Zirlaibu la pek kim loh leh zirtirtu hlawh pek thuai phut

Zirlaibu la pek kim loh leh
zirtirtu hlawh pek thuai phut
Mizoram sawrkar enkawl school-a zirlaibu la sem kim loh leh zirtirtu thla thum chhung hlawh la pek loh chu pek thuai an phut tih ZPM party chuan an sawi.
ZPM Media & Publicity hruaitute sawi danin, Mizoram pumah Samagra Shiksha hnuaiah a thlawna zirlaibu dawng tur zirlai nuai khat vel an awm mek a, zirlai sang telin lehkhabu an la dawng kim lo. Kumin April 5 khan academic session tan ni tawhin, July thla tawp, term exam dawn thleng pawhin zirlaiten zirlaibu hi sawrkar atangin an la dawng kim lo. Tun dinhmunah, raltlan naupang tel loin, class-IV Hindi sem tur copy 600, Class-VII Mathematics copy 3000, Class-II Mizo (Kumtluang 2) copy 1500 sem turin an indaih lo mek a, zirlaibu hi hmundanga lei tur pawh a awm chuang lo tih an sawi.
Sawrkar school hnuaia zirtirtute hlawh thla thum – May, June leh July chhung an la pe thei lo tih an sawi bawk.
“Sawrkarin chhuanlam hrang hrang siam thin mah se, a bul ber chu zirlaite hmakhua leh zirna in a ngaihsak tawk loh vang a ni. Zirlaite leh zirtirtute harsatna hi a ranglama chinfel dan zawng turin sawrkar kan phut a ni,” an ti.
A hun taka zirlaiten zirlaibu an dawn theihna’n print order pek hma a, zirlaibu sem turte chu kum liamta UDISE (Unified District Information System for Education Plus) report (enrollment) ang mil zela siam thin a nih tho avangin print zat tur tlangpui a hriat lawk theih tura ngaih a nih thu sawiin, kumtin a hun taka dawng hman lo tura print a ni thin chu thuneituten ennawn thuai se an duh tih ZPM party chuan an sawi a ni.