Japan in Spain an sawp

Australia leh New Zealand-a hmeichhe World Cup khelh mekah thawhtanni khan group B leh C te an inching fel a, Japan, Spain, Australia leh Nigeria ten last 16 an lut.
Japan 4-0 Spain
Khawchhak ral lian Japan chuan Wellington Regional Stadium, New Zealand-a an khingpui Spain chu si li fai ngawtin an sawp a, group champion ni chungin last 16 an lut. Japan lakah tlawm chiang viau mah se Spain pawhin last 16 an lut ve tho bawk.
Japan leh Spain te hi point thum hmu tawh ve ve an nih bakah last 16 lut chiang tawh ve ve an ni a, group champion nih inchuha inkhel an ni. Group champion nih a hlut em vangin inkhel hmuhnawm a tling a, team hnihten an ngai pawimawh dun hle. Group champion nih ngei tuma tan khawh Japan in bul an tan tha a, chawlhlawk hmain goal thum an thun hman. Inkhel tan atanga minute 12-na lekah Hinata Miyazawa chuan hmahruaina goal a thun a. Minute 29-naah Riko Ueki chuan an goal hnihna a thun belh zui leh bawk. Si hnih faia hma an hruai hnuin goal hmahruai thuntu Miyazawa chuan minute 40-naah an goal thumna a thun zui leh a, si thum faia hmahruai chungin chawlhlawk an hmang.
Chawlhlawk hnu lamah Spain in an si phurh sut tumin tan an khawh a, inkhel hmuhnawm zawk hmuh tur a awm. Spain hian hun tha nei bawk mah se an chhawr tangkai mai thei lova, an si phurh an sut thei lo. Hun tawp dawn hnaihah Japan bawk an che fuh nawn leh a, minute 82-naah Mina Tanaka chuan an goal lina a thun a, a tawp a khar. Hun tawp thlengin goal dang a luh belh thei tawh lova, Japan chuan si li faiin hnehna an chang zui a a ni.
Group C-a inkhel dangah Zambia chuan 3-1 in Costa Rica an hneh a, World Cup-ah a vawi khat nan hnehna an chang. Khelh hnih tlawm zawn a, tla chiang tawh Zambia tan hian Costa Rica lakah bul an tan tha viau a, inkhel tan atanga minute thumna lekah Lushomo Mweemba chuan hmahruaina goal a thun a. Minute 31-naah Barbra Banda chuan penalty pet goal in an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Costa Rica in bul an tan tha ve thung a, minute 47-na lekah Melissa Herrera chuan hmahruaina goal a thun a, an si phurh a sut then. An si phurh sut zo turin goal thun belh tum viau mah se an hlawhtling zo lo. Hun pek belh minute thumnaah Zambia tan Racheal Kundananji chuan an goal thumna a thun zui leh a, an chakna a nemnghet. Ti chuan, Zambia chuan 3-1 in Costa Rica an hneh a, World Cup-ah a vawi khat nan hnehna an chang ve ta nawlh a ni.
Group C atangin point 9 hmu Japan leh point 6 hmu Spain te an tlang a, Zambia leh Costa Rica an tla. Japan hian Group E a team liam England an pehhel thei dawn niin a lang a, hei ngawt pawh hi thawk huaina tham a tling ang.
Australia in a tawp an khar tha
World Cup thlengtu New Zealand an tlak hnuin a thlengtu pakhat zawk Australia in fiahna hautak an paltlang a, si li faia Canada sawptu Australia hian group champion niin last 16 an lut.
Autralia hian group match hnuhnung ber an hmachhawn hmain point thum an hmu mek a, an khingpui Canada in point li an hmuh tawh thung a. Last 16 lut thei turin chak ngei ngei an mamawh. Chak ngei ngei an mamawhna inkhel, fiahna pawimawh takah bul an tan tha a, minute kuana lekah Hayley Raso chuan hmahruaina goal a thun. Hma taka goal an thun hian an laka pressure tam lutuk a vai kiang duak a,
Melbourne Rectangular Stadium-ah ngampa leh inringtawk zual zawkin an inlan zui theih phah. An mualah nuam zual zawka inlan turin goal hmahruai thuntu Raso hian minute 39-naah an goal hnihna a thun belh zui leh.
Si hnih faia hmahruai tawh Australia hian second half-ah bul an tan tha leh viau a, minute 58-naah Mary Fowler chuan an goal thumna thunin an hmahruaina a tizau. Hun rei tak goal a luh belh loh hnuin hun tawp dawnah a thlengtu team hian penalty an hmu a, penalty hi Steph Catley chuan minute 90’+4-ah a pet goal a, an goal hnuhnung ber a thun.
An mualah si li fai ngawta Canada an sawp vangin Australia hi group champion ni chungin last 16 an luh theih phah a. Last 16-ah Group A-a pahnihna Norway an hmachhawn zui leh. Group B-a inkhel dangah point li hmu tawh Nigeria leh point la hmu lo Republic of Ireland te an inhmachhawn a, goal awm lovin an inhnehtawk. Nigeria hian point nga hmuin last 16 an lut a, Group A champion Switzerland an hmachhawn zui leh ang.