Kawnpui lama kal lirthei lian tlan dan siam thar

Vaivakawn Zohnuai leimin vangin National Highway 54 kawngpui khar a ni a, he kawngpui kaltlanga Kawnpui lama lirthei kal dan tur siam thar a ni.
SP Traffic Aizawl chuan Kolasib SP nena inbe rawn chungin lirthei tlan dan tur hi a siam a. HMV/MMV chin chu Kawnpui lam atanga Aizawl via Durtlang kal tur lirthei lian ke 10 nei chin leh a aia te ho chu zing dar 6.30 atanga chawhnu dar 1.00 thleng an tlan thei a. Aizawl lam atangin Kawnpui via Durtlang kal tur lirthei lian ke 10 nei chin leh a aia te ho chu zan dar 7.00 atanga zing dar 2.00 thleng an tlan thei.
Lirthei lian ke 12 leh a aia lian chu Kawnpui atanga Aizawl via Durtlang lamah tlan phal a ni loa, Kawnpui atanga Sairang Road lamah chauh kal tur a ni. Sairang Sihhmui leh Ch. Saprawnga Truck Terminal-ah lirthei te zawkte nen bungrua an inhlanchhawng (transit) thei a ni.
Kawnpui leh Aizawl inkar kawng via Durtlang hi a zim avang leh lirthei lian an tlan dawn avangin, lirthei leh bungrua engmah kawngdungah dah phal a ni lo.
Aizawl kaltlang tur HMV-te chu Zemabawk leh World Bank road lamah an tlantlang nghal thei anga, Aizawl khawpui chhunga lut turte chuan HMV entry zan dar 8 thleng nghakin World Bank road-ah an nghak thei ang.
He thupek hian chhiatrupna thil, kangmei leh emergency kaihhnawiha duty, dan leh thupek pawimawh bika police leh magistrate duty-te chetvelna a huam lo a. Thupek zawm lo chu Section 179 MV (Amendment) Act 2019 hmanga hrem theih an ni tih a sawi.