A GUIDE TO SMART FARMING – 30

By RK Dawla
Mb 9366095658

1. August thla, tlangram lo neitute Lo zawh thla kan thleng leh ta reng mai. Kan sawi fo tawh angin kumin chu ram pum huap pawhin ruahtui kan dawng tlêmin kan dawng rual lo hle a. Farmer tân chuan kumina thil tha danglam lian tham thleng chu sawhthing rate a tha hi a ni deuh mai âwm e. Kan intihhmuh a, kan thar tam deuh tâk avangin Dragonfruit man a tlahniam ta viau thung. Hmun thenkhatah chuan thal khawro rei tak hnu-a July ruah rawm bawhawk vak vangin, sabereka khuangkaih a thleng thung. Kan thlir thui loh leh ât-huai vanga lei minin chenna in a hnâwl case kan nei zeuh zeuh bawk. Ruahtui uchuak fona hmun awihpangah, tuihâwk kawng mumal nei lova in rit pui pui kan sa ngam hi chhiatna nasa zawkin min hmuak mêk tih hi thudik a ni.
2. Kuminah hian khawkheng leh ruahtui tlêm aia pawi zawk kan ramah a thleng mêk a. Chu chu Kawngpui lai thin company-ho leivung a ni. Hmun tam takah kawngthlanga leivung an nawr liam mai mai hmuh tur a tam êm êm. A paihna hmun tur siamin chutah chuan uluk taka lei an chhep tur a nih laia, heti taka kan ram an pawisa lo leh a ram neitute pawhin ngaimawh nachâng kan hre lo hi a pawi hle. An kawnglaih hrim hrim hian leilung inkhaidiat (natural ecosystem) a tihchhiat nasat tawh tehreng nên, an leivung paih duhdah phei hi chu kum engzat tak la tuar ang imaw? Ruahtui tam loh kumah pawh kawr a hnawhin farmer-te hmunhma leh tuilak tam tak a tichhia a, tuihawk nu takin lui kuang leh hawiher a thlâk mêk a. Ruahtui tam kumah phei chuan a la thlâk nasa hle dawn a ni.
3. Changkanna tura Infrastructure kan neihte hian kan leilung inkhaidiat hi hetianga a tichhe zel a nih chuan, kawngpui tha leh zau takah phurh tham engmah thar lovin pawn lam atangin kan chawlût tawk tawk ringawt ang a, kan compensation ei zawh hun chu kan retheih ni intanna tur a ni ringawt dawn…Ngaihtuah chian kan ngai a ni. Kan ram rohlu, kan tourist hotspot tur chu kan khawih danglam loh ram hmul, nungcha leh leilungte hi an ni a. Hengho suasama dinchhuah kan inring tlat a nih chuan, khawvela hnam ngaihtuahawm ber pawl kan ni ngei ang. Mahni hma sial luat avanga kan tu leh fate hmakhaw ngaih nachâng pawh hre lo vawiina Mizote hian, eng rilru nge kan put tâk hi le? Political environment tha kan mamawh hle mai!
4. Airport leh lei dawh chim fona ram, Ropeway pawh nei ve thiam lo, phûl tak aia phûl lem ngaisâng zawk thangthar Mizofate hi, khawvel hian min ngaisang emaw chut Mi rama developmental work tha tak ang kha, kan ramah a thleng ve hlei thei lo tlatte hi eng vang nge? Term khat chhunga kan MLA/Minister hausak chak dan êm êmte hi MAK a tling a! Vawiina he thu ziaktu leh lo chhiartute hi rei tak kan dam tawh lovang, thangthar naupang zawkten min la rawn thlâk ang. Vawiinah hian kan ram a dam lova, kan ecosystem hian hmabâk êng a nei lova, farming community tân innghahna tlâk sawrkar kan nei hek lo. Chutia nih chuan, ram tha zawk, zahpuiawmlo leh chhuan tlâk nei thei tura tha thawh turin mawhphurhna kan la ngam dawn em?
Sawrkar hna leh contract ningnawi beisei lo, mahni thawhrim rah têla ram tha zawk din inbeisei farmer-te zinga mi ka ni a. Sawrkar atanga kan chan tâwk leh beisei phâk thinte ka ngaihtuah hian, lung a awi lo mai a ni lova, thin a rim thin! Officer lian leh MLA/Minister te tlawn tura vawikhat mah tha la sêng lo mihring ka ni erawh, Pathian malsawmna ropui tak a ni a. Kan ramah hian khua var ve tawh sela tih hi kawla-nichhuak-chhiara thlantuia inbual thinte tawngtaina a ni e.