid in chawlhlawk an hmang tangkai a, second half-ah team thar ang maia inlan in, an khel tha ta hle. Real Madrid in Chelsea hnenah hralh an tum nia sawi Federico Valverde chuan minute 57-naah goal thunin an si phurh a sut then. He goal hian Carlo Ancelotti-a team te a fuih phur leh zual a, na zawkin an khingpuite an nawr zui nghal chat. An goal khatna an thun atanga minute hnih hnu lekah Valverde hian an goal hnihna a thun belh zui leh zat a, an si phurh a sut zo.
Goal hnih ve ve an thun hnuin inkhel a hmuhnawm leh zual. Champions League-a team hlawhtling ber Real Madrid an khel tha zui zel a, boruak sangah chiai lo takin an inlan nawn leh. Game thunun zawka tang deuh char char Real hian a tawp an khar tha a, hun tawp dawn hnaihah chakna goal an thun zui leh. Minute 84-naah Vinícius Júnior chuan hma an hruai letna goal a thun a. He goal hi hun tawp thlengin an venghim a, an chak zui ta a ni.
California lamah Real Madrid leh AC Milan te an inkhelh lai hian Premier League club Aston Villa leh Newcastle United te chu Lincoln Financial Field, Philadelphia-ah an inhmachhawn ve thung a, 3-3 in an inhnehtawk.
Europa Conference League khel tur Villa hian Champions League khel tur Newcastle lakah bul an tan tha viau a, minute 11 chhungin goal hnih an thun hman. Minute sarihna lekah Ollie Watkins chuan hmahruaina goal a thun a. Watking goal thun hnu hian Emiliano Buendía chuan goal hnih a thun zui leh bawk.
Si hnih faia an hnufual hnuin Newcastle hian an khingpuite an nawr let vat a, minute 28-naah Ederson chuan goal thunin an si phurh a sut then. Alexander Isak leh Callum Wilson ten goal an thun zui leh an, an inhnehtawk zui ta a ni.