Prime Minister Modi-a’n INDIA te na takin beilet

Prime Minister Narendra Modi chuan opposition te chu ‘kal ngaihna hre lo’ tia sawiin opposition alliance te hming thar INDIA tih chu “Indian Mujahideen” leh “Popular Front of India” te ang tia sawiin mipuite chu ram hming chawi hmang maia kaihher sual theih an ni lo a ti bawk.
“Tun ang reng renga kal ngaihna hre lo opposition hi ka la hmu lo,” tiin BJP leader Ravi Shankar Prasad chuan BJP parliamentary meeting neihnaah PM Modi thusawi a sawi chhawng a.
PM Modi chuan Bengaluru a kar kaltaa kum 2024 inthlanpui atana opposition te inhmuhkhawma pawl din thar India – Indian National Developmental Inclusive Alliance tih chu a nuihsawh bawk.
“INDIA tih hming an infaksiak a. Indian National Congresss. East India company, Indian Mujahideen, Popular Front of India – hengte pawh hi INDIA a ni. INDIA tih hming hmang ringawt hian awmzia a nei lo,” tiin Prasad chuan Prime Minister thusawi a sawi chhawng a ni.
Manipur buaina avang hian opposition te chuan PM Modi chu Parliament-ah thusawi nei tura an ngiat avangin rorel thei lova siamin a awm zui zel bawk.
Prime Minister chuan opposition te chu “Hneha awm, chau, beisei nei lo, thil pakhat chauh Modi dodal bak agenda nei lo” tiin a sawi a. An chetdan hian opposition a awm zel zia an pu a ni, tiin PM Modi chuan a sawi.
BJP te chuan kum 2024 inthlanpuiah mipui thlawpna hmuin awlsam takin chakna an chan tur thu a sawi bawk a.
Manipur buaina avang hian sorkarin parliament-a dan pawimawh siam fel tura a chhawp chhuah pawh kalpui theih lohin a awm a. Parliament house pahnih Lok Sabha leh Rajya Sabha te chu engmah tihleithei lovin a awm zui zel a ni.

Congress ten dem
Hetih lai hian Congress te chuan Centre leh State sorkar BJP te rorelna tena ‘inrelbawlna an kalpui fel loh’ em vangin Prime Minister chuan Manipur buaina a sawi ngam lo tiin an sawi ve thung.
Lok Sabha-a Congress Deputy Leader Gaurav Gogoi chuan Union Minister leh BJP leader te chuan ‘celebrity te bouncer tena an humhim angin Prime Minister-in Opposition te laka zawhna an zawh tur lakah humhim an tum a ni’ tiin a sawi a.
Home Minister Amit Shah-an Lok Sabha a sawihona neih an inpeih reng tia a sawi chungchangah Congress general secretary Jairam Ramesh chuan ‘a kaw tawpa tanga headline siam tumna’ tia sawiin , “Home Minister hian engmah tih a nei lo” tiin a sawi bawk a. Shah chu Opposition alliance INDIA in PM Modi thusawi an ngiat laiin ‘ngawih a chuh tlat’ tiin a sawi bawk a.
A hmain Shah chuan Lok Sabha-ah sawihona neih an inpeih thu sawiin mahse Opposition te zawk an inpeih lo a ti a ni.
“INDIA-a tel party te chuan Manipur chungchangah hian Prime Minister-in sawi nei hmasa se la, chumi hnuah sawihona kan nei mai dawn a ni. He mi chungchangah hian Home Minister pawh a ngawi reng a. Eng vangin nge Parliament chhunga PM thusawi nei hmasa tura a hrilh hreh em em?” tiin Ramesh chuan a sawi bawk.
Congress general secretary (organisation) K.C. Venugopal pawhin, “Parliament rorel thei lova a awm chhan chu Prime Minister berin zawhna hmachhawn a ngam lo. Elected leader a nihna House chhung a lut ngam lo a nia. Manipur ah civil war a thlen mek laiin PM chu a thuihhruaite lakah a biru mek,” tiin a sawi bawk.
“Ram chhung sosangin a awm a, a chhan chu buaina nasa zual zela a awm a remtih vang a ni a, ngawih a chuh tlat hi a zahpuibawm bawk a ni,” tiin a sawi bawk.
“Prime Minister tihtur chu harsatna awm laia hruaitu nihna lantir a ni a. Ban phakin a awm tur a ni a, tunah erawh ban phakin a awm lo va, hruaitu an awm lo a ni. Bouncer atana a hman a Cabinet leh BJP minister te kutah engkim a dah vek,” tiin Gogoi chuan a sawi bawk.

No Confidence Motion
“Ngenna tam tak kan siam tawh chungin Prime Minister Narendra Modi chuan May 3 atanga thil thleng hnuah Manipur chungchangah engmah sawi a la nei duh chuang lo va. Hei hi PM-in sawi a neih ngei theih nana parliamentary tool kan neih chhun a ni,” tiin senior Opposition leader chuan a sawi.
Lok Sabha-ah Opposition te an tlem fe zawk chungin party hrang hrangte chuan Manipur issue sawi a nih theih nana kawng awm chhunah an ngai a ni.
INDIA party te chuan Prime Minster in parliament ah sawi nei phawt se chumi hnuah Manipur chungchang sawihona a thleng thei chauh ang, an ti a.
Sorkar lam thung chuan Manipur chungchang sawi an inpeih reng thu sawiin mahse thu delhkilh an neih chuhun chu Prime Minister in zawhna a chhan kher a ngai tur a ni lo, an ti ve tlat thung.

Rahul-an chhang let
Opposition front INDIA te beihlet nana Prime Minister Narendra Modi-an Mujahideen leh dan pawna hnawl Popular Front of India tihte nena a khaikhin hnuah senior Congress leader Rahul Gandhi chuan PM Modi hi a chhang let a.
Gandhi chuan Opposition front te chuan ‘Manipur a thawi dam ang a’ tia sawiin North East India-ah ‘idea of India’ a dinthar leh ang, a ti bawk.
“I duh dan ang angin min ko thei Mr. Modi. INDIA kan ni a. Manipur kan thawi dam leh an ga, hmeichhia leh naupangte mittui kan hru hul ang. Mi tinte tan remna leh muanna kan thlen ang a. Manipur ah Idea of India kan dinthar leh ang,” tiin a sawi.
Rahul Gandhi hian Monsoon Session a tel ve thei lova a chhan ber pawh criminal defamation case ah thiam loh chantir a nih avanga MP atanga ban a nih vang a ni.
Gujarat court-in thiam loh a chantir hnuah High Court a pana awmzia a neih chuan loh hnuah Supreme Court-ah a zualko leh mek a ni.