Jail/ Home ah natna inkai chhawn theih kai hmu tam

Jail/ Home ah natna inkai
chhawn theih kai hmu tam
Jail leh home ang chi ah natna inkaichhawn theih, a bikin tisa chakna hrikthlakna lam chi a inkaichhawn theih ang chi kai hmuhchhuah tur an tam tih hmuh a ni.
Ram pum huapa hetiang hmuna awmten natna inkaichhawn theihte an inkaichhawn thin tihtlem tuma hmalakna hmasa, ‘Integrated STI HIV TB HEPATITIS (ISHTH) Campaign’ chu Mizoramah pawh kumin June 1 khan Health minister Dr R Lalthangliana chuan a khuhhawng a, Aizawl bakah district hrang hranga jail leh home, sawrkar leh mimal/ pawl enkawl ang chi ah kalpui zui a ni.
Heng hmuna awmte hi an hriselna dinhmun enfiah niin, an thisen leh thildang atangin natna inkaichhawn theih, a bikin inhnaih taka chenhona atanga kai awlsam leh tisa chakna hrilhthlakna lam chi atanga kai theihte an kai em tih endik sak an ni.
He report atanga a lan danin, jail tang endik zat atanga chhutin HIV leh Hepatitis C hmuhchhuah an tam a, Hepatitis B, TB, STI (sexually transmitted infection / sexually transmitted disease) leh Syphilis lam kai hmuhchhuah an awm a ni.
June thla chhunga endikna an kalpuinaah hian mi 2602 endik hman a ni a; HIV kai hmuhchhuah 70, Hepatitis B kai 64, Hepatitis C kai 840, TB kai 3, STI kai 123 leh Syphilis kai 35 hmuhchhuah an ni.
ISHTH Campaign report-a tarlan danin, a vaiin jail 10, home etc. (govt) 13, Observation/ Special Home (private) 22 tlawh a ni a; health camp vawi 78 neih a ni.
He report thlirlet hian State Oversight Committee on Prisons & Other Closed Settings chu an chairman, Health & Family Welfare principal secretary Esther Lalruatkimi hoin Thawhtanni khan an thukhawm a. Chairman hian jail leh home-ah HIV leh Hepatitis C kai an tam em em mai chu ngaihven zui a pawimawh hle tih a sawi. Jail tawt lutuk hian natna inkaichhawn ti awlsamin, medical check-up neih leh damlote inenkawl uluk pawh a tiharsa hle tih a sawi bawk.