Democracy zahawmna tungding turin India sawrkarin hma la se – Mizoram mipui

Manipur-ah remna leh muanna a awm thuai theihna atan leh, democracy zahawmna tungding turin India sawrkar phutna thu Mizoram mipui chuan an chhuah. Thawhlehni khan Manipur-a Zofate thlavang hauhna leh an tawrhna tawrhpuina kawngzawh chu Mizoram pumah neih a ni a. Ngenna angin chhungkaw engemawzatin an inah Manipur-a Zofate tawrhpuina lantirin puandum an zar a ni. The Aizawl Post-in a zawhkualnaa a hriat theih chinah Aizawl leh district headquarters bakah khaw hrang hranga hemi puala kawng zawhna hi a vaiin khua/ hmun 40 chuang a ni. Kum upa lam atanga naupang chenin kawng zawhnaah hian an tel a ni.
Kawngzawhna pui ber Aizawlah chuan chhimlamah Kulikawn atangin leh hmarlamah Chanmari atangin zawh tan a ni a. larsap chenna – Raj Bhavan kawtah intawkkhawmin hetah hian hun hnuhnung hman a ni. NGO Coordination Committee chairman, Central YMA president R Lalngheta chuan Manipur-a Zohnahthlakte in leh biak in engemawzat halsak an ni chung a, raltlante tanpuina tur sum Mizoram sawrkarin a dil, sawrkar laipuiin a pe duh lo chu demawm a tih thu a sawi a. Manipur sawrkarin Zohnahthlakte venghim zo loa, nunna tam takin a tuarte, hmeichhe pawisawilo saruaka sawisaka thah zui an ni te chu hriatthiam har an ti takzet tih sawiin, “India sawrkar hian a rang thei ang berin he buaina hi a chinfel kan phut a ni,” a ti.
NGO Coordination Committee hmalakna ngaichang thiam a, pawl mal bila thuchhuah siam leh hma lak chu a fuh ber lo tih sawiin, tharum thawh loa Mizoram mipui chu kan awm thei chu lawmawm a tih thu a sawi a. Mizo zia diktak a langchhuak nia a hriat thu a sawi. Sawrkarin Manipura Zofa unaute buaina a chinfel thuai theihna’n inpumkhatna tha tak nen tangrualin hnehna kan chan ngei a ring tih a sawi bawk.
MHIP president Ngurmawii Sailo chuan Manipur sawrkar chu Zohnahthlak hmeichhiate pawngsual a rawng taka thattute na taka hrem tur leh, Zohnahthlak mipui chunga rawng taka che thin Manipur sawrkar chunga hma la a, hmeichhiate thlavang hauh turin sawrkar laipui a ngen tih a sawi a. NGO-ten sawrkar laipuia minister hrang hrang an hmuh tawh thu sawiin, raltlante tan theihtawp chhuah chhunzawm zel turin mipui a sawm. Ringlo mite anga rawng taka tha thawh lo tura mipui ngenin, theihtawpa hmeichhiate thlavang an hauh zel tur thu a sawi a ni.
Pungkhawm mipui thurel:
1. Manipur-ah remna leh muanna a awm theihna’n India sawrkarin chak takin hma la rawh se
2. Democracy zahawmna tundin a nih theihna’n sawrkar laipuiin a mawhphurhna hlen thuai rawh se
3. Manipur buaina avanga in leh lo chan, nunna chan leh hliam tuarte zangnadawmna pek ni rawh se
4. Zohnahthlak nula pahnih an zahawmna tibawrhbang a, saruaka khawlai fanpui leh pawngsualtute lakah an phu tawk hremna pek ni rawh se
5. Manipur buaina avanga Biren Singh sawrkarin Zohnahthlakte thubuai a siamsak leh jail tang zawng zawng hi chhuah thuai ni rawh se