BJP kan hlau awkawng lo – Zoramthanga
BJP kan hlau awkawng lo – Zoramthanga
Thenkhatin BJP hlau anga MNF an puh thin chu an hlau lo hle tih MNF president, chief minister Zoramthanga chuan a sawi a. NDA kalkhawmah MNF anga do huai tumah an awm lo tih a sawi.
Thawhtannia, MNF office – Mizo Hnam Run inkhawmah Zoramthanga chuan India politics-ah NDA leh UPA-in a kal thin a. Tunah chuan UPA chu INDIA tia thlak niin, MNF chu NDA group-ah tel mah se, policy leh thiltumah chuan NDA thuin a kal loa, an ni chuan an policy nghet – “Pathian leh kan ram tan” tih kalha thil a kal chuan an dodal mai tih a sawi.
Uniform Civil Code champion-pui tumnaah pawh Mizoram Assembly-ah dodal thu an pass a, Delhi-ah an thehthla a; tunhnaiah pawh Prime minister hnenah UCC an do tlat dawn, tih ziaka a hrilh thu a sawi. “NDA kalkhawmah keini anga do huai tumah an awm lo. Modi-a intlawn siak luih luih a ni mai. MNF chu a policy-in Mizoram hnam leh a sakhaw humhim tura ding kan nih angin NDA hi kan hlau lo. MNF hi central sawrkar a inthlak avangin kan dinna kan la thlak ve ngai lo,” a ti.
Thenkhatin BJP an hlau tih chu an hlau awkawng lo, tih MNF president hian a sawi. Burma raltlan thawnkir tura centre-in a tih pawh an nawrkir dawn loa, chaw leh an mamawh an pek tur thu an puan hnan tih sawiin, “Hmasawnna thilah chuan kan thawkho a ni thei, kan hnam leh sakhaw khawih thilah chuan kan thawkho thei lo. An tih apiangah ‘Ji Sap’ ti chi kan ni ve lo. Keini tan NDA, UPA, INDIA-in awmzia a nei lo. Keini chu Pathian leh kan ram tan, tih hi kan sahal khai a ni. Kan sahal khai nena inmil lo chu kan hnawl vek thin,” a ti.
ZPM chu an phur vanglai takin MLA candidate an puang a, an buai nuaih a, an candidate-te belhchianin an derthawng tulh tulh niin MNF hruaitu hian a sawi. An ni chuan an policy hi positive/ constructive zawnga an kalpui laiin, ZPM chuan chhe vek policy an kakpui tih sawiin, “MNF leh Congress-in kan ram economy, culture, moral an tichhe vek an ti. Midang chu chhe vek chhuahin an chhuah a. A tha awmchhun kan tundin a ngai an ti a. Amaherawhchu, mipuiin infrastructure an en a, a chhe vek lo tih an hmu a ni,” a ti.