North Korea-ah Russian defence minister
Russian palaite Defence Minister Sergei Shoigu kaihhruaite chuan North Korea an lut a, Chinese delegatoion ten an zawm ve leh bawk ang.
Pyongyang-in Korean War tawpna kum 70-na lawmna a neihah tel tur niin military parade turu tak neih a ni ang.
Tun hi North Korea in pandemic laka him tuma ramri tin a khar phui tlat hnua ram dang mi tena an tlawh hmasak ber nia sawi a ni.
North Korea hian kum 2020 tir lam atang khan sumdawnna leh diplomatic lamah pawh inkharphui vekin economic leh political lama a zawmpui ber Russia leh China te pawh a huam teltir vek tho a ni.
Pandemic laka him a tumna lutukah essential goods heng ei leh bar leh damdawi lam thleng pawhin ram dang atanga a chawkluh te a titawp vek hial a ni.
North Korea-ah hian tam nasa tak a tla nia sawi niin a nuclear ralthuam siam kalpui avanga khawvel ram tena an hrekna leh ramri a khar bawk avangin a nasa zual tia sawi a ni a.
Analysts te chuan 1953 Korean war tawpna ‘Victory Parade’ neihnaa Chinese leh Russian envoy te tel ve hian North-in Covid khuahkhirhna a hlip dawn ta anga ngaihna a awm tiin an sawi.
Russian aiawh palaite hi Shoigu an hovin “Welcome, Comrade Defence Minister of the Russian Federation Sergi Shoigu” tih banner chu Korean leh Russian tawnga tara lo lawm a ni a.
Chinese palaite hi Li Hongzhong, Chiense Communist Party-a central policy making committee member ni phain a ho ve dawn thung a. China leh Russia-te hi North Korea thian tha ni reng an ni.
Kum 1950 favang laia Korean War chhuakah khan Beijing chuan North Korea pui turin sipai a tir lut a, khatih laia Soviet Union pawhin indonaah khan North Korea a thlawp bawk.
Kum 1991-a USSR a kehchhiat hnu pawh khan Russia chu US an tei theih loh dun avangin Russia nena la inthiantha zel an ni a. Washington chuan North Korea chu Ukraine indonaah pawh Russia hnena ralthuam peah a puh a, hei hi Pyongyang leh Moscow te chuan an pha ve ve thung.
Shoigu an North Korea a tlawh lai hi Ukraine indona avanga US leh Russia inbakkaih vanglai leh Beijing leh Washington te Taiwan avanga an inngur nasat laia thleng a ni bawk.