Niger ram hremna kalpui tan mek

Sipai tena civilian sorkar paihthlaa thuneihna an chan hnuah EU chuan Niger ram nena security cooperation a neih tin te a titawp nghal vek.
A hma lawkin US chuan civilian president paihthlak tak Mohammed Bazoum, khawthlang ram tena Islamist militants te an beihna kawnga an thawhpui ber chu tana an thlawp bur thu an sawi bawk a.
Kar kalta Zirtawpni khan presidential guards unit hotu lu ber Gen Abdourahmane Tchiani chuan Niger hruaitu thar a nih thu a puang a. Niger a security tha lo, economic lama harsatna leh corruption nasa chu thuneihna a chhuh chhan tiin a sawi.
Khawthlang ramte thung chuan Niger hruaitu thar chuan tute nge a belh dawn tihah ngaihthatlohna an nei thung a. Niger thenawm mai Burkina Faso leh Mali ram te chuan an ram sorkar paihthlak a nih hnuah Russia an awn der tawh a.
EU foreign chief Josep Borrell pawhin US leh France te thlawpin coup leader chu pawm duh lovin security cooperation leh budgetary aid an pek thin chu tiamchin awm lova tihtawp a nih thu a puang zui a ni.
Kar kalta Inrinni khan colonial power hlui leh Mali chhuahsan tura tih a nih hnua regional military headquarter pawh Niger a dahtu chuan development aid leh budgetary support tin an tihtawp nghal vek thu a puang bawk a.
Hetih lai hian African Union chuan Niger amry te chu ni 15 chhung hun pein sorkar tungding leh turin an ti bawk.
US Secretary of State Antony Blinken chuan Bazoum- Niger in kum 1960 a independence ram a nih hnua elected leader hmasa ber a neih mantute chu vauin ‘tanpuina dollar million tel chu pek loh theihin an awm reng’ tiin a sawi a.
Hetih lai hian Russia Wagner mercenary group te thung chuan sorkar paihthlakna chu hlawhtlinna tiin an sawi ve thung a.
“Niger a thil theng hi Niger mipui tena an coloniser te laka harsatna an neihin a hrin a ni” tiin Wagner hotu Yevgeny Prigozhin chuan a sawi a. “Coloniser te hian an nun dan chu barhluih tumin kum za kaltaa Africa dinhmun angah khan chhuah an tum tlat a ni” tiin a sawi a. “Tunah chuan independence ram dik tak ang an ni ta” tiin a sawi bawk.
Wagner te hian African ramah hian fighter sang tel an nei a, Central African Republic (CAR) leh Mali ah pwh tam tak la dahin hegnah te hian sumdawnna liantham tak tak kalpuiin Russia diplomatic leh economic relation siamtu ber an ni bawk a. Wagner fighter te hi African ram tam taka human rights bawhchhiatna nasa taka kalpuitu tia puh an ni bawk.
Coup leader Gen Tichiani hi kum 62 a upa niin kum 2011 atangkhan presidential guard in charge ni tanin kum 2018 khan President Issoufou chuan general rank ah a kaisan tir a ni.
Kum 2015 khan ex-president paihthlaa sorkar paihthlak tumah puh a lo ni tawh a, mahse court ah an puhna chu a hnawl thung a.
Sorkar a paihthlak hnua thusawina a neih hmasak berah Niger chuan an ramin international commitment a neih hrang hrang te bakah human rights an zah tur thu a puang a.
Chutih rual erawh chuan anmahni dodaltute lakah erawh nataka sawiin harsatna siama chetlak tumna a awm a nih chuan thisen a luang nasa ang a tizui thung.
Niger capital Niameyah chuan ni tin nunphung pangngai taka kalpui dawr leh market te pawh hawn a ni a, mahse, civil servant te erawh office atangin hawtirin an awm thung.
Nigeriens te zingah sorkar paihthlakah ngaihdan a hrang nuai a, a thenin an ram him lova hriatna chu sorkar paihthlak nan chhuanlam a tling lo an tih laiin sipai sorkar thlawptu an awm tho bawk.
Niger hi tun hnaia West Africa a sipai tena thuneihna an lak intihhmuh zinga a tharlam ber a ni a. A hma in Mali, Guinea leh Burkina Faso ah te pawh sipai ten civilian sorkar paih thlain thuneihna an lo chang tawh a ni.
Tun hi kum 1960-a France atanga a indan hnua Niger in sorkar paihthlak a tawn tum ngana a ni tawh a, a hma tum li ah erawh sipai te an hlawhtling lem lo thung a ni.